CHABANGCHAM 12
12
Tingwang Niu Abram tu Kubo
1 #
Tk 7.2,3; Heb 11.8. Rapiu niu Abram khuga din-e, “Nagu kadih, nasingna khatdi napiuky phutlujiu Iniu natu lenkhairabo lamse tadsulo. 2Iniu nakai-kik kengkha pikhai bine, sichiujiu paliuniu kadibo jat khat thiurabo-e. Iniu natu thoikhai bine khatdi nazanse pidikhai bine, sichiujiu nang hai thoidam thiurabo-e.
3 #
Gal 3.8. Natu thoikhai mai hinatu Iniu thoikhai bine.
Chiudi natu siangbo mai hinatu Iniu siangkhai bine.
Sichiujiu napen gasu Iniu jat hinatu thoikhai bine.#12.3: Napen gasu...thoikhai bine; maksai Natu thoikhaibo kumjiu jat hinaniu paliutu thoikhaira akhuga khengrabo-e.
4Abram tingkum riakchinnia-mangiukiu tangmiboga, Rapiu niu pakhuga dinkhaibo jengniu Haran gasu tadpad sude; siga Lot di pasai suitadle. 5Abram niu panao Sarai, pasai kariupiu nah Lot, khatdi Haran gasu daolubo pakhiu-palan nai pavangdungtu puilujiu Canaan kadihlam jontad sude.
6Paliuniu Canaan ga wangtangboga, Shechem ga bambo masanbo bam, Moreh gu masanbo singbang wangtang makthen tadjiu bamme. (Sibo wan gase Canaan maidungse siga lungjiu bamniu-e). 7#Tk 7.5; Gal 3.16.Rapiu niu Abram khuga ngaolen khaijiu din-e, “Haibo kadihse Iniu nakai-kikdung leng pikhai rabo si-e.” Siga Abram niu Rapiu leng rathakbam khat thiukhai-e. 8Sibosai, maluangpoi khat bambo Bethel namdi gu tingrun lam, paniu pagu rijikyse tingnu lamniu Bethel, tingbang lamniu Ai kakga thiukhai-e. Sigadi paniu rathakbam khat thiukhaijiu Rapiu tu kahumde. 9Sigasu paniu pabam khat gasu khatga tadjiu Canaan gu tingrun lam tadkhai sude.
Abram niu Egypt ga
10Chiudi Canaan ga charakhum kadibo khat wangjiu Abram niu Egypt gu tingrun lam tadkiujiu siga pakak khat lungkhai-e. 11Paniu Egypt ramrai wangtang suboga panao Sarai khuga din-e, “Nang-hai nazu nalun wibo pui-e. 12Egypt maidung siniu natu ngaoboga, paliuniu natu anao-e chiusai, atu kamshat misune khatdi natura piring khai sune. 13#Chab 20.2; 26.7.Siniu nang-hai atanpui-e chiulo; sichiusai najeng gasu paliuniu atu akhi mawikhaijiu pi lungkhai sune.” 14Paniu Egypt ramrai ken-ngutboga, Egypt maidung siniu panao hai pazu-palun wi-e chiubo ngaolude. 15Chakampaodung khangsianiu patu ngaoboga, pahai pazu-palun dejiukha wilo chiubo chawang khuga paokhai-e, sichiujiu patuse chawangky lam puiwang mide. 16Pajeng gasu chawang siniu Abram tu akhi mawi khaijiu, milydung, kamidung, matom-kabuidung, qonniamdung, qontraodung khatdi kavangdung pikhai sude.
17Chiudi chawang siniu Sarai tu lulubo jengniu chararen kasabo pariga khatdi chawangkiningga bammai mathiu khuga Rapiu niu langkhaide. 18Siga chawang siniu Abram tu kuwang maniu sude, “Nangniu degu akhuga kamkhai jiulo? Pahai nanao-e chiujiu dekamjiu akhuga nang dinmak jiulo? 19Dekamjiu nangniu patu hai natanpui-e chiujiu pi atu anao leng lujiulo? Nanao haiga bam-e; patu puilujiu tadmilo.” 20Chawangniu pamaidung khuga chamtan pikhaijiu, paliuniu Abram tu khatdi panao nai pagu hina pikhaijiu paliu kadih gasu hathon mide.
Currently Selected:
CHABANGCHAM 12: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
