MARK 5
5
Jisun Thavang satlui a choi Pasal Khat A mandam
(Mat. 8:28; Luk. 8:26-39)
1Hale anmanin Galili patsir khattiang Gerasa ramtiang an hong jui. 2Jisu rokuang chunga a hong suak lim han thavang satlui ning a choi pasal an khat than tenna a hong suak ha alui kan tong pui, 3hava mipa a sunga thavang satlui a lut, thaan na omngai karra; thir rui ha nom tutening ankhittor lailui an khat ani, 4ajarko veisosom a kut a ke thir rui-a an khit an khum innom thir rui a bong a baija apot tanna, tu ning om ama ha lui khap tor ma u. 5Sun le jan na than karra a lon na hale tanga a khek, a tak a thei jak lunga akansuk khuia a om.
6A man Jisu ha a laak det an phut a hong mu, ama jiang a hong tanna a hong lut chubei ahongbuk, 7rasa a ring tak a khek, “Chung Nungtak Pathian nai Jisu, kei imo nina lorang? Pathian a ming kari chubei ka na buk, khodeng na man thei maro a ti.” 8A man hi a ti na ajarko Jisun, “Mipa tenna khonam ha chetaro”, alui tisa ani. 9Hiva jarra Jisun ama jiang, “Naming imo?” tia a dingkel la, a man a sang, “Kaming ‘a tam’ ani, ajarko a tam tak kan ni a ti.” 10Hale khonam han hava ram tenna a suak mak na rang Jisu jiang lam na a nei jui. 11Hava lai tak han voktamrup an khat hava tanghan ansella an lui om. 12Anmanin Jisu jiang, “Vokngai jiang son kan lut na rang natiro,” tia an ri. 13Hiva jarra a man a jot pe jui, khonamngai ha mipa an phut an suak vokngai jiang han an hong lut jui. Hale vokrup lising anni angduk ngaiha rolrap tiang an chumma tuidung sunga an tanna an lut jui.
14Vok a sel mingai han antaanna khopui sunga le khonai ngai jiang an hong ri manthangjui. 15Anmani Jisu jiang an hong pha, khonam ichoipa han puan asia a hui a a ong ha an mu pha, an renga an chitjui. 16Khonam a choi mipa chunga omchan le vokngai chunga i suak amungain omchan a suak ha an ri pe jui.
17Hava anmanin Jisu ha anramma an phut kalthon na ranga a hong ri jui.
18Jisu rokuang sunga a lut pha, khonam alui choi mi han “A ma le an kanruoi na rang arijui.”
19Aninnom Jisun jot pe mak ama jiang, “Na in na kirro, Puman nang hiva khan a na lungsiat, nang ranga chuan inathopehi hong man jetro a ti pe.”
20Hale ama a che Dekapolis a che Jisun ama ranga hokhanmo a tho pe ti chong a hong ri manthang jui; hale a jet rakip in anngakpet ani.
Jairos A nai Le Numei Khat Puan Sitna
(Mat. 9:18-26; Luk. 8:40-56)
21Jisun pat khattiang rokuang tenna akir ret jui. Hava pat sirhan mitamtak a sir a pang tang an kan chun jui han Jisu tuiong sirra alui om. 22kan chun na inn an khat chuanput Jairos Sainagok a a honga, a man Jisu ha a mu pha a ke kung a ahongbok, 23hale lungsiat tak ama jiang a ri, “Ka nai numeinai naipanghi thirang a tho jui, a dam na rang le a ring na rang hong in lang a chunga na kut na hong siakpero,” a hong ti.
24Hava pha Jisun ama le kanroi a an che jui.
Hale mipui in ama ha anhir ra an che jui. 25Kumsomleini khan thi a char khodengthei tak a dui a numei an khat alui om. 26Hale ama nu ha thiampu a tam tak jiang anenna a nei rakip a man lutsoa, hale asatpui nek ajual dedetjui. 27A ma nom Jisu chung changa chong alui jet, hava jarra a nuk tiang mi pui karra a hong jui, 28ajarko, “Apuan jak ken ka sit inko ka dam rang ke tia a ngaidon ani.”
29Amanom a puan a vasit pha han, a thi charha hava lai tak a bang jui. Hale a man han a dam ha a tak chung akanjetjui, 30hiva jarra Jisun a kan hei a mipui karra a ti, “Tu mo ka puan a sit?” ajarko hava lai tak Jisun a tho torna ranak a suak ha akanjetjui ani.
31A thiamruoingain ama jiang anluisang mi pui hivajat ankandenga ija mo annasit tia nan na dingkelhi?
32Tak-ha Jisun hava a tho mi ha amunarang a en ti tirra a om. 33Numei han a chunga omchan a suak ha akanjet, kan not tak-a a honga a mai kung a a hong kiak a ama jiang i rakip adik tak a arijui. 34Jisun ama jiang, “Kanainu na takngai in a na man dam jui ani; nanatna an phut dam innang lunghip lungdai tak chetaro,” a luiti pejui.
35Jisunhi arilaitak, Jairos a inn tenna chong choi mi her khat an honga, na nai ha a thi jui, “Oja irangamo vei khat khodeng man thei ret rang nati,” anti.
36Tak-ha Jisun an chong ri ha jet lui nunchan anga, ama jiang a hong ti, “Chitmaro, takjak takngairo.” 37Hava pha Jisun a nuk jui ranga Pitar le Jems hale a naipangpa Johon ni lui a tute jot pe lai mak. 38Anmanin Jairos in an tung pha Jisun an chap le an khek rasa a suak ha a mu jui. 39A ma insung a lut pha, anmani jiang a ti, “Ijarra mo nan chap a nanrasa a suak? Naipang nuhi a thi nimak, ijal ke,” a tipe.
40Han anmanin esella annuiso jui. Tak-ha Jisun anmani tual tiang anotchai-a naipangnu a nu le pa hale i hong kanruaipui ngai jak a tuanga naipangnu jalna han an che jui. 41Jisun a kut a o va a ti, “Talitha Kumi,” hiva tina ko “Dongmanu, ken nang jiang thuiro kati,” a tina ke ani.
42Hava lai tak han dongma nu ha a hong thuia alonjui, hava dongma nuha kumsom leini a tung mi ani. Anmanin hava chuan ha an mu pha a tam tak anleingakjui. 43Anmanin hava ha tute jiang anrimak na rang, Jisun chong a bejui, han naipangnuha chak rang imo khat pekru tia chong apejui.
Currently Selected:
MARK 5: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
