TADPADBO 12
12
Kenpadbo Ngee
1 #
Lev 23.5; Par 9.1-5; 28.16; Taj 16.1,2. Egypt dihga Rapiu niu Mose nai Aaron khuga din-e, 2“Haibo hiu hainiu naliu lengra takumgu raithubo hiuse thiurabo-e. 3Katikhaibo cham hai Israel mai mathiu khuga dinkhai bilo: Haibo hiugu jeng riubo naise mai hinaniu milypoi khat maksai kamipoi khat paky-kyleng kada rabo-e. 4Pakikhunmai siniu chakhao khat tiukam laksai, pakining maipiu panainiu tiubuibo chakhao khat kada rabo-e. 5Naliuniu milypoi khat maksai kamipoi khat kadabo sui-e, chiudi sise pajam-para thiumakbo, takum khat tangmibo pachipoi rabo-e. 6Sichiujiu sibo hiugu jeng kariu-je-madaikiubo naise Israel mai hinaniu sibo khaodungse girabo-e. 7Maidung siniu gitiubo wakhao zai kasiase thinlujiu akham piga khatdi kamun-dengga manuk khai rabo-e. 8Sibo nai nchunse chamise rulujiu kakhabo piuniu nai chakhi jaomakbo taruakse tiurabo-e. 9Sise wadaodi magi tiubo maksai suangtiubo suimakge, chiudi pakhiangnase papeedi, pa-ngendi, palung jandi rutiu rabo-e. 10Naliuniu sise nsuan tangbo khai-nbambo suimakge, sise masiaksai rumi rabo-e. 11Naliuniu sise kalangjiu tiurabo-e, palamra naliuniu tadrabo tabin leng naliu phitop khairabo-e khatdi tathun mathun rabo-e. Haise Rapiu, atu chakhuang thiubo Kenpadbo Ngee si-e.
12“Sibonai nchunse Iniu Egypt dih pakhiangna rontadjiu npiu mainah nahrai hina, khaorui-khaona piangrai thubo pachi hina kamshatjiu, Egypt mai radungtu sajai pirabo-e. I hai Rapiu si-e. 13Kamun piga tazai siniu naliu lungbo kydungtu madan thiurabo-e. Iniu tazaise ngaoboga, Iniu Egypt maitu sajai piboga naliutu kenpad khai rabo-e. 14#Tad 23.15; 34.18; Lev 23.6-8; Par 28.17-25; Taj 16.3-8.Naliuniu haibo tingmik situ Rapiu, Iniu degu kam khailo chiubo maningtaojiu changi rabo-e. Wangrabo chaken hinaga haise naliuniu mania rabo-e.”
Chakhi Khaimakbo Taruak Ngee
15 Rapiu niu din-e, “Jeng chinnia lungga naliuniu chakhi khaibo taruak tiumak rabo-e--chakhi#12.15: Chakhi: Pajui khaibotu dibo-e. khaimakbo taruak ronna naliu tiurabo-e. Raithubo naise naliu mai hina ky gasu chakhi hina kam masan mirabo-e, mai khat kumboniu sibo jeng chinnia lunggase chakhi khaibo taruak tiusai, patuse amai-e chiubo lukhai lakge. 16Raithubo naise khatdi chinniabo naise naliuniu kahumra wang madui rabo-e. Sibo tingmik gase naliuniu changam khatdi kammak rabo-e, chiudi katiu-kasak leng macha rabo-e. 17Haibo ngeese kamjiu bamrabo-e, palamra haibo naise Iniu naliutu Egypt dih gasu puitad khaibo-e. Wangrabo chaken hinaniu haibo tingmik situ mania rabo-e. 18Raithubo hiugu jeng kariu-je-madaikiubo nai chawan gasu jeng makai-je-khatkiubo nai chawan tangbo, naliuniu chakhi khaibo taruak tiubo suimakge. 19-20Jeng chinnia lunggase chakhi naliu ky lungga khai nbambo suimakge, palamra padih-khun nah tadi, sangdiumai tadi chakhi khaibo taruak tiusai, patuse amai ruangga chakkhai lakge.”
Raithubo Kenpadbo Ngee
21Mose niu Israel maigu jupaodung hinatu kulujiu din-e, “Naliu mai hina milypoi khat maksai kamipoi khat-khat kada lujiu, sise kamshat lujiu naliu kikhunmai Kenpadbo Ngee hai kamsulo. 22Chahutang kamlujiu sise wakhao zai gase sumlujiu naliu ky kamundeng khatdi kamunpi hinaga manuk khai sulo. Sichiujiu mai khatdi nsuan tangbo kamalam tadpad mane. 23#Heb 11.28.Rapiu niu Egypt dihga rontadjiu Egypt maitu kamshatboga, paniu tazaise akham piga khatdi kamun-dengga ngaosai, pijiu Kashaibo maza situ naliu kyga ngutjiu kamshat khai lakge. 24Naliuniu khatdi naliu tah-nah mainiu haibo chengtu tingthengjiu majai rabo-e. 25Rapiu niu naliuleng pikhaine chiujiu riatkhaibo kadih gase naliuniu ngutbo tingga haibo rachengse majai rabo-e. 26Naliu nahmaidung siniu naliu khuga, ‘Haibo racheng rambase degulo?’ chiu maniubo tingga, 27naliuniu haichiu paokak rabo-e, ‘Haise Rapiu tu chakhuang thiubogu Kenpadbo Ngee si-e, palamra paniu Egypt dihga Israel mai ky dungtu kenpad khai-e. Paniu Egypt maitu kamshat mibo-e, chiudi aliu tura masiak khai-e.’”
Siga Israel maidung khudung kiujiu kahum sude. 28Sichiujiu Rapiu niu Mose nai Aaron khuga chamtan pikhaibo kumjiu paliuniu tadlujiu kamsude.
Nahrai Hina Shaibo
29 #
Tad 4.22-23. Chunding gase Rapiu niu Egypt dihga lungbo, chawang bam malin rabo chawang nah gasu, kavangkyga bambo npiumai nah tangbo kamshat sude; khatdi khaorui-khaonagu piangraibo pachi hinadi kamshat mide. 30Sibonai nchunse chawangdi pagu chakampaodungdi, khatdi Egypt mai mathiuse rakpad sude. Egypt dih pakhiangna kap marung sude, palamra mai khat kygadi shai makbo nah hamide. 31Sibonai nchun siak chawangniu Mose nai Aaron tu kulujiu dinsude, “Nanai khatdi Israel mai naliu mathiu tadmilo! Agu kadih phut milo, naliuniu khengbo kumjiu Rapiu tu kahumra tadsulo. 32Naliugu mily, kami khatdi khaorui-khaona hina puilujiu tadsulo. Alengdi thoidam wangra kheng khailo.”
33Egypt mainiu paliu kadih situ kalangjiu phutlu tadmi raleng khengjiu haichiu din-e, “Naliu tadmi maksai, aliu mathiu shaikam mirabo-e.” 34Sijengniu, Israel mainiu paliugu khanglise, chakhi khaimakbo takhui khailujiu khatdi paliu fainidung domlujiu phunglu tadsude. 35#Tad 3.21,22.Mose niu dinkhaibo kumjiu paliuniu Egypt maigu kachia-rangkang khatdi tatiu-tatah kheng sude. 36Rapiu niu Egypt maitu pijiu Israel maitu chakhuang thiu khaijiu paliuniu khengbo hina pikhai bide. Haichiujiu Israel mainiu Egypt maigu chakhiu-chalan phungtad mibo-e.
Israel Mainiu Egypt Dih Phutbo
37Israel mainiu Rameses gasu Sukkoth lam paliu phi kenpad sude. Siga maipui-mainahtu simakjiu, chamai 600,000 tadpadle. 38Chamai mendi khatdi milydung, kamidung khatdi khaorui-khaonadung kengjiu paliu saisui tadle. 39Paliutu Egypt dih gasu bungjiu hapad mibo jengniu, paliuniu kadenra maksai chakhi khaibo takhui kamra nanglak mijiu paliuniu Egypt dih gasu phungpadbo takhui gasu chakhi khaimakbo taruak khuak sude.
40 #
Chab 15.13; Gal 3.17. Israel mainiu Egypt dihga takum 430 lungkhai-e. 41Takum 430 loigapbo nai Rapiu maidung siniu Egypt dih phut mide. 42Sibonai nchunse Egypt dih gasu paliutu puipadra Rapiu niu phui bambo-e; sibonai nchun siakse Israel maidi Rapiu leng kadpadbo nai nchun chiujiu wangkinbo wan hina gadi phuijiu bam rabo-e.
Kenpadbo Ngee gu chengriak
43 Rapiu niu Mose nai Aaron khuga din-e, “Kenpadbo Ngee gu chengjai sira haichiu-e: Sangdiumai khatniu Kenpadbo Ngeegu katiu tiubo suilakge, 44chiudi naliu vang thiujiu bammai, naliuniu raijiu pagirom mibo mai sai, pah tiubo sui-e. 45Chabinmai maksai chaphi phimai siniu tiubo suilakge. 46#Par 9.12; Jn 19.36.Langlubo katiuse, kalangbo kilung gasu tiuloi rabo-e, lenlam ponpadbo suimakge. Khatdi khaoring gu parase wakhatdi kamtang mane. 47Israel mai hinaniu haibo ngeese kamsiak rabo-e. 48Chiudi pagi rommakbo mai khatniudi tiubo suilakge. Naliu ruangga sangdiumai wanglung lujiu, paniu Rapiu tu chakhuang thiubo Kenpadbo Ngee hai kamnisai, raijiu naliuniu pakikhunmai npiumai mathiutu chagi romkhai rabo-e. Sichiusai patudi Israel mai dih-khun mai khat kumjiu lukhaibo sui-e, khatdi changiboga jaobo sui-e. 49Haibo thiak-riak hai Israel mai dih-khunmai nai naliu ruangga wanglung mibo sangdiumai khuga machambo-e.” 50Sichiujiu Rapiu niu Mose nai Aaron khuga chamtan pikhaibose Israel mainiu majaijiu kamme. 51Sibo naise Rapiu niu Israel mai kiphiudung situ Egypt dih gasu maluangpad khai bide.
Currently Selected:
TADPADBO 12: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
