JOHON 21

Jisu Bang Thorok-isi Adunyok Kachiklang

1Labang aphel Tiberiyas langpepe akung, Jisu adun hel yok chiklang phakngo; aro anang abithang labadisi chiklango. 2Simon Pitor po, Thomas po (jonja kipumanpo) aro Galili alongri Kana arong long kido Nathaniyel po, aro Jebedi po aso penso bang-hini, aro kamprek adun bang-hini, labang ahuwit ilong si kido. 3La-amun Simon Pitor po analiyok pulo, “Ne ok kirhiyok dam bang.” Anali anangyok pulo, “Halita nang pen dune.” Ladi pusi, anali olesi damo aro tilong athak arlulo, manta la-arni anuwe ok nepchet hlonghle yongot. 4La-aphel adap prang, Jisu langpe akung arjapsi dolo; yongta anangsi Jisu, puke adun hel pachini un-eh yongot. 5Lasi Jisu analiyok pulo, “Ei osohel, nalipen penebak kicho apot doma?” Anali anangyok pulo, “Ingjong.” 6La-amun anang analiyok pulo, “Tilong ancho-ari agak lanpo warnot, tangsi hlong pene.” La-amun anali lanpo warsi, ako-ong ok alin anat, lanpo aro hung ke rung un-eh yongot. 7La-amun Jisu nengdok adun hel, Pitor poyok pulo, “Anango Hemphu!” Anango Hemphu pusi Pitor po arjulo, pe-rik wephosi kido apot, anang pen hel chi-iksi, langpe long chon plupmo. 8Manta prek adun hel ke ok kiplengsop alanpo hung lensi, aso tilong pen wango; piyok pu tene anali bam para ingruk phoro hini bak akaholo badisi kido. 9Konam anali bam wang arlulo, lalong anali me angkri, aro la-athak ok kiphi aro him thekngo. 10Jisu analiyok pulo, “Minon hetsi konbak ok kinep, lalong parata wanot.” 11Lasi Simon Pitor po tilong arlu damsi, phoro isine kep phongone jon-thom ok akithe kangjang alanpo hung lensi aparyok wano; lalong la-an ako-ong ok kangjang yongta lanpo chingrakre yongot. 12Jisu analiyok pulo, “Wangot, wangcho not.” La-amun, anango Hemphu, pusi than-un si, “Nangke inghote?” puke karju ayok adun hel kaita chipaha un-eh yongot. 13La-aphel Jisu wango, aro himpo eno aro ok pota ensi analiyok pilo. 14Kithi hel asitem para kibur phak aphel, Jisu adun hel ayok bangpo pen phongthom chiklango.

Jisu Pen Pitor po

15Anali kichotang aphel, Jisu Simon Pitor poyok arjulo, “Ei Johon po aso Simon po, nang lamehel yokta neyok nengdok chotdo ma?” Pitor po anangyok pulo, “Oik, Hemphu, nangyok nengdok do, bangpo nang than-undo.” Jisu, anangyok pulo, “Ne bherabik asohel yok longpan not.” 16Phong-ni apor anangyok arjulo, “Ei Johon po aso Simon po, nang neyok nengdok do ma?” Pitor po anangyok pulo, “Oik, Hemphu, nangyok nengdok do, bangpo nang than-un do.” Jisu, anangyok pulo, “Ne bherabik hel al-en ponot.” 17La-amun phong-thom anang arjulo, “Ei Johon po aso Simon po, nang neyok nengdok do ma?” La-amun, anang bar-thom yok, “neyok nengdokdo ma?” Ladi karju apot, Pitor po aneng dohosi pulo, “Hemphu, nang ahuwit than undo; neke nangyok nengdok do, bangpo nang than undo.” Jisu anangyok pulo, “Ne bherabik hel longpan not. 18Khanangsi ne nali thando, nang riso amun, nang bithang amicheng chibamsi, daklongyok aneng, lalongyok kidam. Manta konam nang sare, la-amun nang ari jonge, aro bangsi nang amicheng bamsi, nang daklong kidam aneng ingjong, lalongyok nangyok nangpone.” 19Anang pot badi thisi Arnam yok jortang piye, bangpo abhu pahlong yoksi, anang labang alam thano. (lake Pitor po thisi aro Arnam yok jortang wane pusi Jisu kapaklang alam.) Ladi thansi Jisu anangyok pulo, “Ne phel-phel wangot.”

Jisu Pen Kamprek Nengdok Adun

20La-amun Pitor po mahang chirtingsi, ingho anuwe cho-jun along, Jisu adung chingkuksi, “O Hemphu, nangyok hutur arideng inghote champiye?” Labang alam karju, Jisu labang nengdok adunpo aphel-aphel kiwang thekngo. 21Pitor po anangyok theksi, Jisu yok pulo, “O Hemphu, labang arleng poke pot chiplange?” 22Jisu anangyok pulo, “Ne wangwe lengke anangta doye, ladi anengdo man tene, lalong nang pot choknge? Nang nephel-phel wangot.” 23La-apor, labang adunpo thitheye, pusi labang alam akorte hel asitem chithang detno. Yongta thitheye puke Jisu anangyok thanthe yong, manta “Ne wangwe lengke anang ke doye, ladi aneng do tene, lalong nang pot choknge?” 24Ingho lamehel alam hakhi pido aro labang ahuwit wilo, aro anang hakhi khanang pusi hali than un.

Kapajut Alam

25Holek lamehel aparta, Jisu aro ako-ong asal tiki lo; labang mar ahuwit isi isine kiwi det ayok dam pu tene, la-an lo choknge, ne kachiron badike, lateng alo pirthe dungsi ingjangje ye.

Currently Selected:

JOHON 21: AMRI-BSI

Highlight

Copy