JOHON 19

1Pilat in Jisu a tuanga avejui. 2Sepai ralmingai ning linglukhu an khat anphanna a lu chunga an mankhujui anmanin puansen dup khat anmansia. 3Han anmani jiang an hong tuanga “Jiwngai reng naringsei sotrase!” anta an benjui. 4Mipui maikunga Pilat ning veikhat a hong keisua ret a, ‘Enru’ Kein ama jiang a siatna ite mu making na man mu ranga kein nang ni jiang kiva tuang ani. 5Hiva jarra Jisu linglukhu an man khua Puansen dup an mansia tual a hong suak jui, Pilat in anmani jiang, “Mipahi hin a om jui,” a ti. 6Thiampulian le angakmi ulianrupngain Jisu an mu pha, an khek a khros a hemru! Khros a hemru anti ani, havaphahan Pilat ning anmani jiang, Kein hiva ama chunga a siatna non tak ete mu making a ti. 7Jiwngai an hong sang, keinin dan khat kan nei hava jarra a mahi athirang a suak, ajarko a man a bing jak Pathian ka ni a kan ti ani. 8Anmanin hiva an ri hi a jet pha, a man a tam a chitjui. 9A ong na han a lut khirra, Jisu jiang, “Nang ho tenna mo ni hong?” tia ading kel, tak-ha Jisun sanglaimak. 10Pilat ning ama jiang a ti, “Nang in kei hi nasang noni che mo?” Nang masu a nale khros a khai makhop ranga ranak ka nei tihi ngaidonro. 11Jisun a sang, ‘Nang in kei jiang ranak na nei na ha ko Pathian nin ranak ana pek mak aninko nang ranak kei jiang lui nei noni che, hava jarra na kut chunga a na pek miha a siatna a lian det ani a ti.’ 12Pilat ning ha a jet pha, Jisu ha ama suajotjui, tak-ha Jiwngai an hong khekret, Nang in ama namasua aninko nang Rom vaihompa chuan ha thomakche, ajarko tu a chang innom reng an khat ka ni a ti inko, reng khat ha i kan talpuike ani. 13Pilat in hiva chong hi a jet pha, a man Jisu ha, a kei sua chongtan na mun ong na ha a man ong jui, hava lung ha Hebru ngain “Gabbath,” tia an kan jet. 14Hava ni han kan na ut an thomakma sunchim a luini, Pilat in mingai jiang a ti! “Nan rengpa hin a om jui” ani. 15Anmanin an hong khek khirra “Thatru, Thatru, ama khros makhairu!” anti Pilat in anmani jiang ading kel ret, “Nang ni nan rengpa khros kamakhai rang mo nan dei?” a ti, thiampulian karra an khat in a hong sang, “Reng lianpa jak ha kan rengke a ti.” 16Hava pha Pilat in Jisu ha Khros a khai ranga an kut chunga a pek jui. Han Jisu ha anmanin an tuang jui. 17Tual tiang asuak a a chap a khros adom ma lurok mun, anti, ‘Hebru chongako,’ “Golgotha”, anti han antuongjui. 18Hava mun han anmanin ama le khros chunga an khai suam mi anningai om veitiang khat le changtiang khat Jisu ning alai a anluikhai ani. 19Pilat ning rabu che her khat a jiak khros chungahan a tar, ha ko Nazaret Jisu, Jiwngai rengpa tia chonga a manjet. 20Hivahi Jiw mitam tak in an pa an teljui ani, ajarko, Jisu Khros a ankhai na ha mun ha khopui le kanlak remma, hava chong antarha Hebru chonga, Latin, Grik chonga an jet ani. 21Jiwngai thiampulian khat in Pilat jiang a ti, Jiwngai reng tia jiak maro manjet maro tak-ha, “kei Jiw ngaireng ke ka ni” a man a kan ti ha lam jiak pero a ti, 22Pilat in a sang, “kein ka na manjet kijiak saha, kijiak jui ke.” 23Han Sepai ngain Jisu ha Khros an khai anhem suale, apuansi an luia, her manli an man suak jui, akuntai ham an luia han kuntai ha ko asuilung ite lui om mak. 24Hiva jarra Sipai ralmingai han an khat le an khat an kan biak “kein in hi ko ek therlaimarei,” rashi kan en narei tu ning mo kan tum rang hiva chong hi kakuntai hin anmani rashi kan en nananti tihi, “Chong thiang in alui ri ha tung na ranga ani. 25Jisu khros le anaija ama jiang a ngir mingai ha, a nu le anaipangnu ti ko kleopa lom nu le Megdalene Meri ngai anni. 26Jisun a nu le a thiamruoi lungsiat ngai han a ngir a mu pha, a man a nu jiang a ti, “E numei enro hi na pasalnai ke ani.” 27A thiamruoingai jiang vei khat a ti, “Enroha nanuke ani.” Hava suale han ko thiamruoingain a nu ha a in tiang an tuang jui.

Jisu A thi

(Mat. 27:45-56; Mrk. 15:33-41; Luk. 23:44-49)

28Atunko chuan i rakip a tor jui ti a Jisun a jet jui. Chong thiang in iriha lungdo a tung na rang “A man katui aral a ti.” 29Hava mun na kek asipmar khat alui om: anmanin Phisop anti molha anmanchop puma anerha an vaman chop. 30Hava Juha a inna a ti, a tor jui, a ti han a lu akunna a thi jui.

Jisu Chei a Ansun

31Jiw ulianrupngai ning pilat jiang a, thinga khros a an khaijui, a ke anvekhiak khros tenna masum nareng hin anmanin cham an lam, ajarko hava nikhuo Irai alui ni han anmanin, sernikhuo han khros chunga man om rang hi luidei ma u. 32Han Sipai ralmingai ning an hong a, Jisu le Khros ankhaisuam a phut na ha a ke an ve kheakjui. 33Jisu kol la an hong pha han Jisu ko alui thi jui, han a ke ve khiakpe lai ma u. 34Ral mi an khat Jisu diap han chei avasunna, halai tak han thisen le tui a hong suak jui. 35Hava an mu pha anti, keini nom a man aluiriha adik ti a kan jet, nang ni ning om ama irihi nan jet thei na rang ki na ri hi adik ani. 36Hiva i suak chuan hi “Chong thiang in alui ri, nuk jui a a ruk khat teom mang noning tihi tung na ranga ani. 37Adang chong thiang khat in a ti “Cheia ansun pa han anmani ha ennati.”

Jisu An phum

(Mat. 27:57-61; Mrk. 15:42-47; Luk. 23:50-56)

38Hiva suale, Arimathia khopuia Josep in Jisu tak sa lui ranga. Pilat jiang avalam Josep hi Jiwngai a chit jarra ruk chienna Jisu nuk jui mi khat alui ni. Pilat in Jisu ruak ha luiro a ti pe. 39Masat Puma jiang a hong Nikodimas han Josep le kan ruaia kilometar somranga han an valon, Myrh le arimhui an hong choi. 40Anmani anni Jisu ha a rim hui le puanrui anemhan an chun na ankhitjui ajarko Jiwngai kanphumna nunchanhi hingahin an thomo an lui ti. 41Jisu ruak siakna rang mun ha rahuan an khat alui om rahuan sungha than khur, tute la kan phum chilluina mun khat alui om. 42Hava ni han jiang ang hin Jiwngai sernikhuo ani jarra han than ha a nai a chang jarra, anmanin hava mun han anrejui.

Currently Selected:

JOHON 19: AIMOLBSI

Highlight

Copy