TADPADBO 14
14
Hengbo Duipui Kenbo
1Sibosai Rapiu niu Mose khuga din-e,
2“Israel maitu mariwangjiu Baal Zephon mungga bambo, Migdol nai Hengbo Duipui kakga bambo, Pi Hahiroth suangga pijiu riji thiu khaira dinbilo.
3Israel maidung ramjing ninggase tadron bamme chiujiu chawang siniu maning sune.
4Iniu patu palung pitan khaijiu, paniu naliutu hatad surabo-e, sichiujiu agu maken dibo siniu chari ngamjiu chakhuang thiubose chamtan-ga phungwang khaine. Sigasu I hai Rapiu si-e chiubo Egypt mainiu sirabo-e”. Paliu khuga dinkhaibo kumjiu Israel mainiu kamde.
5Maidungse pakmide chiubose chawang khuga paokhaiboga, pagu chakampaodung nai palung chunse kali mide siniu haichiu dinsude, “Aliuniu degu kammi jiulo? Aliuniu Israel maitu pipak mide, sichiujiu aliuniu aliu vangdungtu kam maha mide!” 6Chawang siniu pagu chaqon-kari khatdi pagu riphendungse kaden sude. 7Paniu pagu chaqon-kari hina khatdi withubo kai charuk sidi pagu chakampaodungniu thin lujiu hatad sude. 8Rapiu niu chawang lungchunse pitan khaijiu, chari ngamjiu#14.8: Chari ngamjiu: maksai Rapiu niu gukhaijiu chiubo-e. tadmi mai, Israel maitu hatad sude. 9Egypt maigu riphendung siniu paliugu chaqon hina, chaqon-kari hina thin lujiu paliutu hatadjiu, paliuniu riji thiu bambo Pi Hahiroth nai Baal Zephon kakga bambo, Hengbo Duipui mung gase hatang mide.
10Chawang nai pagu riphendung siniu paliutu hatad kinbose Israel mainiu ngaoboga pingchang pingjiu Rapiu khuga kheng sude. 11Paliuniu Mose khuga din-e, “Egypt kadihga charawbam hami jiuma? Haibo ramjingga aliutu pishai khaira nangniu puitadkin jiuma? Phuilo, nangniu aliutu Egypt dih gasu puitadbo ganiu degu padmilo! 12Haise pad makhaga, aliuniu nakhuga haichiu padrabo-e chiu dinmi makma? Aliuniu Egypt mai vang thiujiu bamdiak mira nakhuga dinmibo-e. Aliuniu haibo ramjingga shairabo suang, siga kavang thiujiu bammibo siniu wi-nkiu-e”.
13Mose niu paokakge, “Ping mane! Chaplujiu phuilo, thainai Rapiu niu naliutu gukhaira degu kam ralo; naliuniu haibo Egypt maidungtu wadaodi ngaolan lak mide. 14Rapiu niu naliuleng chari aphen khaibine, naliura mathingjiu bamrabo-e”.
15 Rapiu niu Mose khuga din-e, “Dekamjiu naliuniu nkha khaira leng kapbam jiulo? Maidung situ suanglam pitad padra dinkhai bilo. 16Nathunse duipui riga khengsu khai bilo. Siga taduise njanpad mine, sichiujiu Israel maidungse kasangbo kadih gasu tadngam lubui-e. 17Iniu Egypt maidung lungchun pitan khaijiu paliuniu paliutu hangut sune, siga Iniu chawang khatdi pagu riphen maidung, chaqon-kari nai sise tongkin maidung situ chari ngamjiu agu chakhuangthiubose daorabo-e. 18Iniu paliutu ngam luboga, Egypt mainiu I hai Rapiu si-e chiubo sirabo-e”.
19Israel mai riphen suangga tadkinbo Tingwang gu maza siniu sailam wangjiu tadsude. Kamuang tiangse Egypt mai nai Israel mai kakga wangtang makthen tadwang sude. 20Kamuang siniu Egypt maileng kam tamiu khai-e, chiudi Israel mailengra pabiu pikhai-e, sichiujiu riphendungse khat-khat khuga, nchunse wang manalu makge.
21Mose niu duipui riga paben kheng khangboga, Rapiu niu tingbang lamgu katanbo tingkaise duipui riga pi hunwang khaide. Haise nchun hunsangjiu duipuise kasangbo kadih thiu mide. 22#1 Co 10.1,2; Heb 11.29.Siga taduise njanpad mide, sichiujiu taduise jai-nialam kakhakdak padmijiu, Israel maidungse kasangbo kadih gasu duipuise ken taron mide. 23Egypt mainiu paliugu chaqondung khatdi chaqon-karidung hina thinlujiu duipui lunggase paliutu hangut sude. 24Tingben padsu raga, Rapiu niu kamuang tiang nai chami tiang gasu Egypt maigu riphendung riga phuikiuboga, paliu kapingboniu phui mide. 25Paniu paliugu chaqon-kari phise nphum khaijiu, paliu malai silak mide. Egypt mainiu din-e, “Rapiu niu Israel mai lam ponjiu aliutu chari thiu bamme. Haigasu aliu pakmikhe!”
26 Rapiu niu Mose khuga din-e, “Duipui riga naben khengsu khailan bilo, sichiusai taduise malanwangjiu Egypt mai riga khatdi paliugu chaqon-kari nai sise tong kinmai mathiu situ taduiniu naimi rabo-e”. 27Sichiujiu Mose niu duipui riga paben khengsu khaiboga, nsuan padgapda taduise kalu lun gase kalanwang mide. Egypt maidungse tadui gasu marira kamsude, chiudi Rapiu niu paliutu duipuiga thonkhai mide. 28Taduise malan wangjiu chaqon-kari khatdi sise tong kinmai, khatdi duipui lungga Israel maitu hangut mai hinatu khatna khatdi masiak makjiu taduiniu naimide. 29Chiudi Israel maidung sira duipui lunggasu kadih kasangga tadjiu, tadui siniu jai-nialam singbengniu dangkhaibo kumjiu tadpad mide.
30Sibo naise Rapiu niu Israel maitu, Egypt mai khugasu gukhaibi-e, sichiujiu duipui chaphuga paliu kashaibose Israel mainiu ngao-e. 31Rapiu niu pagu kendibo pumtanse thinlujiu Egypt maitu ngamkhaibo ngao luboga, Israel mainiu Rapiu tu pingboniu phuimide; sichiujiu Rapiu tudi, pavangpiu Mose tudi paliuniu malum mide.
Currently Selected:
TADPADBO 14: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
