JOHON 11

Lazarus Thina

1Bethani khopuia Lazarus anatpaha alui om han, a u Meri le Martha om an lui om. 2Meri ning puma a ke han, Sariak rimhui anot pea; asamhan anot hulpe han a naipangpa Lazarus alui nat. 3Hiva jarra a u nu ngai ning Jisu jiang chong an pek “Puma na sap lungsiat ha a natjui.” 4Jisun hava ha a jet phat han, a ti, “Hiva a nat hi thina rang a nat nimak, tak-ha hiva jarra Mi Pasalnai manpak nale lianpui na mu na ranga ke ani.” 5Jisun Meri, Martha le Lazarus a lunga siat. 6Jisun Lazarus a nat ti chong a jet tenna phut a om na mun na nini suale a tung jui. 7Hava suale a man a thiamruoingai jiang a ti, “keini Judia tiang kirkhir tarei,” 8Thiamruoi ngain Puma jiang anti “Oja Jiwngai ning a tun tak lunga nadengrang anti ha, Sontiang nala cheret rang mo?” 9Jisun a sang, “Nikhat sunga nidan somlei anni nimak mo? Hiva jarra tu ang mi ning sunna a lon inko kutsuikesui om noning, ajarko a man ramuol la var ha a mu. 10Tak-ha tu ang mi ning jan na a lon inko kutsuikesui nei nati ajarko, avar ha a man jiang om mak.” 11Jisun hava arisualenle “Lazarus ajaljui, a tun kei chekata va kei thui rang ka ni; a ti.” 12Thiamruoingain anti, ‘Puma, ama a jal aninko, a nat damrang ani.’ 13Tak-ha Jisun ko Lazarus a thi jui a ti na ani; anmani ngaidon na ko ajalla a pong akansak ke anti. 14Hiva jarra Jisun a thianga anmani jiang Lazarus a thi jui tia a manjet. 15Tak-ha nang nin tak nanngai na rang. Kein ama jiang lui om making ti a nang ni jiang ka ning asat, keini ama jiang che rei. 16Deuma anti Thoma ha ning a sap Thiamruoingai jiang a ti, puma le keini thisuam ranga che rei.

Jisu Thui Khir Nale Ring na A ni

17Han Jisun a hong tungpha, Lazarus ha thanna an phumna nimanli ani jui tiha a jet jui. 18Bethani ha Jerusalem tenna phut mail kilometar anni anthum a kan lak ani. 19Jiw mitamtak in Meri le Martha an nai pangpa thijarra lung hui luitak mathem ranga an hong ani. 20Martha ning Jisu a hong ti chong a jet pha, a chea avakan mupui; tak-ha Meri ko inn sunga a om. 21Matha ning Jisu jiang a ti, ‘Puma nang na lui om inko kanaipangpa hi thinoning, 22ha aninom nang in Pathian jiang ama ranga na lam rakip ana pek rang ke tihi ka jet. 23Jisun ama jiang a ti, na nai pangpai ringkhir rang ani tia a manjet.’ 24Marthan a ti, atorna nikhuo han ama hi a hong thui khir rang tihi ka jet. 25Jisun annajiang a ti, “Kei thui khir nale ring na ha ka ni, tu ang mi ning kei hi tak ana ngai inko athi innom aring khir rang ke ani, 26han tu aninom kei tak anangaiha ring khier nati veikhat thilai noning tihi tak nangaimo?” 27Amanu ning a sang, ‘Puma, Pathian nai Pasal ramuol la ahong Mesaia na ni, tihi kein tak ka na ngai.’

Jisu a chap

28Marthan hi a ti suale anaipangnu Meri jiang a che rukchian a kan biakpui, “Oja ha hin a om ma Nang anatok tia a hong manjet.” 29Meri ning ha a jet pha, a thui ret a rak tak a kanmupui ranga a che jui. 30Tak-ha Jisu ko khuo sunga la hong tung ma, Marthale an kan mu na han ala om ani. 31Jiw mingai ning Meri inna lung hui lui tak an om han, Meri in a ngirra a rak tak a che an mu pha a nuk an lui jui; ajarko anmanin Mari ha thanna a che avachap rang mo tia an ngaidon. 32Meri ning Jisu om na mun a mu pha han, a mai akuna, ‘Puma, nang hin na lui om inko ka naipangpa lui thi noning a ti.’ 33Jisu ama achaple Jiwngai chaplim a mu han, a lung a tam atokjui. 34Jisun a ti, “A ma hon mo nanphum? Han anmani ning anti Puma hongnang enro.” 35Jisu a chap. 36“Jiwngai anti, enru a man i duk a lung isiat amo?” 37Tak-ha anmani mi aviarin anti, “Amitdel ham alui mandam nimak mo? A man thina tenna Lazarus ha manring tornoningmo?”

Lazarus a man ring

38Han Jisun alungtok a than tiang a che jui, thankhurha lunga anluising. 39Jisun lung khek ranga chong a pek jui, A thipa a char nu Martha ning a ti, puma kanphumna nimanli ani jui arimsiatrang ani jui. 40Jisun Numeinu jiang a ti, “Nang na takngai na a om inko Pathian lianpui na nimurangke ka na ti nimak mo?” 41Anmanin lung ha an lui suak jui, han Jisun chung tiang a en na a ti, “A pa ka na manpak kanalamna rakip na na jot pe.” 42Kana lam na rakip nang in nanajetpe tile hiva mitamngain Nang in kei na na hong tir tihi tak an ngai na rang ka na lam ani. 43Hiva a ti suale, rasaring tak a hong ti, “Lazarus hongsuakro.” 44A thipa ha a kut a ke anchun chunga a hong suak jui, hale a mahi puan na an lui khit “Jisun anmani jiang a ti, ama hi sutnang man che taru.”

Jisu An Jot Luina

45Meri inna a hong mitamngai ning om Jisun i tho chuan ha an mua tak an ngaijui. 46Mi aviar inko Pharisi ngai jiang ankirra, Jisun itho chuan rakip ha an ripejui. 47Thiampulian le Pharisingain kan chun na an nei a anti. Ija mo kalo tarang hiva mi chunga angakpa rakip itho hi ko? 48keinin ama hi hingan a thei jak kanmasua inko, mingain ama hi tak ngain nan ta, han Rom mingain hong nanta kan biakinn le kanjat tenna nasutrang anni. 49Hava kumma thiampulian kajapha ning a ti, nang nin iom jetmakcheu. 50Jat khat in imangver nek inko miring khat ithi lam asat tihi nang nin ngaidon tor mak che u mo? 51A man hiva arihi a bing rang nimak, hava kumma a man thiampulian khat a chang jarra, Jiwngai rang Jisun a thi rang ha a man tashanthei anga a ri. 52Anmani rang jak ni luia Pathian mingai a kan thechaia omngai ha taksa khat jak chang na rang om ani. 53Hava nikhuo ten han Jiwngai ning Jisu that na ranga an kan siamjui. 54Han Jisun Judia ram sunga kandorem lai mak, tak-ha, a man ramtong lianna a om Epraim khuo han a thiamruoingai le alui om. 55Jiwngai kan na ut ha a hong nai phat han, mirakip taksa man thiang na ranga, ankhuo tenna phut Jerusalem ma an hong jui. 56Han anmanin Jisu ha an lui tok, biakinn sunga an ngirra khat le khat an lui kan dingkel, nang nin imo nan ngaidon? A ma kan na ut hin hongnoning mo? 57Thiampulian le Pharisingain mirakip chong an lui pek ha ko, Jisu a om na an jet le chonga na hong peranghan ama churnarang ani.

Currently Selected:

JOHON 11: AIMOLBSI

Highlight

Copy