LUK 12
12
A sat Kanrol Jiang A ri
(Mat. 10:26-27)
1Hingahin milishing lishing an kan chun na anomlaihan, Jisu ning a thiamruoingai jiang a ti, nang nin pharisingai tenna kan ning theiru; anmaningai ha asat kan rol anni. 2Ajarko ri lui rang, ikanthuprang chong i om om mak, hale jetluirang chong ruk i te khat om mak. 3Hiva jarra nang ni ning a jing karra nanringaiha avarnahin anjetrang ani, hale inn sunga ruk a anrirakipha inn chunga rasa suak a rinanti.
Tujiangmo Chit rang
(Mat. 10:28-31)
4Ka lungsiat sap le jar ngai nang ni jiang kein ka na ri ani, nan taksa a na manmang tor ngai han, nuk a ko i om anthotorlui ani. 5Kein tuha mo nan chit rang na manjet kati, Pathian ama ha chitru, a na that suale mei khurra anatirtor ama ha chitru, hale kein nang ni jiang ki na manjet ani, Pathian ama ha chitru.
6Peisa anni rang jak sirvachek ranga nanjuar nimak mo? Anmani an khat jak om Pathian mitmua ko theinimak. 7Ajarko nalua sammal rakip atelpetjui ani.
Khrista rang a jot le jot lui
(Mat. 10:32-33; 12:32; 10:19-20)
8Chitmaru, nang ni a tam lam siarvachek nek a nan man a tam, kein nang ni jiang ka na ri ani, miring madonna kei a na jot rakipngai ha, mi pasalnai han nom thaneithiangngai madonna ama ning inajotpe rang ani. 9Tak-ha mitam karra kei a na jot lui ama ha miringnai pasal han nom, thaneithiangngai madonna om na jot penoning.
10Tu angkhatning Mi Pasalnai chunga arisiat ha ngaidam om nati, tak-ha Thavang Thiang chunga arisiat mi ha ko ngaidam om noning.
11“Hale nang nin Sainagok lam kai, ngai jiang hale reng a lianngai jiang an na tuang karra imo kansang rang, imo kan ri rang tia kan ngai maru.” 12Ajarko a thiang thavang ning anaripe rang ke.
A nei ngai Tetan na
13Mi khat ning Jisu jiang mitam karra alui ri, Puma ka Pan inei sum le sial rakip ka u le kan sem na ranga nari pero.
14Jisu ning alui sang, he miring kei hi tu ning mo nan phur semranga ranak a na pek? 15Han Jisun a ti, kan ning theiru, hale nantakha asat a ngaidon theiru, ajarko miring in anringhi ama asum le asial ranga an ring nimak.
16Jisu ning hiva chong tetan na hi alui ripe; “Mi khat ning alui puk chang a tam akhomjui. 17Han a man ije ki tho rang? Ajarko kei kanim ka changngai hi siakna mun omlaimak”. 18Hale a man atia, “Inntehi set kata innte a lian khat sinkati, hale kaneiphur chang le nim rakip hi thunkati” 19Hale Ka thavang jiang tikati, “He thavang nang ranga, kum sot ranga phurpai kabukjui, manhuitaro, chaktaro, nektaro.” 20Tak-ha Pathian ning a ti, “He mi pang hiva jantak hin naringkhuo lui rang ka ni jui, han nang in na ning mansatna na lal nathumha tuta mo ichang rang?”
21Pathian tianga lalle thum neiluia an tak rang jak lal a buk ngaiha hingahin ani. Jisun chong ri ha a tor jui.
Pathian Takngairu
(Mat. 6:25-34)
22Han Jisun a thiamruoingai jiang a ti, ajarko nang nin chak ranga, nan om na ranga, hale nan tak chunga a lut rang puansi diarkei rang ite khat nan ning man dong maru. 23Chakle nek nek a ringkhuo ning, puansi diarkei nek a taksa ning alutdet ani. 24Enru va ak ngaiso anmanin vorrom vor ma u, khomum khom ma u Luakom luakmau, innte om sin ma u, tak-ha Pathian ning anmani ha manvat mak, hale va ngai karra om a man a tam tak anni. 25Hale nang nin nan ning a donga nan ringkhuo aseidet nan ring tormo? 26Nang nin asintek hivahi nan tho tor mak aninko a dang a dangai ranga ijarra mo natha nanmantak. 27Enru ija mo ram ma tonpar ngain an ring; anmanin sinnum sin ma u, puan na khongmau tok ma u, han kein nang ni jiang narirong; Solomon ten nom ama a ranak, a lian aseina dan na ratuk jamsialla lui kan sinmak. 28Pathian ning asan a tunna an ring innom jiangako meilaia ipeirang ramsul ngal lom hiva khan asat atho pe, o takngai torlui ngai nang ni jiang ko Pathian in a khel la na tho, navar penoning mo?
29Hiva jarra imo kanchakrang, imo kannekrang tia nan ning man dong maru. 30Ajarko ramuol chunga a om miring rakip ning phur rakip a nem na an jet tihi nan pa Pathian ning a jet pe ani. 31Hiva nek inko Pathian rengram ha tokbakru, hale hiva ngai hi nang ni jiang na pek nati.
Vanram ma Neina
(Mat. 6:19-21)
32Chitmaru rup asintengai, ajarko nan pa ning nang ni jiang rengram inapekhi ama lungdo ani. 33Nannei phur rakip juarru, hale a riangngai jiang pekru, hale thir ekning chaktorlui rang, leisa ning chaklui rang sekhuiha sinru, a ruk innom deptor lui rang sumle sialha bukru. 34Ajarko nanlal om na han nan lung om a om.
Suoksat
35Kan ning theiru, ahongrakip chunga, nankong khit in lang, thaimei lek in lang om ru. 36Ajarko muiruai na mun na kholai khang a che anmani rengpa ning a hong kan le karra anrengpa han Inn khar kot akil karra a rak a long ranga angakchak a om anga ni ru. 37Anrengpa a hong karra a suak ngain an menga jalluia imu an khanga an omngai ha ravansat anni. Kein nang ni jiang a thianga ka na ri ani, anrengpan akong khitrep na ta, anmani ha kholai umranga man ongnata, anrengpan an se pa tho rang ani. 38Anrengpa ning Janchimma a hong innom, arkhuan chunga a hong innom anmanin an ngak an lui om aninko idukamo ravansat anni. 39Nang ni kan ning theiru; ajarko inn neipu han a ruk hongrangha a jet aninko, ama ning jalluia mengnata a ruk ning a inna ilut torlui rang ani. 40Hiva jarra nang ni om kan ning theiru, ti ko Miring nai Pasal han nan kan ningmak pha laitakhin i hong rang ke.
Takngaijot, Animakle Takngai Omlui Suak
(Mat. 24:45-51)
41Han Pitar ning a ti, “Puma hiva chong lam hi tetan na hi keini jiang animakle mirakip jiang om na ripe jui mo?”
42Han Jisun alui sang, a phat a hong tung karra anmani jiang chak rang nek rang an tum pek na ranga, anrengpa ning inn sunga i rakip entorranga, a ching a var akanlingrang tu ha mo imanchang rang? 43Rengpa a puma pa a hong kan le karra inn sung rakip asat aluientor suakpa ama ha ravansat ani. 44Kein nang ni jiang a thianga ka na ripe ani, apumapan aneipupan a suakpa jiang i rakip a kut chunga a man en ani jui. 45Tak-ha suakpa ning Rengpa ha a hong kan le a sot tia suakpan suaknai pasal, numeingai ha a ve a, hale a chak a nek Ju aluiruia alui om aninko, 46han suakpan a ngaidon mak nikhuo lai tak han rengpaha hong na ta, han suakpaha bongni chang a tan rang ani, hale lungam na nei lui ngaile ama tum imusuam rang ani jui.
47Hingahin rengpa a lungdo a jet a akanninglui hale rengpan i dei nuk jui a chuan tho lui suak ha molbi omkhanna verang ani. 48Hale rengpa lungdo jet lui moltong rang suak ama ha ko mol aviar jak tong rang ani, hale a tam a pek mingai jiang a tam lui rang ti nati, hale mingain a tam anmansiak ama jing a tam an lam rang ani.
Jisu hi Rup Khuisenke
(Mat. 10:34-36)
49Kei ramuol hin mei masul ranga ka hong jui, tak-ha meihi a tum a kang inko kei ning keideiha imo ani? 50Kei ning tuija baptais na man tho na ranga a lam khat a om, hivahi a tung mak kar je i duk mo kei hi nan namasiat rang? 51Kei ramuol la ka hong hi ramuol manhip na ranga mo tia nan ngaidon mo? Kein nang ni jiang na ri kati, nimak a khel la kansen na ranga ani. 52Atun tenna phutko innsungkhat miranga a omngai ning, mi anthumle anni, anni le an thum Khuisen rang ka ni jui Kankhui senrang anni. 53Anpa ngai ning an naingai ha, enda rang anni, an nai ngain an pa ngaiha enda rang anni, an nai numeingain annuha enda rang an ni jui, annuhan an nai numeingai ha enda rang anni, antarpi ngain anmuinuha enda rang anni, hale anmuinu ngain antarpi ngaiha enda rang anni jui (Anpa le an naingai, an nai le an pangai, an nungai le annainumei ngai, an nai numeingai le an nungai, antarpi ngai le anmuinu ngai, anmuinu ngaile antarpi ngai kankhui senrang anni.)
A pha Jetru
(Mat. 16:2-3)
54Jisu ning mitamngai jiang a ti, nang ni taitak tiang hin sum a jing adup nan mu karra, nang nin ruo a tho rang ke nanti, hingahin ruo a tho. 55Hale simtianga phaivou a hong karra nang nin nisat a lum rang ke nanti, hale a hong lum, 56nang ni asat kanrol ngai chungvan le ramuol omchan hi nang nin nan jet, tak-ha a phat hi nang ni jet ma che u.
Natak In Kanjotro
(Mat. 5:25-26)
57Han ijarra nang nin nan tak nan tak chunga chong nan kan jen lui? 58Ajarko, nang le he nan suak pa chongtan ranga nan che karra chongtanpa jiang nantungma lammarak kanbe tai na thoru, animak inko ama ning chongtanpu jiang na tuang na ta, hale chongtanpu a man a lian a tor khat jiang napeklut na ta, han atorpan nang ha ren inna inathun rang ani. 59Kein nang jiang kari ani, nang ning nasak rang peisa ha nasak tor mak karje hava mun tenna hong suakjot noning.
Currently Selected:
LUK 12: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
