ADUNHEL 3
3
Kengkok Arleng Ihut Kime
1Inirsi ke kapingkit dam amun, lake baji kithom bak apun, Pitor po pen Johon po Arnam ahem kidam. 2Lalong Arnam ahem kidam abangyok kachohrek arleng ihut Kilang Me-at, kipu Owapo long arnita ponsi biman, ladi ihut kiplang para kengkok arlengyok owapo long horsi wano. 3Anang Pitor po pen Johon poyok Arnam ahem ayok kidam theksi, chohrek ayok chohang jongo. 4La-amun Pitor po, Johon po pen anangyok lang etsi pulo, “Haliyok lang ngot!” 5Lasi anang pene bak hlonge pusi chironsi, analiyok lang etsi dolo. 6Manta Pitor po anangyok pulo, “Ne long jat nohok ingjong, manta nelong pot do, bangpo nang pido; Najaret Jisu Khristo amen pen nang kengkam chijornot!” 7Aro ladi pusi anang ancho-ari long anangyok otsi pang thuro; aro la-amunsi anang keng aro akeng asek ajakong hlongo. 8Anang chonthelsi, anang arjapmo aro kengkam chijor-woro, aro anali pen Arnam ahemyok lut duno. 9Ahuwit arleng anangyok akeng kachijor aro Arnamyok kaparklam thekngo, 10aro anali anangyok chinilo, lake Arnam ahem Kilang Me-at Owapo long iningsi cho-hreksi kido; aro anangyok pot chiplango lamhel alam anali asombhik hlongo.
Pitor po Arnam Ahemlong Lam Kithan
11Arleng po, Pitor po aro Johon poyok chi-otsi kido amun, ahuwit arleng bismat pahlong si, Solomon po aganthik kipu alongyok anali dung katsi wango. 12Labang hel theksi Pitor po arleng helyok pulo, “Ei Israyel arleng hel, nali holek bismat pahlong do ma? Aro nali ke haliyok abithang jakong pensi anangyok akeng pachijoro pusi chironsi, haliyok piyokte lang-phrongsi do? 13La Jisu yok nali hutur arideng champilo, aro Pilat po anangyok kapajok kiron, anang ngot nali chikengke yongot, Abraham po, Aijak po, aro Jakup po Arnam, lake ili sar-lar hel Arnam, anang murkiya Jisu yok ajortang pilo. 14Manta nali kangthir aro dhorom ihut yok hoi chochesi, arleng kamari kanghu ihut poyoksi pajok aphan chihango, 15aro ajiu kapahreng un arlengpo yoksi nali mari lo. Arnam ke anang yok kithi para paburo. Labang hakhi aphan hali do. 16Aro anang menyok kikrol apotsi, anang labang amen pensi, labang arlengyok nali theksi chini do, anang yok ajakong pilo; aro anang kikrol apotsi nali ahuwit ango anangyok pame lo. 17“Aro minon ke O khoi hel, ne nali phu-phanghel kapatiki tol anat aro nali kithekthe anatsi labang hel tiki lo, ne than undo. 18Arnam anang Khristo aduk choye kipu turki hel aporong kipathan, bangpo ladisi pachokngo. 19La-anat neng chipharlep mot aro Arnam adung wang phakngot, tangsi anang nali pap hel ronne, 20ladisi Hemphu ango nengsam kido ayok, aro naliphan karwal Khristo yok, lake Jisu yok Arnam wang tolo, 21Arnam aporong para anang kangthir turki hel angho pensi jibak apor alam kipathan, ahuwit alam pangning phak aporyok, ethakpe long Jisu yok kachideng nange apor chokdo. 22Mosi po kipu, ‘Hemphu Arnam ke nali korte hel asitem para ne mat-mat ihut katurki paplange, anang naliyok jibak alam than, labang ahuwit nali onenot. 23Aro inghosi ajiu long la turkipo alamthe onene ye, anangyok Arnam arleng asitem para paprel detne.’ 24Aro la aparta Samuel po chengsi konbak turkihel kithan, labang ahuwit minon alam thansi kidam. 25Nali labang turkihel aso-asu aro nali agijing pen pirthepe ahuwit ajat bor-eh hlonge, labang alam Arnam Abraham poyok ladi pulo, ‘Aro nali sar-larhel jipe angton pangningo, nali la angton aso-asulo.’ 26Konam Arnam anang murkiya yok paplangsi nali abangten yok kasotonga para pharlepsi, bor-eh kipi yok, angoke nali dung anangyok wang tolo.”
Currently Selected:
ADUNHEL 3: AMRI-BSI
Highlight
Share
Copy
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
