MARK 15

Pilat Ma don na Jisu

(Mat. 27:1-2,11-14; Luk. 23:1-5; Jhn. 18:28-38)

1Jingtiang mantak thiampulianngai le ulianrupngai hale dan theingai an renga a rak tak an kan chun na an kan biak jui hale anmanin Jisu ha an khit ankeituara Pilat jiang an hong peklutjui. 2Pilat in Jisu ha chong a dingkel la, “Nang Jiwngai rengpa ha mo na ni?” Ati. Hale Jisun a sang, “Nang in na ti jui”, a ti.

3Thiampulianngain a man a samak hinga a ti tia anher ani. 4Pilat in Jisu ha ading kelret, “Nang in i om nasangno nichemo? Enro, na chunga masiatna rakip an hong choi ani,” a ti.

5Tak-ha Jisu ning chong i om sanglaimak, hava jarra Pilat in alui ngak jui.

Jisu Thinarang Chong pek

(Mat. 27:15-26; Luk. 23:13-25; Jhn. 18:39—19:16)

6Kanna-uth pha rakip mingain ren inn na an khit an khat Pilat in aluimasua chachak. 7Hava lai han lungkhur ren inn na Barabas anti mi ankhat lam kaingai a enda ruk a mi athatpaha alui om. 8Mitam ngaiha Pilat jiang an honga anga ngai a aluithochak anga mantho na ranga an hong dingkel. 9Pilat in a sang, “Jiwngai rengpaha kanmasua rang nan dei mo?” Atipe. 10Thiampulianngai Jisu chunga thangsiatna an nei jarra ama an hong pek lut ha Pilat in a jet.

11Tak-ha thiampu lianngai han mitamngai ha anmasiat, Barabas lam ha masu a ranga an lamjui. 12Pilat in anmani jiang a ti ret, “Jiwngai Rengpa anti ama hi imo kilorang?”

13Anmanin an khek, “Khros makhai a thatru,” anti.

14Pilat in anmani jiang, “Ijarra mo, a man ichuansiatmo a tho?” Atipe. Tak-ha anmanin a khel det an khek, “Khros chunga thatru,” anluitijui.

15Pilat in mitam lung mantairang lungdo mantungrang a dei jarra Barabas lam amasuape jui; hale Jisu ha a man a ve a khros chunga khai a that ranga a pek jui.

Ralmingaining Jisu Anuiso

(Mat. 27:27-31; Jhn. 19:2-3)

16Ralmingaining Jisu ha khopui sunga ankeilutjui. Hava ha tualmang ani hale ralmi rakipngai ha an kui khomchunjui. 17Hale anmanin puansen dup an khat anmansia, ling lu khu an khat ankualla a lu chunga ankhupejui. 18Hava pha anmanin chubeibuk an phut, “Jiwngai Rengpa, naringsei sotrase,” anti. 19Anmanin thingpum mola a lu han an ve anchil thuan na, an khup anbiling, an kun na chubei an buk jui. 20Anmanin an nuisoa, puansen dup ha alikpea, ama puan anmansi ret, khros khairanga ankaisuakjui.

Jisu Khros Ankhai

(Mat. 27:32-44; Luk. 23:26-43; Jhn. 19:17-27)

21Anmanin lam ma mi ankhat ram lak tenna an phut alui hong, Aleksandar ngai an pa, Sairini Simon ha annamchanna Jisu khros ha anmandomjui. 22Anmanin Jisu ha an tuanga, “Luroak”, anti mun, Golgotha anti ha antungpuijui. 23Hava ram ma han anmanin Myrh le ikanjel ju ha Jisu jiang an lui pek, tak-ha Jisun inpemak. 24Hale anmanin Jisu ha khros anhem mankhop a apuanha tu in mo itum rang tia rasi anenna an karra ankansemjui. 25Anmanin Jisu ha khros anhem mankhop ha jingtiang nidan kua pha ani. 26Achunga masiatna anpekha hinga anjiak, “Jiwngai Rengpa,” anti ani. 27Hale ama le kan ruaia arukmi anni, an khat a chang tiang, an khat a vei tiang khros ankhaidejui. 28A ma misamakngai le kan ruaia antelsa a om tia chong thianga a ti ha hingahin a hong tung jui ani.

29Hava sirra a omngai han Jisu an nuisoa an lu anbura anti, “A man biakinn aset tor pa nithumma asinkhir rangpa, 30nang na bing a kan san ring taro, khros an phut hongchumro,” tia antijui.

31Hava anga thiampulianngai le dan a theingai han Jisu an nuisoa an khat le an khat an lui kan biak, “A man midangko a san ring a tak a bing a ko kan san ring tor mak. 32Israel Rengpa, Khrista a tun hin khros an phut hongchumro, hava han keini om takngai na kan nei rang ani,” anti. Hale khros chunga ama le kan ruaia an khai a omngai ha nom ama ha annuiso ani.

Jisu A thina

(Mat. 27:45-56; Luk. 23:44-49; Jhn. 19:28-30)

33Sunchim lai tak anphut nidan anthum tenna ram pumpui chunga khuo a jing jui. 34Phadan an thum tanghin rasa a ring tak a khek, “Eloi, Eloi lama sabakthani,” hava tina ko, “Ka Pathian, ka Pathian, ita mo nina mak jui?” Atina ani.

35Asirra a ngirngai han an jet pha an lui ti, “Enru, a man Elija a kui,” anti.

36Mi an khat a tan na tuipompuan spon han darkha tui athur ha amanchop mol an khat amora athila ajup suale in ranga a pek a ti, “keinin man inrei. Elija a honga ama khros tenna an vasan rang mo ngakrei,” anti. 37Hale Jisu rasa a ring tak a khek-a, a ringkhuo a tor jui.

38Biakinn na puan duang puanjarha a chunga an phut thuoi tenna hernia a kan khuisenjui. 39Hale Jisu mai angatchak an ngir ralmi reakhat lamkei pa han aphuk atorha a mu a, “Adik tak hiva mipa hi Pathian Nai Pasal ha ani” a ti.

40Hava mun na an phut a lak tak a hong en numeingai, ankara han Meri Magdalen, matumtak Jems a nu le Josep nu Meri, hale Salomi anni. 41Anmanin Jisu ha Galili a-om lai an phut anhongsanna an hong jui ani. Hava mun han Jerusalem ma ama le an hong kan ruai numei a tam tak an lui om jui.

Jisu An phum

(Mat. 27:57-61; Luk. 23:50-56; Jhn. 19:38-42)

42Sernikhuo mandonna kan ningna nikhuo nitak a hong tung pha han, Arimathia Josep lungamtak a honga Pilat jiang Jisu aruok takluangha a hong lamjui. 43A ma hi chitjak rang om ulianrup an khat om Pathian rengram a hong tung rang a en chak a om an khat ani. 44Pilat in Jisu a thi jui tia jet pha, adik tak a thi jui mo tia a lung sunga a ngaidon na, reakhat lamkaipaha akuia, a thina a sot jui mo tia ading keljui, 45Reakhat lamkaipa jiang an phut Jisu ha a thi jui ti chong a jet pha, aruakha Josep jiang a pek jui. 46Josep in aruak takluongha akaithak ruipuan anemdak linen ruipuan anemdak an khat a hong choia achuna lunganphut than anchui an khat amanjaljui, hale thankot ha lung an khat in akhardejui. 47Hale Meri Magdalen le Josep a nu Merin takluong aruak anmanjal na ha an lui mu.

Currently Selected:

MARK 15: AIMOLBSI

Highlight

Copy