CHABANGCHAM 34
34
Dinah Tu Manomjiu Nimbo
1Naikhat Jacob nai Leah nahpui Dinah niu Canaan maipuidungtu phuira tadle. 2Sibo kyga chawang thiubambo Hiv mai Hamor nahpiu Shechem niu patu ngaolujiu, patu manomjiu nimkhai bide. 3Chiudi paniu sibo aliumai situ ngao mawikhai lujiu patu marai mide, sichiujiu paniu patu hiamsude. 4Paniu papiu khuga din-e, “Nangniu haibo aliumaina haitu anao leng lukhai rabo-e.”
5Jacob niu panah puitu kam mangam khai bide chiubo silude, chiudi panahmaidungse luzam lam pagu khaoruidungtu phuira tadmijiu, paliu wangmak then wadi kam makge. 6Shechem piu, Hamor siniu Jacob tu npaora tadsude, siga Jacob nahmaidungse luzam lamsu wang karen sude. 7Paliuniu sibo chamse chiuluboga paliu suang hamide, palamra Shechem niu Jacob nahpuitu nimjiu Israel maidung khuga kamangambo kamkhaibo jengniu paliu lung pomchang-pom mide. 8Hamor niu pakhuga din-e, “Anah Shechem siniu nanahpui situ marai mide, chalungsajiu patu pi magiang khailo. 9Naliu mai nai aliu mai tanao-tanah thiu akinrabo-e chiubo ladriandi aliu kamkhe. 10Sichiusai naliuniu aliu kadihga lungbo sui-e, naliuniu lungnibo bamga lungjiu, khenrang thiujiu chali-chala thiubo khatdi naliugu mania bambo sui-e.”
11Sichiujiu Shechem niu Dinah piu nai pasingnamai khuga din-e, “Haise aleng suikhailo, chiusai Iniudi naliuniu lunibo hina pikhaine. 12Naliuniu lunibo kalense akhuga dinlo, chamipui man lengdi naliuniu din kanithen dinlo; naliuniu atu pijiu patu magiang khaisai, naliuniu kakhengbose pine. 13Shechem niu paliu tanpui Dinah tu kam mangam mibo jengniu Jacob nahdung siniu Shechem nai papiu Hamor tu sonjiu paokak khai bide. 14Paliuniu pakhuga din-e, “Aliuniu aliu tanpui haitu pagi rommakmai khuga pimi khai silakge, sise aliuleng kamangambo gu-e. 15Nangniu namaidung npiumai hinatu pijiu paliu gi romjiu aliu kum lubui-e, sai aliu suirabo-e. 16Sichiusai aliuniu khat-khattu magiangbo sui-e. Sichiujiu aliuniu naliu khuga lungjiu naliu nai khat thiu rabo-e. 17Chiudi aliuniu kadinbo hai nangniu suimakjiu, chagi rom maksai, aliuniu patu puilujiu tadmine.”
18Haise Hamor nai panah Shechem leng kawibo thak kumjiu ngaokhai-e. 19Sichiujiu akhangmaina siniu dinkhaibose kalangjiu kamsude, palamra paniu Jacob nahpui situ marai-e, pahai pakikhun-gu kungthubo si-e.
20Hamor nai panah Shechem siniu namdigu rengmun gase tadlujiu, namdigu madui gase dinsude: 21“Haibo maidung hai chaka thiusuibo mai-e, pijiu paliutu haiga lungjiu paliuniu tadnibo bamga tadjiu pilung khai sulo. Kadih hai paliu lengdi disui bam-e. Aliuniu paliu nahpuidungtu lukhe, khatdi paliu lengdi aliu nahpuidungtu pijiu magiang khaikhe. 22Chiudi haibo maidung hainiu, aliudi paliu kumgapjiu aliu-gi romsai suirabo sangnu wakhatdi suilakge. 23Sichiusai paliugu kabambo khaorui hina khatdi mania hinase aliugu lakma? Sijengniu paliuniu aliu khuga lungra suikhai bikhe.” 24Sibo namdiga bammai hina siniu Hamor nai Shechem niu dinbose suijiu, npiumai hina paliu-gi rom sude.
25Jengsum sailam, mai hinase paliu-gi rombo jamthiu bamboga Jacob nah kania, Dinah piubo Simeon nai Levi siniu mai khattudi pijiu maning masakhai makjiu, panai heng thinlujiu namdiga bambo npiumai hinatu, Hamor nai panah Shechem tu tangna kamshat mide. 26Sichiujiu panainiu Dinah tu Shechem ky gasu puilujiu tadmide. 27Sichiu kamshat mibo sai, Jacob nahdung kakimaidung siniu paliu tanpuitu kam mangam khaibogu chakhum ruibo thiujiu namdigu mania sutra tadlande. 28Paliuniu namdiga khatdi luzamga bambo matom-kabui, khaorui khaona, qonniam khatdi wahina lutad mide. 29Paliuniu maipui-maina hina khatdi paman kungbo mania hina lutad mide.
30Jacob niu Simeon nai Levi khuga din-e; “Nanainiu atu kam chariu khaide, palamra tuhoi gasu Canaan maidung, Periz maidung khatdi haibo kadihga lungbambo mai hinaniu atu mareng mine. Ira amai kengmakge, paliu mathiu khat thiulujiu atu charithiu susai, akinamai mathiu harabo mide.”
31Chiudi panainiu paokakge, “Aliuniu aliu tanpuitu papum kajonpuitu kumjiu kambo hai khengngam lakjiu-e.”
Currently Selected:
CHABANGCHAM 34: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
