TIENKAM 22
22
1“Apui nahmai Jehudi maidung yo, naliu suangga Iniu alam dinbo haitu naliu nking khailo!” 2Sichiujiu paniu paliu khuga Hebrew mai ladniu dinsuboga, paliuse maliu makjiu khatdi rim-rim miboga, Paul niu dinsude:
3 #
Tk 5.34-39. “Ira Cilicia ga bambo Tarsus gasu manabo, chiudi haibo Jerusalem gasu Gamaliel gu ariak nah thiujiu lungkhangbo-e. Sichiujiu thainai haiga bambo naliu mathiu kumjiu Idi aliu pao-peh maigu Tacheng-tajaise matipjiu katilubo khatdi Tingwang khuga kadkhai lubo mai-e. 4#Tk 8.3; 26.9-11.Sichiujiu haibo Npuiga tadmaidungtu Iniu kashaibo tangna kam mathad khai mibo-e. Iniu maipuidung tudi maipiudung tudi minlujiu kavangkyga bangkhai mibo-e. 5Iniu majibo cham hai din bamme chiubo Dibo Singku siniu khatdi Apaimai siniu sijiu bambo-e. Paliuniu Damascus ga bambo singna Jehudi maidung khuga chamlen raokhaibo Iniu paliu khugasu daobo-e, sichiujiu siga bam maidungtu minlujiu khatdi ratlujiu Jerusalem ga puiwang paliutu mathad khaira Iniu tadbo-e.
Paul Niu Lungli mibose Dinlenbo
(Tk 9.1-19; 26.12-18)
6“Sichiujiu Iniu Damascus manawang suboga, niending wan gase tingpuk lamsu pabiu ranranbo khatniu atu thao maguinuang mide. 7Iniu kadihga kaokiuboga, chakhuan khatniu akhuga haichiu dinbo I chiu-e, ‘Saul, Saul! Dekamjiu nangniu atu kam mathad kinjiulo?’ 8Siga Iniu maniu-e, ‘Rapiu nang saolo?’ Paniu akhuga din-e, ‘Ira nangniu kam mathad kinbo Nazareth Jesu si-e.’ 9Atu maluang tadkin maidungse pa-nbiu situ ngao-e, chiudi atu npaobo khuan sira chiumakge. 10Iniu maniu-e, ‘Rapiu yo, Iniu degu kamralo?’ Siga Rapiu niu akhuga din-e, ‘Sulujiu Damascus lam tadngut sulo, siga Tingwang niu maningbose nangniu kamra pakhiangna nakhuga dinkhaibi rabo-e.’ 11Pabiu ran-ranbo siniu amik ngaota mide, sijengniu atu maluang tadmaidung siniu aben julujiu Damascus ga ngutde.
12“Sibo namdi gase aliugu Tacheng-tajaiga pacheng matipbo piu pazanniu Ananias kubo Jehudi mai mathiuniu chakhuang thiubo piu siga lung bamme. 13Paniu amungga wang chaplujiu din-e, ‘Singna Saul yo, ngaomi sulo!’ Sibo wansiakga ngaolan mide sichiujiu Iniu patu phui-e. 14Paniu din-e, ‘Aliu pao-pehmai Rawang siniu pamaning kamra, pagu kamajibo Vangpiutu ngaolura, khatdi paniu dinbo pakhuan chiulura natu kadakhai mibo-e. 15Palamra nangniu ngaolubo khatdi chiulubose mai hina khuga nangniu jengdin thiurabo-e. 16Sijengniu dekamjiu tuhoi khuanbam ralo? Sulujiu tadui nphum sulo, khatdi na-nuanse kuaklura pakhuga kakheng thiululo.’
Nkeng maidung Khuga Dinronra Paul Tu Kubo
17“Iniu Jerusalem ga malanwang lujiu Charaky lungga kakheng thiu bamga madungao khat Iniu ngao-e, 18siga Rapiu niu akhuga haichiu dinbo I chiu-e. ‘Kalang sulo, Jerusalem tu kalangjiu phutkhai milo, palamra haiga bammaidung siniu alamga nangniu jengdin thiubo situ lukhai lakge.’ 19Siga Iniu paokakge, ‘Rapiu yo, Iniu maduikyga tadlujiu, natu malum maidungtu minlujiu dapbose paliuniu masanjiu sibamme. 20#Tk 7.58.Sichiujiu nagu jengdin thiubo Stephen tu kamshatra Iniu sui khaibo-e khatdi patu kamshat maigu fai-nidungse Iniu akhikhai mibo-e.’ 21Siga Rapiu niu akhuga din-e, ‘Tadsulo, Iniu natu Nkengmaidung khulam langkhai rabo-e.’”
22Paul niu haichiu dinbo katang maidung siniu nkingkhai lujiu, paliu khuan tanchang-tanjiu haichiu sensude, “Patu kam maha milo; patu kamshat milo! Pahai ringbamra buita mide!” 23Sichiujiu paliu makiak-marajiu, paliu faini thin kajitjiu khatdi tabui marajon sude. 24Rome maigu charipi siniu Paul situ riphendung bamga ju-ngut mira khatdi Jehudi maidungniu palamga makiak-marajiu bambo lamga dapjiu phiura chamtan pikhaide. 25Chiudi paliuniu patu dapra kamsuboga, Paul niu siga chapbambo chakampao khuga din-e, “Rome mai khang khattu ladjan thiumakjiu dapra naliugu tacheng-tajai siniu suima?”
26Haise chakampao siniu chiuboga, paniu charipi khugase tadlujiu maniu-e, “Nangniu kambambo hai degulo? Haibo piuse Rome mai-e!” 27Sijengniu charipi siniu Paul khuga tadlujiu maniu-e, “Nang hai Rome maima, akhuga dinkhailo?” Paul niu paokakge, “Yo.”
28Siga charipi siniu din-e, “Iniu rangkang kengkha pilujiu Rome mai khat thiumibo-e,”
Paul niu paokakge, “Chiudi Ira apui mana gasu-e.”
29Siga Paul tu chalad maniura maidungse pakhugasu sailam nkhinpad mide; khatdi charipi sidi Paul hai Rome mai-e chiubo silujiu paniu patu chagiriangniu ratman khai mibose maning khaiboga pingmide.
Paul Niu Apaimai Suangga Chapbo
30Jehudi maidung siniu dekamjiu Paul tu din masa bamjiulo chiubo simasan lura jengniu, pasaibo naise paniu Paul tu chagiriang ratman khai bambo gasu khipad lujiu, singkupaodung nai Apaimaidung situ wang maduira chamtan pikhaide. Siga paniu Paul tu julujiu paliu mathiu masuangga pichap khaide.
Currently Selected:
TIENKAM 22: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
