MARK 10
10
Kansen Ruia Jisun A ri
(Mat. 19:1-2; Luk. 16:18)
1Jisu ning hava mun ha a mak Jordan tuidung akanna Judia ramtiang a che jui. Hale mitam an hong kan chun na a nuk anjuiret hale a man anga ngaija a tho chak anga anmani a man chu jui.
2Pharisi her khat ama jiang an honga ama hi an chang a mankhit thei na rang anmanin an dingkel; “Mi an khat in a numei a mak rang hi kan dan in ajotmo?” Naripero, anti.
3Jisu ning anmani jiang, “Mousi ning ija mo chong a na pek?” Tia a sang.
4Anmanin anti; “Mousi ning pasal an khat in a numei mak na rabu an khat a pek inko kansenpuirase, tia alui ti.”
5Jisu ning anmani jiang a ti; “Nang ni man chu nantatrei jarra hiva chongpekhi inaluipek ani. 6Tak-ha a phut na tak hingahin, ‘Pathian in pasal an khat le numei an khat a sin, chong thiang in a ti. 7Hiva jarra pasalin a nu a pa a mak a numei le a kan chunrang ani, 8han anmanin anni ning an khat jak an chang jui.’ 9Hava jarra Pathian ning i man chunsaha miring in mankansen ma rase u.”
10Anmani inn sunga an kir pha, thiamruoingain Jisu jiang hava chong chung chang a andingkelret. 11Jisu ning anmani jiang a ti; “Anumei a mak a numei dang a-ompui mi han a numei a enda va ka-alal ani; 12hava anga a lompa a mak pasal a dang a-ompuinu han a lompa a enda va ka-alal ani,” a ti.
Jisun Naipangai Phual Apek
(Mat. 19:13-15; Luk. 18:15-17)
13Mi aher khat in Jisu sitranga a kol la nai pangngai an lui hong tuang jui, tak-ha thiamruoingai han mingai ha an luiran, 14Aninnom Jisun a jet pha, a lung huilui, ngai jiang a ti; “Naipangngaiha kei jiang hong manhongru, khap maru, ajarko Pathian rengram ha anmani ranga ani. 15Kein adik tak ka na ripe ani, tu a chang innom Pathian rengram ha hiva nai pangngai an khat anga alui mak mi ha hava mun na lut tor chilnoning.” 16Hava suale Jisu ning naipangngaiha a kut akua an reng chunga a kut a siak, phual a pek jui.
A nei Mi Kan chong
(Mat. 19:16-30; Luk. 18:18-30)
17Jisu khuola che ranga a hong kan thok pha, mi an khat jana a honga a madonna a hong kunna, ama jiang, “A sat Oja, kum sot ring na kamutheina rang kein imo ki tho rang?” tia a hong dingkel.
18Jisu ning ama jiang “Ita mo asat ni nati? Pathian ni lui a asat tute om ma u. 19‘Mi thatmaro; ani lui chuan tho maro; leisei tho maro; na nu na pa chit jak neiro’; chong pek ngaiha nang in najetjui a ti pe.”
20Mipa han a sang, “Oja, hiva chong pek rakip ha nai pang ka chang lai an phut ka hong juisake”, a ti.
21Jisu ning ama a en na, alungsiatjui, ama jiang a ti; “Nang in an khat jak nalavat a om. Chero na nei rakip juar in lang, a riang khodengtheingai vasem pero, hale nang in chung van na sumle-sial na nei rang ke, hava suale hong nang kanuk na hong juiro.” 22Mipa han hiva chong hi a jet pha, amaisua amok, lung hui lui tak a a che jui, ajarko ama mipaha kan chong alui ni.
23Jisu ning a thiamruoingai a en na, anmani jiang a ti; “Mi kan chong ngain Pathian rengram lut rang hi i duk a tat jui mo ani.”
24Thiamruoingai han hava chong ri ha an ngak jui. Tak-ha Jisun anmani jiang a ti ret, “Naipangngai, kan chong adeingain Pathian rengram lut ranga i duk khan na a tat mo. 25Mi kanchong an khat Pathian rengram lut rang nek inko simphuai kuarra saringsei ning alutlam abeidet a ti.” 26Thiamruoingain hava chong ha an jet anngakrep, an khat le an khat ankandingkeljui, “Han ko tu ning mo kan san ring na an mu rang?” Tia an kanbiakjui.
27Jisu ning anmani a en na, anmani jiang a sang, “Hava ha miring ranga nitormak, tak-ha Pathian ranga ko i rakip anitorver,” a ti.
28Han Pitar in a hong ti, “keinin i rakip kanhongmak na nuk ka na hong jui ke,” a ti.
29Jisu ning anmani jiang a ti, “A thianga ka na tia ni, kei ranga le chongsat rang jarra a in alui, a nu, a pa, a sap a nai, a te a mak tor om ma u, 30tu a chang innom a tun miruol hin in le lui nu le pa, nai le te a khel det apekde rang ke; hava anga khodengthei a mu, hale a hong rang pha hin a man kum sot ring na nei rang ani. 31Tak-ha ma alui sat a tam lammin nuk kairang anni, hale nuk a kei a tam lammin ma luisat rang anni,” a ti.
Jisun A thirang Veithum Changna A ri
(Mat. 20:17-19; Luk. 18:31-34)
32Tun anmani Jerusalem tung na ranga an che jui. Jisun thiamruoingai a khel la an madonna a che jui, hale anmanin an lui ngakjuia, a nuk jui ngaiha an che jui. Hale somlei anni ngai ham an londet-a a tuanga, a chunga a hong suak rang omchan ha a ripejui, 33“Enru, keini Jerusalem tung na ranga kan che ani; hava han miring nai ha thiampulianngai le dan a theingai kut chunga peklutrang ani, hale anmanin that na ranga maral pek rang anni, jatdangngai kut chunga an pek lut rang ani. 34Anmanin nuiso nan ta chilthuan rang anni, hale venanta that rang anni, ni thum suale a thui khiret rang ke,” a ti.
Jems Le Johon Ning Anlamna
(Mat. 20:20-28)
35Jebedi a naingai Jems le Johon Jisu ma don tiang an honga, ama jiang an hong ri; “Oja, kein in nang jiang imo an khat kannalamhi na na thoperang kan dei,” anti. 36Jisu ning anmani jiang alui dingkel, nang ni jiang, “I mo ka na thoperang nan dei?”
37Anmanin an sang, “Lianpuina na rengram ma rengongna chunga na ongpha, an khat na chang tiang an khat navei tiang nang le kan ongsuam rang hi kan dei,” anti.
38Jisu ning anmani jiang a ti; “Nang nin nan na lam ha imo a chang jet mak che u. Ka in rang koklai ha nan in tor rang mo? Kein baptais ka tho ang hin nang ni nan tho tor rang mo?” A lui tipe.
39Anmanin “Kantor” tia an sang. Jisu ning anmani jiang a ti; “Adik, nang nin kei ka-in kok lai ha nan in rang ke, hale ka baptais tho anga nan tho rang ke. 40Tak-ha ka chang tiang le kavei tianga ongrang ha ko kein ki na pek tor rang nimak, ka Pan inasiakpe ngaiha nan tumrangke,” a ti.
41Thiamruoingai som han hava chong ha an jet pha, Jems le Johon chunga han an lung a thakjui. 42Tak-ha Jisu ning an renga a kui khomma a ti; “Jat dangai vai hom anga a om ngaiha ko anvai homna ngai chunga an Pathian achangai, hale lam a kei a lian tak an khat han an chunga chuan tho na ranak a nei, nang nin nan jet ani. 43Tak-ha nang ni karra ko hava ha nimak; nang ni karra a lian tak a chang an khat ha nan suak ichangrang ani. 44Hale nang ni karra tu-ang min a lutir chang jot mi han na suak ichang rang ani. 45Ajarko Mi Pasalnai ham sep a mankantho ranga i hong chang mak, a man mitam tak ngaihi san ranga alui hong ani alui ti.”
Jisun Bartimaios Mitdel A mandam
(Mat. 20:29-34; Luk. 18:35-43)
46Anmani Jerikho an hong jui; han Jisun thiamruoingai le mitam an kanruoi lai han, Timaios a nai Bartimaios anti ha lamsira a onga a kut a do a alui om. 47A man Nazaret Jisu achongjek a jet pha, a hong khekjui, “David nai Jisu; na lungsiatro,” a ti.
48Hale mitamtak in anranna, “Omchianro,” anti tak-ha a man adik khan akhekdet, “David a nai na lungsiatro,” a ti.
49Jisun angira, “Hongkuiru,” a ti. Anmanin amitdelpa jiang, “Lunghip lungdai tak ominlang, hongthuiro,” Jisun a na kui antipe.
50A man a puan a dengjuanna a hong kan thok Jisu jiang a hong jui.
51Jisun ama jiang, “Kei imo kinatho pe rang na dei tia ading kel?” Amitdel han alui ti; “Oja ken khuo, mu na neiretrong,” a ti pe ani.
52Jisun ama jiang a ti, “Chetaro, na takngai han a na mandamjui.” Hava lai tak han a man khuo a mu a lam han Jisu a nuk alui jui.
Currently Selected:
MARK 10: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
