LUK 22
22
Jisu Chur Na rang Kansiam
(Mat. 26:1-5; Mrk. 14:1-2; Jhn. 11:45-53)
1Atunko kanna ut thona phat a hong nai jui. 2Han thiampulianngai le dan ojangain Jisu ha ija mo kan that rang tia an lui tok, tak-ha anmanin mingai ha an lui chit.
Juda Ning Jisu Ajuor
(Mat. 26:14-16; Mrk. 14:10-11)
3Thiamruoi somleini karra Iskariot antipa Juda om anti ama chunga seitan alui lut jui. 4Han ama ning a chea thiampulianngai le a dang ojangai jiang Jisu hi peklut na ranga chong an kan biakpuijui. 5Han anmanin an ning asat peisa pek ranga an kanbiakjui. 6Hale Juda ning a jot Jisu hi mitam an om mak lai tak han anmani jiang peklut na ranga tancha alui en.
Jisun Kanna ut Thorang Akanning
(Mat. 26:17-25; Mrk. 14:12-21; Jhn. 13:21-30)
7Hava suale anmanin kanna ut thona phat a hong tung jui, hivani hin anminin belram that na rang phat ani. 8Jisun Pitar le Johon jiang a ti, cheru nang nin kanna ut ranga chak le nek hong kan ning taru.
9Anmanin an dingkel, keini hova mun na mo luikan ningru nati?
10Jisun anmani jiang a sang, “Enru nang ni ning khopui nan lut karra, tuibella tui hongtang numei khat nan kan mu rang ke, ama alutna inntak ha nang ni om lutru, 11hale inn neipu jiang dingkelru, ‘Puma ning nang jiang a ti, ka thiamruoingai le kanna ut tho suamna amun ha honmo ani a ti? 12Han inn sunga chung nungtak ka ankhat nang ni jiang na man mu nati, hava han nang nin keini kanna ut amunrang kan ningru”.
13Anmanin an lui che karra Jisu ning alui ri nuk juia an mu jui, hale kanna ut kholai khangna rang ankanningjui.
Kholai Khang
(Mat. 26:26-30; Mrk. 14:22-26; 1 Ko. 11:23-25)
14Hinga hin a pha ahong tunga Jisun thiamruoingai le an ong jui. 15Jisun anmani jiang a ti, “Kei ning pong khodengthei ka mu mahin nang ni le hianga kanna uth tho suamna phat hi kaneijot. 16Ajarko kein nang ni jiang ka na ri ani, Pathian rengram hi atung mak karlim kei neklai noning”.
17Hale Jisu ning koklai alui a, “Pathian a manpak suale ati, hivahi nang nin kansemru; 18ajarko kein nang ni jiang ka na ri ani, Pathian rengram a hong mak karje kein a tun tenna phut darkha tui hi inlai noning”.
19Hale Jisun tal ha alui a Pathian ha amanpak, aher aher a ekkhui a anmani jiang a pek a ati, “Hivahi nang ni ranga ana pek ka taksa ani, nang nin kei nan na ngaidon na ranga chakru.” 20Anmanin an chak suale, hava anga koklai ha aluia a ti” hiva koklai hi nang ni ranga ka thisen tenna an sin ani, “chongsan thar ani”.
21Enru, kei anajuar rangpa ha kei le bukheng kanban suam. 22Mi pasalnai ha ko thirang ani, Pathian lui ngaidon nuk juia, tak-ha kei ana juarpa hako khodengthei rasibui ani;
23Hava han anmani karra tu mo annirang tia an kan dingkeljui.
A lian Tak Ruia Chongkan Kher
24Hingahin thiamruoingai karra tunmo a lian a lutir ani rang tia an lui kansualjui. 25Han Jisu ning anmani jiang a ti, “Jatdangai reng ning anmani chunga a neipu changa a om, hale anmani chunga chuan tho ngai han anmani ha an kut chunga an na siak tia an lui, 26tak-ha nang niko hangahan nimak, tak-ha nang ni karra a liantak ning a sintak anga om rase, hale asin tak amaning aliantak ha ni rase”. 27Jisu ning a dingkel la, “Aonga bu nek pa hale a ngir chunga sep a tho ha tulammo anlian det? A onga ompalam han a lian det nimak mo? Tak-ha kei ko nang ni sepa tho anga ka om ani.”
28Tak-ha nang niko kei jiang an na en sin na rakip ha nan mu suam jui. 29Hale ka pa ning kei jiang Pathian rengram en ranga ana pek anga, Kein nom nang ni ha ka na pek jui. 30Nang nin kei le bukheng an khat kan bansuam rang ani, hale nang nin Puma ong na mun han ong nan ta, Israel phung somleiningai vaihom rang nan ni.
Pitar ning Ajotlui Jisun A ri
(Mat. 26:31-35; Mrk. 14:27-31; Jhn. 13:36-38)
31Simon, Simon enro seitan ning a satlui ngai tenna asat ha senkhui ranga cham ha a mu jui. 32Simon kei ning na lung nathon mak na rang a ka na lam pe, han nang in na nuk nakir karra na u na nai ngaiha an lung mandetpero.
33“Puma kei ko nang le ren inn sung khan nom thisuam ranga ka kan ning jui”, tia Pitar ning a sang.
34Jisu ning a ti, “Pitar nang in keihi jet making tia veithuntak nati mak kar je ve enni jan hin ar khongpan khuang noning”,
Peisa Kok, Puankok, Chemsei
35Han Jisu ning anmani jiang atia ret, “Kein nagnihi peisakok, chempai, hale kekok buia kanatir lai a vat imo a om?” Han anmanin antia, i om a vat om mak”.
36Han Jisu ning anmani jiang a ti, “Atunko sekhui a lek ama ning om choita rase, hale chempai ham hangan choirase, hanna i om aneilui ama han nom a puan adiar juar senlang chemsei choktarase.” 37Ajarko kein nang ni jiang ka na ri ani, kei ka ruia “Hiva chongthiang hi hong tung rang ani”, ajarko hiva rakip a lui kan jiak sa ani.
38Thiamruoi ngai ning an sang, “Enro Puma, hin chemsei anni a om jui”, han Jisun a ti, “Ahunjui”.
Olib Tangbunga Jisun Alam
(Mat. 26:36-46; Mrk. 14:32-42)
39Han Jisu ning Olib Tangbunga ache jui, han thiamruoingai ning an lui jui. 40Hava mun na an tung pha han Jisun anmani jiang a ti, “Nang nin mathemna nanchul mak na ranga Pathian jiang lam ratru”.
41Han lunga adenga itungtorna khan han Jisu ning chubei aluibuk. 42“O Puma nang in na najotpe aninko hiva koklai hi kei jiang phut na lui pero, tak-ha kei ngaidon lungdo changma rase, nang ngaidon lungdo ha nirase”. 43Han vanram tenna thaneithiang an khat in Jisu ha ranak alui pek a man kan mu jui. 44Hale Jisun a pong reia a khel la Pathian jiang a lamjui, han athannom thisen anga alom alom simlei hin avachuljui.
45Jisu ning Pathian jiang a lam suale a hong pha han a thiamruoi gain ning dong tak a an lui jalha a mu karra, 46anmani jiang a ti,” nang nin ijarra mo nanjal, mathemna nanchul mak na ranga thui in lang Pathian jiang lamru”.
Jisu Anchur
(Mat. 26:47-56; Mrk. 14:43-50; Jhn. 18:3-11)
47Han Jisun chong arilai tak han, mitam an lui honga thiamruoi somleini karra Juda Iskariot ning, Jisu kolla ahonga abiang a hong tum jui. 48Jisu ning ama jiang a ti, “Juda Iskariot nang in mi pasalnai ha abiang tumma nipeklut mo ani?”
49Jisu le kan ruai a thiamruoingai ning, i hong suak, thiamruoingain Jisu jiang anti, “Puma kein in chemsei hin mo kantuk rang?” 50Hale anmani karra mi ankhat ning thiampulian khat a suakpa a kuar khat ha aluisamthakjui.
51Jisu ning a ti, “Nang in jot pe taru”, han akuarha Jisu ning amakhop pea adam khir jui.
52Han Jisun thiampulianngai, Innthiang a ngak ngaile ulianrupngai hale ama chur ahongai jiang a ti, “Aruk arep a chur rang anga chem le mol nan hong choia nan hongjuimo? 53Kei ning nang ni le biakinn sunga kan lui omlai han nang ni keihi na chur rang tho ma che u, tak-ha hivahi nang ni ajinga a omngai rat na phatha ani”.
Pitar Ning Jisu Jotmak
(Mat. 26:57-58,69-75; Mrk. 14:53-54,66-72; Jhn. 18:12-18,25-27)
54Hava suale anmanin Jisu ha an churra thianpulian ngai Inna an tuang jui, tak-ha Pitar ko a lak a kan samria hin Jisu nukha alui jui. 55Hale anmanin tualla mei an thoa an renga an om phat han Pitar om anmani karra akanchella alui om. 56Han Pitar ning mei ona mun na a om lai tak han, tu ang khat suak numei dongma ankhat ning ama ha a mu karra a hong ti, “Hiva pasal hi om Jisu nuk jui khat ani”.
57Han Pitar ning a sang, “Numei nang in nati ama ha kei jet making”.
58Hapkhat suale mi khat ning ama ka jet a hong tiret, “Nangom anmani karra khat na ni”. Han Pitar in a sang ret, “Kei ama hi jet chil making”.
59Hale Dar khat suale midang khat in a hong dingkelret, ‘a thianga hiva mi hi om ama le alui kan ruai, ajarko a mahi Galili tenna ahong ani’.
60Hannom Pitar in alui sangret, “E miring nang in nanti ha kei jet making”, ama ning chong a ri lai tak han ar ahong khuangjui. 61Jisun Pitar jiang a hong kanheia a hong enjui, han Pitar ning a ngaidon, ve enni ko nang in keihi veithum tak na na jot mak kar je ar ning khuang noning ti ha aluijetjui. 62Han a man tualla a suak lungtok tak a achapjui.
Jisu Annuiso Anve
(Mat. 26:67-68; Mrk. 14:65)
63Hale Jisu a chur mingai ning nuiso mariam le kan ruaia, an lui ve jui. 64Anmanin Jisu a mit anhip pe bak an lui dingkel, ‘tu ning mo nang an na ve, riro’. 65Hale anmanin Jisu ha chongsia an kokjui.
Ulian rup Ma don na Jisu
(Mat. 26:59-66; Mrk. 14:55-64; Jhn. 18:19-24)
66Khua a hong var pha han, thianpulian le dan Oja ngai an kan chun na, Jisu ha chong jenna madonna an hong juangjui. 67‘Nang Khrista naninko keini jiang riro’, han Jisun alui sang, “Kei ning nang ni jiang kari aninnum, nang nin takngaino ni che u”. 68Kein nang ni jiang ka na dingkel aninnum nang nin nasang noni che u, 69“Tak-ha a tun tenna ko mi pasalnai ha chung nung Pathian chang tiang han om rang ani jui”. 70Han anmanin antiret, ‘aninko nang hi Pathian nai mo nani?’ Han Jisu ning a sang, “Nang ni ning keihi nannatijui”.
71Hava han anmanin an luiti, ‘hiva khella keinin imo kanlajet de rang? A ma mur tenna an phut keini ning kan jet jui’.
Currently Selected:
LUK 22: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
