JOHON 19

1Laparake Pilat po Jisu yok ponsi sabuk pen pasapmo. 2Aro sonturi hel ingsu pen phurkup otesi anang aphu long pa-iksi, aro anali hapek arohon chol akiding ape anangyok pa-ik ngo. 3Anali anang dung damsi, “O Jihudi hel arecho, ajiu pading nang!” aro ladi pusi anangyok ang-om ardep mo. 4Pilat po mokolyok damphaksi anali ayok pulo, “Langot, ne anangyok ado pahlong un-eh yong, bangpo nali kithan un ayok pusi, nali-ngo anang yok olesi wando. 5Lasi Jisu ingsu aphurkup pen hapek arohon chol akiding ape kachi-ik matmatsi wang pa-ole lo, Pilat po analiyok pulo, “Holek, labang arlengpo lo!” 6Konam bor-bangthe hel aro paton hel anang yok thekngo, “Kros long tarnot, kros long tarnot,” pusi anali hang solo. Pilat po anali yok pulo, “Nali bithang anangyok ponne kros tarpon not; piyok pu tene neke anangyok ado pahlong un-eh yong.” 7Jihudi hel ke anangyok pu phakngo, “Hali isi kanong do, labang kanong atengke anang thi hlonge; piyok pu tene anang abithangyok Arnam Aso chipudo.” 8Pilat po labang alampo arjusi, aro phere ongsi. 9Pilat po hempe yok lutdam phaksi Jisu yok arjulo, “Nang daklong para wang do?” Manta Jisu pudunde yongo. 10Lasi Pilat po anangyok pulo, “Nang neyok penebak alam thanthe ma? Nangyok kapajok une apharan do, aro nangyok kros kitar yokta apharan do, labang nang than un-eh yong ma?” 11Jisu anangyok pulo, “Arnam para apharan nang pipe lengke, ne phuthak katiki penebak apharan welo hoi; lasi, ingho nang arideng neyok champi detno anang papsi thechot.” 12La parake Pilat po Jisu yok kapajok awak kachiron, manta Jihudi hel hang dunsolsi pulo, “Nang anangyok pajok pu tene, nangke Sijar po yok kirung dunpo kalek. Ingho abithang yok recho pusi chipathe, anang ke Sijar po yok lang un-eh.” 13Konam lamehel alam arju hlongo, Pilat po Jisu yok mokolyok pawansi, Hibru alam penke Gabbatha kipu, ladi “Arlong aplang” along bisar ka-ote athem long iningo. 14Labang apor Kijoktang kamai kahonjok arni; aro anelo apun kido. Anang Jihudi hel yok pulo, “Langot, nali Recho po!” 15La-amun anali hangsol si pulo, “Mari not, mari not, anangyok kros long tarnot.” Pilat po analiyok pulo, “Nali Recho yok kros tar nange ma?” Bor-bangthe aghai hel pulo, “Sijar po parake hali kamprek recho ingjong.” 16Laparake Jisu yok kros kitar ayok, Pilat po anali arideng champi kuk ngo.

Jisu yok Kros Long Kitar

(Mot. 27:32-56; Mrk. 15:21-41; Luk. 23:26-49)

Lasi anali Jisu yok ensi pono; 17aro anang abithang aphang kros po parphang ponsi, Hibru alam pen ke ‘Golgotha’ puman, ladi isi ‘Aphu akhorlop’ kipu athem ayok ole pono. 18Lalong si anali anangyok kros long taro aro anang pen kamprek bang hi-niyok, lake li-li aga bang hi-niyok, aro asitem ke Jisu yok taro. 19Pilat po lamthe isi wilo, aro kros athak bilo. Lalong ladi alam kiwi, “Najaret Jisu, Jihudi hel Recho.” 20Labang lo Hibru, Romiya, aro Grik alam pen kiwi; piyok pu tene Jisu yok kros long kitar athempo rongpe para adung hol apot, Jihudi hel ako-ong arleng bangpo chiporhelo. 21Laparake Jihudi bor-bangthe hel Pilat po yok pulo, “Jihudi hel Arecho po, ladi alam wiyenot;’ manta ‘Ne Jihudi hel Arecho’ pusi arlengpo kipu, labang pone winot.” 22Pilat po pulo, “Pot si wilo, kiwi posi doye.” 23Konamsi sonturi hel Jisu yok kros long tardong si, anang kachi-ik pe-rik hel eno aro beng-phili otesi abangten icher-icher eno; aro cholpota ladisi ingholo. Labang cholpo arol wesi athak para alingyok kithak ape kido. 24Lasi anali ihut para ihutyok chipulo, “Bangpo ingsek nangnelo, manta ingho si hlonge la-anat aporman lang nang.” lake “Anali abithang adak ne kachi-ik pe-rik hel chithaksi eno, aro ne cholpo anat sang chilango,” kipu lo-kangthir alamthe kichok yoksi ladi chiplango. 25La-apot sonturihel labangmar asal tikilo. Manta Jisu kros kitar adung anang aipe, anang aipe amuso, Klopas po apiso Mary pe, aro Mary Megdalini pe arjapsi kido. 26Konam Jisu anang aipe yok, aro ingho adunyok anang nengdok kido, labang adun poyok adunghet arjapsi kido theksi, anang ai peyok pulo, “Ei arloso pe, langot, nang sopo!” 27Latangsi anang adunpo ayok ta pulo, “Langot, nang aipe!” La-apor para labang adunpo anang ai peyok abithang ahem yok pono.

Jisu Kithi

28Labang aphel, minonke ahuwit katiki chokphrot no, pusi Jisu than unsi, (lo-kangthir alam kichok aphan) anang pulo, “Ne lang-ik do.” 29Langpong isi hor akithor parjap kuksi kibi, lalong anali hor alang pholo pen pachamsi aro hisop akok pen ensi, angho long wetno. 30Konam Jisu hor akithor hlongo aro la aphel pulo, “Labangpo chokngo;” aro anang aphu chingkisuk si, ajiu chipek detno.

Jisu yok Arep Long Kijorplut

31La-arni Kachihonjok-arni apot, kisang-arni kithi arleng kros athak pado hlonghle yok (piyok pu tene labang kisang-arni ke Kachipek-adin kido,) la-anat anali akeng panghlok si, kithi abang hel papasun tol ayok Jihudi phu-phang hel Pilat po yok chinduk damo. 32Lapara ke sonturi hel wangsi, ango anang pen kros kitar, bang-hini arleng yok akeng hel panghlok ngo. 33Manta konam Jisu adung wango, aro la-amun anang kithi thekngo, anali anang keng panghlok-hle yongot. 34Layongta, sonturi ihut ke anang arep long tokan pen jorsi, anang arep long chango, aro lalong para awi aro lang wang jang penpano. 35(Inghosi thekngo, anang hakhi pilo, aro anang hakhi ke khanang; aro anang than-un, anang khanangpo thando, lasi nalita krol undo.) 36Piyok pu tene, “Kaita anang arupe panghlok-hle ye,” pusi lo-kangthir long alamthe kichok penyok labadi chiplango. 37Aro lo-kangthir prek along ke pudo, “Anali inghoyok joro, anangyok lang phronge.”

Jisu yok Thiri long Kibi

(Mot. 27:57-61; Mrk. 15:42-47; Luk. 23:50-56)

38Lamehel apot kachiplang aphel, Arimathiya rongpe long Jusep amen ihut Jisu adun, inghosi Jihudi helyok kaphere si Jisu adun chiplang jolsi kido, anang Jisu abangpo kipon yok Pilat po adung yok chihang damo. Pilat po hawang pilo; lasi anang Jisu abangpo pono. 39Nikodimas, kipu arlengpo, ango adak anuwe Jisu adungyok kidam, anangta wangsi, hijung pen sondon kapalok anempru abihini kilu thom-kep bak wano. 40Anali Jisu kithi abangpo ensi, Jihudi hel kibidam abipun badi, angnim abihini pen kang-ar ape pen pero. 41Minon ke aro daklongsi Jisu yok kros kitar, lalong barik isi kido; labang barik long ihut yokta kibibe akimi ahilik isi kido. 42La-arnike Jihudi hel Kachihonjok arni apotsi, labang adung hetne kido ahilikpo longsi Jisu yok bilo.

Currently Selected:

JOHON 19: AMRI-BSI

Highlight

Copy