MARK 8
8
Milising Manli Jisun A vai
(Mat. 15:32-39)
1Hava lai han mi a tamtak an hong kan chun ret jui. Hale anmanin chak rang i om an nei mak pha han, Jisun a thiamruoingai akuia anmani jiang a ti, 2“Mipuingai ranga kaning a dong jui, ajarko anmani ni thum kei le kan hong kan ruai suomjui, a tun chak rang i om nei lai ma u. 3Kein anmani bu nekluia an inna ka man kir inko an che na lam ma pong rang anni, ajarko anmani aviar ko ram alaktak an phut an hong ke,” a ti.
4A thiamruoingain ama jiang anti, “Mi hivajat chak ranga tallom hiva ram sunga hin tunmo amutor rang tia anluisang.”
5Jisu ning anmani jiang a ti, “Tallom ijat mo nan nei tia ading kel?” Anmanin, “Tallom sari kan nei,” tia anluisang.
6Han Jisun mipuingai ha leipak chunga an ong na rang chong a pek jui. Hava suale a man tallom sari ha alui a Pathian manpak na anei a, a ekkhui a mi pui ngai jiang sem pe na ranga a thiamruoingai jiang a pek jui, hale a thiamruoingain an sem pe jui. 7Hale anmanin nga a sin a lek om an lui nei, Jisun hava ranga han manpak na a pek, hava ngaham sem pe na ranga thiamruoingai jiang chong a pek ret jui.
8An renga an chak ankhop ver jui. Anmanin an chak bang anoi ngaiha thiamruoingain anrut, luk sari a sip ani. 9han a chak mingai ha lising manliduk anni. 10Hale a man thiamruoingai le rokuang chunga a raktak an chuanga Dalmanutha ramtiang an che jui.
Pharisingaining Angakpa Ruia Andingkel
(Mat. 16:14)
11Pharisi her khat an honga Jisu jiang chong dingkelna an nei, anmanin an ensin na, chung vanna an phut jet theina an khat na man muro tia an hong dingkel. 12Jisu ning thavang ponga a lung sunga phuk a san na, “Tunna miruolngain ijarra mo jet theina an tok? A thiang a ka na ripe ke, tunna miruolngai ranga jet thei na pek lai noning,” a ti.
13Hi a ri le kan ruai a anmani a mak-a rokuang chunga varaltiang kanranga a che jui.
Pharisi Le Herod Chol
(Mat. 1:5-12)
14A thiamruoingain tallom choi rang an lui thei ni-a, rokuang chunga tal lom an khat jak an nei. 15Jisu ning anmani amanchua “Pharisi ngai le Herod ngai chol an phut kan ning thei unnang kerepru,” a ti pe.
16Hale anmani khat le khat an kan biak, “keinin tallom kan nei lailui jarra a man hi irike,” anti.
17Jisu ning an kan biaknaha a jet pha, “Tal a om mak jarra mo ijarra mo nang ni nan kan biak? Tun tunga la jet mak che u mo? Nan lung angara nan la om mo? 18Nang nin mit nan nei-a mu mak che u mo? Kuar nan nei a, jet mak che u mo? Hale langaidon phak mak che u mo? 19Mi lising ranga rang han tallom ranga kakhui pha han, a liam bang luk ijat mo anrut a ti pe?” Anmanin an sanga luk “Somlei anni” anti.
20“Hale mi lising manli ranga tallom sari kakhui pha han, aliambang luk ijatmo a sip nanluirut” atia Jisun dingkel. Anmanin sari tia anluisang.
21Jisun anmani a ti, “Tun tunga nang nin la jet makcheumo?”
Betsaida Hin Amitdel Pasal Jisun A mandam
22Hale anmani Betsaida an hong jui. Han mi a her khat in amitdelpa an khat Jisu jiang an hong tu-anga, a sit rang hi an dei. 23Jisu ning amitdelpaha a kut a kei a khuo varaltiang a tuanga a mit achil thuanpe-a, a chunga a kut a siak pe ama jiang, “I mo khat na mu tormo?” tia ading keljui.
24Mipa han khuo athira, “Ken mingai kamutor, tak-ha anmani thing kung a lon anga ka mu,” a tipe.
25Hale Jisun a mit ha asitperet. Hava suale mipa asat ni anga a en na, a mit a var jui, i rakip a thianga a mu jui. 26han Jisun mipaha, “Khuosunga lutmaro, na ina chetaro,” tia atirjui.
Pitar Ning Jisu Ruia A rimanthiang
(Mat. 16:13-20; Luk. 9:18-21)
27Hava suale Jisun thiamruoingai le Kaisaria Philippi-a khuo han an lui che. Jisun lam ma achena, thiamruoingai jiang ading kel, “Mingain kei hi tumo ani tia an nati?”
28Anmanin, “Mi a her khat in Johon Baptis na ni,” anti. Adang a her khat in; “Elija na ni,” anti; a dang a her khat in, “Tashanthei an khat na ni” anti.
29A man anmani jiang a dingkel la, “Nangninko kei tu mo ani”, nanati Pitar in a sanga, “Nang Khrista na ni,” a ti.
30Hava pha Jisun kei chung changa tute jiang rimaru, tia chong a pek jui.
Jisun Akhodengtheina le A thina rang A ri
(Mat. 16:21-28; Luk. 9:22-27)
31Hava han Jisu ning thiamruoingai jiang a ri, “Mi Pasalnai ha dan ojangai le, thiampulianngai le ulianrupngain jotnoniu, khodengthei na a tam tak duinata hale ama an that rang ani, hale ni thum suale ama a thui khir ret rang ke a ti.
32Hale a man a thianga a tia ni. Hale Pitar in ama a hong tuanga aranjui. 33Tak-ha Jisu a kan hei a thiamruoingai a en na Pitar aranna, “Seitan; kanuk tiang chero, Pathian i ngaidon ha ngaidon mak chea, miring ngaidonlam na ngaidon,” a ti.”
34Hava suale Jisu ning mipuingai le a thiamruoingai ha akola akuia anmani jiang, “Tu a chang innom mi an khat in kanuk anajuijot a tinko a bing jak ranga ngaidon ma rase, a khros kandom senlang, kanuk na jui rase. 35Ajarko tu a chang innom a ringkhuo akansanjot mi han imangrang hale keirang le chongsat rang jarra a ringkhuo a mang mi han kan san ring rang ani. 36Mi an khat in ramuol pumpui a tum achangvera, a ringkhuo a manmang aninko, ama ranga imo a nem na a om? 37Mi an khat in a ringkhuo le man kan thulnarang imo a nei? 38Tu a chang innom tunlai siat nale sat mak na miruol sunga hin keirang le ka chong rang jarra a na jakpui mi ha, Mi Pasalnai han a pa lianpui nale kan ruaia thaneithiangngai an hong pha anjak pui rang ani,” a ti.
Currently Selected:
MARK 8: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
