TIENKAM 28
28
Malta Ga
1Sichiujiu aliu rampum genlam npadkam lubo sai, sibo kadih situ Malta ku-e chiubo aliuniu silude. 2Siga lung bambo maidung siniu aliutu maluang mawi khaide. Tingriubo khatdi agibo donniu, paliuniu chami thiulujiu aliutu pi maga khaide. 3Paul niu tasing han khat ponwangjiu chami gase thonkhaijiu dikkhaiboga kaniu khat paben-ga kabetman mide. 4Siga lungbambo maidung siniu Paul ben-ga kaniuse maju bambo ngao lujiu khat khat khuga din-e, “Haibo piu hai maomakjiu chamaitu kagimai bam sune, sichiujiu paniu duipui gasu mari lujiu tadi, majibo ladjan siniu patu piring khaira suita mibo-e.” 5Chiudi Paul niu kaniu situ chami jiuga koina kajinkhai mide. 6Pahai menkhang nuangjiu shai khangrabo situ paliura phuijiu bamme. Chiudi pawan kathengkha khonkhang lubo sai pakhuga wadi padson makboga, paliu maningse kali lujiu haichiu din-e, “Pahai chara khatle!”
7Sibo bam gasu wathengkha makbo bamga sibo kadihgu chakampao Publius gu luzam khat bamme. Paniu aliutu wijiu lukhaide, sichiujiu aliuniu pakyga jengsum manai khaide. 8Siga Publius piuse kakhunjiu khatdi tazai-kana tamud-ra marajiu jibamniu-e. Siga Paul niu pazi gase tadlujiu kakheng thiujiu paben kaba khaijiu piwikhai bide. 9Haise padboga, sibo kadihga bammai maramai hinase wangde sichiujiu mathiutu wikhai bide. 10Paliuniu aliuleng kalen kengkha pikhai-e, sichiujiu aliuniu malee tuanglujiu tadsubo tingga aliugu tabin tadga pageng bambo hinadi paliuniu pikhai bide.
Malta Gasu Rome Lam Tadbo
11Sibo kadih gase chahiu sum sai chiubora tathe tinggase aliuniu bamkhai lujiu, Alexandria gasu “Taphinbo Ra”, kubo malee gasu tuanglujiu tadmide. 12Aliuniu Syracus kubo namdi gase wangtang lujiu siga jeng-sum manai khaide. 13Sigasu aliuniu malee tonglan lujiu Rhegium gu namdiga wangtangde. Pasaibo naise tingrun lamsu tingkai hunsu lande, sichiujiu jeng-nia lungga aliuniu Puteoli ga wangtangde. 14Siga malum maidung khangsiatu aliuniu adao-e, paliuniu aliutu nidkak khat manai khaira din-e. Sichiujiu aliuniu Rome ga wangde. 15Rome ga malum maidung siniu aliu wang bamme chiubo chiulujiu Appius gu Senky namdak nai Kiriuky Sum lamsu wangjiu aliutu adao-e. Paul niu paliutu ngaoluboga pachun wichang wide, sichiujiu paliu mathiu Tingwang tu thuonkiude.
Rome Ga
16Aliuniu Rome ga wangtangboga, Paul niu paronna lungjiu riphendung siniu patu khuanjiu bamra suikhaide.
17Jeng sum saiga, Paul niu siga lungbam mai Jehudi maigu jupaodungtu ku aruang khaide. Paliuniu wang maduiboga, paniu paliu khuga din-e, “Asingna Israel maidung yo, aliuniu pao-pehmai khugasu daolubo chengga maksai aliu khuga wadi kamaobo Iniu kammak tadi pijiu atu kavang thiu bambo-e khatdi Rome mai khuga atu haichiu pikhai bambo-e. 18Sichiujiu akhuga wa maniu lubo sai, Rome mai siniu atu phutkhai nibo-e, palamra Iniu shai buibo wadi kam makge. 19#Tk 25.11.Chiudi Jehudi maidung siniu haise suimakboga, wa kamaobo kammak tadi atu hai Wangdi khuga ladjan thiura langkhaibo-e. 20Sijengniu naliutu adao khaijiu npao khaira Iniu khengbo-e. Palamra, Israel maidunggu malumbo jengniu atu haichiujiu chagiriangniu bangkhai bambo-e.”
21Siga paliuniu pakhuga din-e, “Nalamga kasa dinbo maksai Judea lamsu wangmai siniu nalamga wa kasabo phungwang makge, maksai nalamga chamlen khatdi aliuniu daomakge. 22Chiudi nagu maning chamse nangniu dinbo aliu chiukhai ni-e, palamra naliuniu bambo phom haitu pabam hinaga din masa-e chiubo aliuniu si-e.”
23Sichiujiu paliuniu Paul tu naikhat dinriat lujiu chamai kengkha wang madui lujiu Paul niu bambo bam gase wangde. Nsuan gasu chawan tamiubo tangjiu paniu Tingwang gu chawangdih lamga paliu khuga katikhai sude, khatdi paliuniu Jesu lamga malum lura Mose gu Tacheng-tajai gasu khatdi phaimiukakung maidunggu Ariak gasu khoipadjiu dinlenjiu katikhai sude. 24Siga khangsia maira paniu dinbose malum mide, chiudi khangsianiu malum khai makge. 25Sichiujiu Paul niu chalad dinjiu malenna katikhai lubo sai, paliu karai chuncham tamijiu tadmide. Paul niu din-e, “Naliu pao-pehmai khuga Masanbo Hiupuina siniu dejiukha wijiu phaimiukakung Isaiah niu dinkhai milo! 26#Isa 6.9,10.Palamra paniu haichiu din-e,
‘Tadlujiu haibo maidung khuga dinkhai bilo:
Naliuniu nkingjiu bamme, chiudi silakge;
naliuniu phuijiu bamdi ngao lakge.
27Palamra maidung chun hai thiuta mide,
khatdi paliu kuonse makad mide,
khatdi paliu mikse kaba mide.
Sichiu maksai, paliu mikniu ngao lune,
khatdi paliu kuonniu chiu lune,
khatdi paliu chunniu silune,
sichiujiu akhuga malan wangjiu,
Iniu paliutu wikhai bine,’
chiujiu Tingwang niu din-e.”#Isa 6.9-10.
28Sichiujiu Paul niu haichiu munkom khaide. “Sichiusai, Tingwang gu juringbo champao hai Nkeng maidung khulam langkhai mine, chiubo naliuniu sirabo-e! Sichiusai paliura nking khai rabo-e.” 29(Paul niu haichiu dinkhai biboga, Jehudi maidungse paliu karai ari matan khangjiu npek mide).
30Palamra takum nia hai Paul niu paky man pijiu lung-e, siga patu adao khai nimai hinatu paniu lukhai-e. 31Paniu Rapiu Jesu Khrista lamga khatdi Tingwang gu chawangdih lamga huchang-hujiu, pakhen-pani thiujiu katikhaide khatdi dinron khaide.
Currently Selected:
TIENKAM 28: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
