CHABANGCHAM 27
27
Isaac Niu Jacob Tu Thoikhaibo
1Isaac hai tuhoira tanpao mibo donniu pamik ngaota mide, Paniu panah katingpiu Esau tu kujiu din-e, “Anah yo!”
Paniu paokakge, “Hao, Apiu yo.”
2Isaac niu din-e, “I hai tanpao mide, siniu I shaiji mine chiubo nang si-e. 3Nagu tavaipi nai pathu thin lujiu, nkan-ga meng aleng wakhao khat kamwanglo. 4Iniu tiunibo tatekse langlujiu aleng ponwanglo. Sise Iniu tiulujiu, I shai makbo suangga agu kanambo thoidamse naleng pikhai diakne.”
5Isaac niu Esau tu npao bambo gase Rebecca nking bam-e. Sichiujiu Esau tathiu hara tadmibo tingga, 6paniu Jacob khuga din-e “Napiuniu Esau khuga haichiu dinbambo I chiu-e, 7‘Aleng tathiu kamlu wang langkhailo. Sise I tiulujiu, I shai makbo suangga, Rapiu suangga Iniu natu thoikhai bine.’ 8Rebecca niu dinlan-e, “Alad hai nking lujiu Iniu dinbo haise kamsulo. 9Kamidung ruangga tadlujiu pamai kawibo poinia kadalujiu wanglo, sichiusai napiuniu tiunithubo jaiga Iniu langkhai bine. 10Sise nangniu napiutu pitiu khailo, sichiujiu pah shai makbo suangga natu thoikhaibi rabo-e.”
11Chiudi Jacob niu papui khuga din-e, “Esau ra pagiu lung-e, chiudi Ira agiu lungmakge, chiubo nang si-e. 12Apiuniu atu kamedjiu, Iniu patu sonbo-e chiubo silusai, thoidam daobo sung tasiang hai ariga wangrabo-e.”
13Papuiniu paokakge, “Anah yo, nariga wangrabo siangse ariga wangbo thiumilo; Iniu dinbo kumjiu tadlujiu kamise akhuga juwanglo.” 14Sijengniu kamise juwang papui khuga pikhaide, sichiujiu papiuniu tiunithubo tatekse paniu langkhai bide. 15Sigasu paniu chakyga khaibambo Esau faini withubose khoilujiu Jacob tu piukhai bide. 16Paniu pawongchengga pagiu habo gase kami giuse guak khai bide. 17Paniu tiuwibo katiuse nai khuaklubo taruakse pakhuga pikhai bide.
18Sichiujiu Jacob niu papiu khulam tadlujiu dinsude, “Apiu yo!”
Paniu paokakge, “Yo, anah ruanggasu nang saolo?”
19Jacob niu paokakge, “I hai nanah katingpiu Esau si-e; nangniu dinbose I kamlude. Lungsajiu buangsu ntaolujiu Iniu phungwangbo mijan hai tiukhai sulo, sichiujiu nagu thoidamse aleng pikhai sulo.”
20Isaac niu din-e, “Anah yo, dechiujiu nangniu haijiukha jijiu daolu gulo?”
Jacob niu paokakge, “Rapiu na-Rawang niu atu nkha khaibo jengniu-e.”
21Isaac niu Jacob khuga din-e, “Lungsajiu akhulam wangmana khailo, I natu kamed mataine. Pachangjiu nang hai Esau ma?” 22Jacob niu papiu khulam ngutmana khaiboga, paniu patu kamedtao lujiu din-e, ‘Nakhuan sira Jacob khuan kum, chiudi namakhuak sira Esau makhuak kumme.” 23Paniu Jacob tuse silu makge, palamra pamakhuak hai Esau makhuak kumjiu pagiu thiu-e. Siniu pagu thoidamse pikhaira kamsude, 24chiudi maniulan-e, “Pachangsiak nang hai Esau ma?
Paniu paokakge, “Yo, I-ye.”
25Isaac niu din-e, “Chamijanse tamnakha ponwanglo. Iniu tiulujiu agu thoidamse naleng pikhaine.” Sichiujiu Jacob niu sise ponwang pikhaide, khatdi sak khaira jawdi tamnakha ponwang pikhaide. 26Sibosai papiuniu pakhuga din-e, “Anah yo, akhulam wangmana lujiu atu kapup khailo.” 27#Heb 11.20.Sichiu paniu wangjiu patu kupupboga, Isaac niu pafai pani-rai kasiu lujiu pagu thoidamse pikhai sude. Paniu din-e, “Anah rim haira Rapiu niu thoikhaibo luzam rimse kumme. 28Tingwang niu tingpuk lamsu naleng kajikdui pikiujiu nagu luzamse patam kawibo pithiu khailo! Paniu naleng miusy nai jaw kengjiu pikhaibo thiulo! 29#Chab 12.3.Jatdungse navang thiulo, khatdi maidung siniu namasuangga makhum kiujiu lunglo. Nasingna maidung riga nangniu mawanglo, khatdi napuiniu lungbo kaikik hina namasuangga makhum kiujiu lunglo. Natu siangbo mai hina tasiang daolo, khatdi natu thoikhaibo mai hina sanwibo thiulo.”
Esau Niu Isaac Gu Thoidam Khengbo
30Isaac niu pagu thoidam piloigap, khatdi Jacob niu tadpadmi gapboga, pachi Esau hai tathiu habo gasu malan wangde. 31Paniudi tiu kawibo katiuse langlujiu papiu khuga ponwangjiu din-e, “Apiu yo, lungsajiu buangsu ntaolujiu, Iniu naleng ponwangbo tatek hai tiulujiu nagu thoidamse aleng pikhai sulo.”
32Isaac niu maniu-e, “Nang saolo?”
Paniu paokakge, “Nanah katingpiu Esau si-e.”
33Siga Isaac pagiu kasamjiu khatdi papum pakhiang masandi-dijiu dinsude, “Sichiusai, chakhao khat gilujiu akhuga ponwangbose saolo? Namasuang siaknaga I tiulude. Iniu agu kanambo thoidamse paleng pikhai mide, sise tingthengjiu pagu thiumi rabo-e.”
34Haise Esau niu chiuluboga, palaipadjiu kap-marungjiu din-e, “Apiu yo, nagu thoidamse alengdi pikhailo!”
35Isaac niu paokakge, “Nasai kariupiu siniu wangjiu atu sonlude. Paniu agu thoidamse lutad mide.”
36 #
Chab 25.29-34. Esau niu din-e, “Paniu atu sonlubo hai lonnia mide. Pazan hai Jacob#27.36: Jacob: Hebrew ladga “Sontiubo” chiubo-e. chiu kubo hai asuang habogu makge. Agu naraibo kalek damse paniu lumide, khatdi tuhoi paniu aleng daorabo thoidamse lumide. Nangniu aleng thoidam khatnadi masiak khai makma?”
37Isaac niu paokakge, “Iniu patu nagu mawangpao thiura khatdi pasingna mai hina siniu pavang thiura thoikhai loimide. Iniu paleng tek, jaw pikhai mide. Tuhoira Iniu naleng wakhatdi kamkhai sonra hamide, anah yo!”
38 #
Heb 12.17. Esau niu papiu khuga khengjiu bam-e, “Apiu yo, thoidam khatnadi hami jiuma? Apiu yo, atudi thoikhai janlo!” Haichiu dinjiu pah kapsude.
39 #
Heb 11.20. Siga Isaac niu pakhuga din-e,
“Tingpuk gu kajikduise naleng hamide,
Kadihtam kawibo luzamse naleng hamide.
40 #
Chab 36.8; 2 Chaw 8.20. Naheng-nangiu gasu nangra lungrabo-e,
chiudi nasai kariupiu vang thiulo.
Chiudi nangniu suini makjiu atungbo gasu, pagu chamtan gasu nang mari lubui-e.”
41Esau niu Jacob tu mareng-e, palamra papiuniu Jacob tu thoidamse pikhai mibo jengniu-e. Haichiujiu paniu maning-e, “Apiu shaijiu kiu-huirabo tingse nawang mide, haise loigap dasai, Iniu patu kamshat mirabo-e.”
42Chiudi, Esau niu rangbambo hai Rebecca niu siluboga, paniu Jacob tu kulujiu din-e, “Kinglo, nachi Esau niu natu kam maha mira rangbam-e. 43Tuhoira Iniu dinbo hai kamlo, anah yo. Kalangjiu Haran lam, asingnapiu khulam tadsulo, 44siga nasingnapiu lungpom agikiu makthen pakak khat bammilo, 45sichiujiu nangniu pakhuga degu kamkhai milo chiubo paniu mangaimak thenna bammilo. Sichiujiu Iniu natu puiwang lanra mai khattu langkhai sune. Dekamjiu naikhat gasu Iniu anah kaniatu kam mahami ralo?”
Isaac Niu Jacob Tu Laban Khulam Langkhaibo
46Rebecca niu Isaac khuga din-e, “Esau niu sangdiumai liudungtu lubo jengniu I asang mide, khenglulak mide. Jacob niudi haibo Hitt mai liu khattu lulansai, I shairabo mide.”
Currently Selected:
CHABANGCHAM 27: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
