TIENKAM 2
2
Masanbo Hiupuina Wangbo
1 #
Lev 23.15-21; Taj 16.9-11. Pentecost tingmikse wangtangboga, malum maidung hina pabam khatga wang aruang bamde. 2Siga simak-dakjiu tingpuk lamsuniu tingkai katanbo hunwangbo kumjiu paliu bambo kyse chakhuan khatniu phuiting mide. 3Siga chamipuang kumbo khatniu mai hina khuga niataobo paliuniu ngaode. 4Paliu mathiuse Masanbo Hiupuina niu phuimide khatdi Hiupuina siniu paliutu npao ngamra pikhaibo jengniu khatniu khat lad gasu npao sude.
5Sise Kadihpiri pabam machangna gasu tacheng matip maidung wang aruangbo bam, khatdi Jehudi mainiu lungbo bam Jerusalem si-e. 6Paliuniu haibo khuanse chiuboga maidung kakengkha wang maduide. Paliu mathiuse paliu suang hamide, palamra malum maidungse paliu lad lad gasu dinbambose chiu-e. 7Paliu suang hajiu paliuniu haichiu din-e, “Haichiujiu dinbam maidung haise Galilee maidung-e! 8Sichiusai dechiujiu aliu mathiuniu aliu dih lad ronna gasu dinbo chiubam jiulo? 9Aliu hai Parthia, Media, Elam, Mesopotamia, Judea, Cappadocia Pontus, Asia, 10Phrygia, Pamphylia, Egypt khatdi Cyrene mung Libia luongren gasu-e. Aliu khangsia maira Rome gasu-e, 11Jehudi maidung khatdi Nkeng maidung, Jehudi mai racheng lumaidung di-e, khatdi aliu khangsia maira Crete nai Arabia gasu-e; chiudi Tingwang niu tenkhaibo tiendi haigasu aliu mathiuniu aliu lad gasu paliuniu dinbambo hai chiude!” 12Maisuang haboniu phuilujiu paliuniu khat-khat khuga maniu sude, “Haise degu rambalo?”
13Chiudi khangsia maidung siniu, malum maidung situ nuimenjiu din-e, “Haise jawsak maniu maidung-e!”
Peter Niu Dinbo Cham
14Siga Peter niu ladlangtadmai khang kariu-je-khatkiu situ majang chapsu lujiu pakhuan tanjiu maidung khuga dinsude: “Singna Jehudi maidung nai Jerusalem ga lungbam mai naliu mathiu akhuan nking khailo, Iniu haibo rambase naliu khuga dinkhai bine. 15Naliuniu maningbo kumjiu maidung haise jaw sak maniubo makge, tuhoira nsuan wanchak chakiu ronna kha-e. 16Chiudi haise phaimiukakung Joel niu dinkhai mibo si-e:
17 #
Joel 2.28-32. “Tingwang niu din-e: haise Iniu kanambo tingmikga tenkhai rabo-e:
Iniu ahiupuina mai hina riga runkiu khaibine.
Naliu nahpui—nahpiudungniu aladse dinsune;
naliugu chabuan maidungniu madungao ngao sune,
khatdi kating maidung siniu chamang mansune.
18Yo, Iniu avangpiudung khatdi avangpuidung riga
sibo tingmik gase agu hiupuina runkiu khai bine, sichiujiu paliuniu aladse dinpad sune.
19Tinggen lamdi, kadihri gadi, Iniu maisuang kahabose kam khaine.
Siga tazai, chami khatdi mikhut padsune,
20siga naimikse tamiuwang mine, khatdi chahiuse tazai kumjiu hengwang mine,
Rapiu gu kadibo khatdi kendibo Tingmikse wangtang makhaga haidungse padsune.
21Sichiujiu Rapiu tu kumai hinatu gukhai bine.’
22“Singna--Israel maidung yo, haibo ladkengse hai nking khailo! Nazareth Jesu hai chamaina khatle sichiujiu pagu chara pumtan pen gasu tasibo khatdi maisuang habo tiendung hinase Tingwang niu pakhu gasu naliutu kamlen khaibi-e. Naliu pumsiakniu haise sijiu bambo-e, palamra haise naliu ruanggasu kamkhai mibo-e. 23#Mt 27.35; Mk 15.24; Lk 23.33; Jn 19.18.Tingwang niu pachun saisuijiu Jesu haitu naliu ben-ga pikhaira chapkhai mibo-e; sichiujiu naliuniu patuse nuan phungmai khuga pikhaijiu patuse jumasengjiu naliuniu kamshat mibo-e. 24#Mt 28.5,6; Mk 16.6; Lk 24.5.Chiudi Tingwang niu patuse kashaibo pumtan gasu phutkhai bijiu piringsu khai mibo-e, palamra kashaibo siniu patu bangman ngam makge. 25#T.Lui 16.8-11.Palamra David niu palamga haichiujiu dinmibo-e,
‘Pawan machang Rapiu tu Iniu ngao-e; pah akhuga manajiu bamme, siniu I magenthiu chariubo daolakge.
26Siniu achun wibo phui bamme, khatdi aladkeng hai ringaboniu phui-e.
I hai, hamirabo pum thiujiu bamdi, achun wijiu bamme,
27Palamra charuidihga atu phutkhai lakge;
navangtu charaw lungga piten khai lakge.
28Karingbo npuise atu lenkhaibi-e,
nangniu maluang khaibo jengniu, achun ringa saomakjiu bamme,’
29“Asingna maidung yo, Iniu naliu khuga aliu pao kadibo Chawang David lamga masanjiu dinkhaine. Pah shaimide khatdi patu nphum mide, sichiujiu parawse thainai tangbo aliu khuga bamme. 30#T.Lui 132.11; 2 Sa 7.12,13.Pahai phaimiukakung khatle, sichiujiu Tingwang niu paleng ladriat khaibo paniu si-e: Tingwang niu ladriat thiukhai-e, chiubora paniu David kaikik gasu David kumgapjiu chawang khat pithiu khaine. 31Tingwang niu pasai kana nde kamkhai ralo chiubose David niu ngao kamigu-e, sichiujiu paniu Messiah ringsu lanrabo lamga haichiujiu dinkhai mibo-e.
‘Patuse charuidihga phutkhai lakge;
paphawse charaw lungga tenmi lakge.’
32Tingwang niu haibo Jesu siaktu kashaibo gasu piringsu khai mibo-e, sichiujiu sibo lamga aliu mathiu hai lamchap-e. 33Patuse Papiu Tingwang ben jatlam piringsu khai mibo-e, khatdi paniu ladriat khaibo kumjiu paniu Masanbo Hiupuinase pakhugasu daolubo-e. Naliuniu tuhoi ngaobo nai chiubo haise paniu aliu riga runkiu khaibibo pagu kalen si-e. 34#T.Lui 110.1.Palamra tinggen lam khangbose David pah makge, chiudi paniu haichiu dinmibo-e,
‘Rapiu niu Arapiu khuga din-e:
Iniu nagu mikremai situ naphipan pithiu khai makthen,
35aben majadlam ntao bamlo.’
36“Sijengniu Israel maidung hinaniu haise masanjiu silulo chiubora naliuniu jumasengjiu kamshat mibo Jesu siaktu Tingwang niu pijiu Rapiu khatdi Messiah pithiu khai mibo-e!”
37Haise maidung siniu chiuboga paliu lung chariuboniu phuimide sichiujiu Peter nai ladlangtadmaidung khugase din-e, “Aliuniu degu kamralo singna maidung yo?”
38Peter niu paliu khuga din-e, “Naliu mai hina pa-nuan nuan gasu maripad lujiu Jesu Khrista zan gasu tadui nphum lulo, sichiusai naliu nuandungse kuak khai bine khatdi naliuniu Tingwang gu kalen Masanbo Hiupuina hai daolune. 39Palamra Tingwang niu naliuleng khatdi naliu nahdung leng khatdi pakhu gasu diujiu tadmibo mai hinaleng aliu Rapiu Tingwang pakhuga wangra ladrian thiukhai mibo-e.”
40Peter niu paliu khuga din-e khatdi ladkeng katam-tamboniu paliu khuga tanjiu din-e, “Kasabo maidung riga wangkinbo mathad gasu naliu mari lulo!” 41Maidung kakeng khaniu pachamse malum lujiu tadui nphum lude, khatdi sibo naise maidung sang sum kumbo paliu phom gase wangsan lude. 42Paliuniu ladlangtadmaidung khugasu katijiu chakin thiu khaide, khatdi chakin thiubogu maluad nai kakheng thiubo gase paliu chunkhat thiude.
Malum Maidung Gu Lunlung
43Tasibodung khatdi maisuang habodung wajiukha ladlangtadmaidung khugasu tenkhai-e, sichiujiu mai hina pingboniu phui mide. 44#Tk 4.32-35.Malum maidung hina chunkhat thiujiu chakin kawi thiujiu paliugu kabambo hina mathiugu thiujiu bamme. 45Paliuniu paliugu kabambo maniadung jonlujiu pageng bammaidung leng njan khaijiu bamme. 46Naimachangna paliuniu Charakyga phom khat thiujiu wang aruang-e, khatdi paliu ky-ky lam chunwijiu maluadse mai hina chunkhat thiujiu tiu machamjiu bamme. 47Tingwang tu thuonjiu mai hina chunchamjiu tiu aruang-ruang-e. Sichiujiu naimachangna Rapiu niu rankhai maidungtu paliu phomga pikhai san-sanjiu bamme.
Currently Selected:
TIENKAM 2: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
