JOHON 3

Jisu le Nikodimas

1Jiwngai lam kai pu, Pharisi ngai karra a ming Nikodimas anti mi ankhat alui om. 2A ma jankhat Jisu jiang alui honga a ti, ‘Rabbi, nang Pathian jiang an phut alui hong oja khat nani tihi kein in kan jet, ajarko Pathian in kanruaipui luiako tu khat innom natho chuan angakpa ngaihi tho tor mau.’ 3Jisun alui sang, “Adik tak kirike; tu anin nom a tharra nai a chang mak aninko Pathian rengramma lut tor noniu.” 4Han Nikodimas ning alui dingkel, “Mi ankhat in atar nuk a ija mo a tharra naite ichang rang? A man veini tunga anu von sunga lut naite anga hong kanjirtor nati mo?” 5Jisun a sanga, “Kein nang jiang adik tak ka na ri ke ani, tui le thavang an phut akanjirmak miha tuachang in num Pathian rengram lut tor noniu. 6Taksa an phut an nei ha tak sa ani, thavang an phut an nei ha thavanga ani, 7Nang a tharra nai nichang rang tia ki na ri hin ngak maro. 8Semthining a rang jotna han arang, nang in hava rasa na jet, tak-ha nangin hontiang mo ahong phut hontiangmo a che jet mache, ha ang han thavang phut nai ichang mirakip anitheirang ani.” 9Nikodimas ning alui sang, “Hiva ngaihi ija mo ihongnitor rang?” 10Jisun a ti, “Nang Israelngai oja alian khat nania hivahi jet tor mache mo? 11Kein a thiang ki na ri ani, keinin kan jet ha kan na manjet keinin kanmuha kan na ripe ani, tak-ha nang nin kei ka chong ri ankhat om luijot ma cheu. 12Kei hiva ramuol chung changa kirihi nang nin tak nan ngai mak aninko, vanram chong ka ri phat han ijamo nang nin tak nan ngaitorrang? 13Chung van tenna anphut a hong chum Mi Pasalnai ama niluia tu khat innom chung vanna ache la om ma cheu.” 14Mousi ning ramtong mun na rul an khat aluidomma alui makhai anga, Mi Pasalnai ham an ma khai rang ke. 15Ajarko tu ang mi ning ama takngai rakip in kumsot a ringna nei nati. 16Ajarko Pathian in hiva ramuol hi a lungsiat jarra a pasalnai ankhatjakha ana pek jui. Tu aninnum ama takngai rakip in amangti om noning, tak-ha kum sot ring na nei nati. 17Ajarko Pathian in ramuol la chong tanranga a nai a hong tir nimak; tak-ha ramuol hi santhei na ranga ihongtir ani. 18Tu anin nom Mi Pasalnai takngai rakip ko chongtan na om mak, hale tu a chang innom takngai lui rakip ko chongtansa ani jui. 19Chongtan chuan ha ani; tiko var ha ramuol a hong tung, tak-ha mingain adik lui chuan an tho jarra, a var ha nek om a jing ha andeijui. 20Chuan dik lui a tho rakip in var ha anmatir, hale a chuan dik lui itho ha nadonati tia a var han hongjotmau. 21Tak-ha adik chuan a tho tu angin Pathian jiang chuan kithoke ti ha phuang a dona ranga a var han an hong ani.

Jisu le Johon

22Hiva suale Jisu a thiamruoingai le Judia ramtiang an lui che. Hava mun han ama phabongkhat aluiompuia, tui alui man lut alui man tho. 23Johon ning salim a sirra a en na tui atam jarra hava mun han mi an hong ngaiha tuiamanlutjui. 24Hava phat han ko Johon hi ren inn na lasiak ma u. 25Johon a thiamruoi aviar le Jiw an khat le chong kandingkelna, man thiang na chung chang a kan biakna ankanneijui. 26Hiva jarra anmani Johon jiang an lui honga an lui ti, ‘Rabbi, Jordan va ralla nan luiomsuam ama jarra chongir nipeksa mi ha a tun tui amanlut a a om, hale mirakip in ama jiang an che jui;’ 27Johon nin a sang, “Chungvanna an phut Pathian in ihongpek ni lui a mi ha ning i om tho tor noning.” 28Kein nang ni jiang ka lui ti, “Kei Khrista ha ni making, tak-ha a man a masat inahongtir ani tihi nang ni nan tak tak in kachongir shakhi nan ni.” 29Muinuha muipata ani, muipa asap ha a sirra angirphahan, muipa rasa ha a jet han a ning asat; hinga hin kei ningsat na ha lung khopna ani lungdo a man tung. 30A mako i hong kan son rang, hale keiko ka hong sinmemen rang a suak.

Chung vantenna i hong

31Chung vanna an phut i hong ama ha ning i rakip karra a lian tak ha ani; ramuol la an phut ani mi ha ramuol ta ani, hava jarra ramuol ranga chong ha a man a ri. Chung vanna an phut i hong a maha irakip karra asangtak ani. 32A man imusa, i jet sa chong ha a ri, tak-ha tukhatnom a chong lui pe ma u. 33Tu a chang innom ama chong alui mi han Pathian hi adik ani tia a man dikjui. 34Pathian in ihongtir mi han, Pathian chong a ri, ajarko Pathian in ama chunga arathaha lungdo tunga alui pek. 35Apan a pasalnai ha a lungsiat, an khat om a kut chunga i rakip ranak neinaranga a pek jui. 36Tu a chang innom a pasalnai takngai mi han kum sot ring na nei nati; tu a chang innom a pasalnai takngai lui mihan ring na mu noning, tak-ha Pathian lung nat ha a chunga om nati.

Currently Selected:

JOHON 3: AIMOLBSI

Highlight

Copy