CHABANGCHAM 41
41
Joseph Niu Chawang Mang Ramba Din Chalipadbo
1Tingkum nia saiga, Egypt mai wangpiuse pamang lamsu Nile Giuki mungga pah chapbamboga, 2pamai kawibo khatdi lan-lanbo matompui chinnia padlujiu piubuan tagi bambo ngao-e. 3Sigasu pamai kasabo khatdi paraku ronna bambo tompui chinnia padlan-e. Paliuniu padlujiu karaibo tompuidung munggase chapbam-e. 4Sichiujiu pamai kasabo tompuidung siniu pamai kawibo tompuidung situ tiulude. Siga chawangse rakkhang mide. 5Paniu jipkiu lande, siga katambo mang khat manlan-e. Chamiubui kawibo min-majin bambo kuon chinnia tang khatga ngao-e. 6Khatdi chamiubui kasabo, kajaitao mibo kuon chinnia ngao-e, 7sichiujiu paniu phuibamga, chamiubui kasabo kuon chinnia siniu kawibo kuon chinnia situ kajong lude. Chawangniu buangsu lujiu paniu manbo mang situ makum sude. 8#Dan 2.2.Nsuanse chawang palung magenthiubo siniu phuilujiu, Egypt dihga lungbo ningting maidung nai chamik thao-kadad maidung situ kusude. Pamangse paniu paliu khuga dinkhaide chiudi paliu mai khatniudi parambase pakhuga dinkhai ngam makge.
9Siga jaw thinpao siniu chawang khuga din-e, “I maosiak mide chiubo thainai I din madu rabo-e. 10Nalung pomjiu nangniu taruak khuakpao anaitu chawangky khuanbo charipigu kavangkyga anaitu khai mibo-e. 11Naikhat nchunra anai khangniase chamang mande, sichiujiu paramba hai tam-tamme. 12Siga charipigu vangpiu, Hebrew mai nah khangkhat bamme. Anai mangse pakhuga dinkhaiboga paniu parambase anai khuga dinkhai bide. 13Paniu dinkhaibo kumgapjiu padmide, nangniu abamse pikhai lan-e, chiudi taruak khuakpao situra kamshat mide.”
14Chawangniu Joseph tu kuraleng langkhai sude, sichiujiu patuse kavangky gasu kalangjiu puiwangde. Paniu pamun-giu gotlu, khatdi pafai-pani kali lujiu chawang khuga wangde. 15Chawangniu pakhuga din-e, “I amang khat man-e, sise mai khatniudi paramba dinngam makge. Nangra chamangdung ramba dinpad ngam-e chiujiu mainiu akhuga din-e.”
16Joseph niu paokakge, “Ira ngam lakge, Pakendibo piu yo. Chiudi Tingwang niu kabuibo rambase pikhai sune.”
17Chawangniu dinsude, “Iniu Nile Giuki mungga chap bambo man-e, 18sichiujiu matompui pamai kawibo khatdi lang-langbo chinnia padlujiu singgiu hugen gase tagi bam-e. 19Sigasu katambo matompui pamai kasabo khatdi parakuruang ronna bambo chinnia padle. Sikumbo tompuidung maisiat kasase Iniu Egypt dihga ngao matai makge. 20Pamai kasabo tompuidung siniu pamai kawibo tompuidung situ tiulude. 21Chiudi sise mai khatniudi simakge, palamra paliuse kalu kumgapjiu paliu-mai sa-palun-e. Sibo sai I buangsu mide. 22Sibo sai, Iniu chamiubui kawibo min majin bambo kuon chinnia patang khatga masi bambo mang mandai-e. 23Sigasu chamiubui kasabo, kajaitao mibo khatdi pareng ronna bambo kuon chinnia ngao-e. 24Sichiujiu chamiubui kasabo chinnia siniu kawibo kuon chinnia situ kajong lude. Iniu haise chamik thao-kadad maidung khuga dinbo-e, chiudi paliu mai khatniudi paramba din ngam makge.”
25Joseph niu chawang khuga dinsude, “Mang nia haise khatnakha-e; Tingwang paniu kamrabose nakhuga dinkhai bibo-e. 26Pamai wibo tompui chinnia hai tingkum chinnia-e, khatdi chamiubui kawibo kuon chinnia sidi tingkum chinnia-e, niase paramba macham kamme. 27Pamai sabo tompui chinnia nai ruangmibo miubui chinniase charakhum wangrabo tingkum chinnia si-e. 28Haise Iniu nakhuga dinkhai mibo kumjiu, Tingwang niu kamrabose nakhuga lenkhaibo-e. 29Egypt dih pakhiangna tingkum chinnia hai katiu-kasak kengchang kengrabo-e. 30Sibo sai, tingkum chinnia hai charakhum kadibo wangrabo-e, sichiujiu kawibo tingkum situ mangaimi rabo-e, palamra charakhum hainiu kadih haitu kam mahami rabo-e. 31Sichiujiu katiu kengbo wan haitu mangaijing mirabo-e, palamra charakhum kadibo wangrabo-e, sichiujiu chariuchang chariusu rabo-e. 32Nangniu manlon niabo sira Tingwang niu riatkhai mibo-e, sichiujiu haise padji surabo donniu-e.
33“Tuhoira nangniu ningtingmai khatdi wa-kasimai khattu kada lujiu haibo kadih haitu phuira kamlulo. 34Chakampaodung tudi khangsiatu kada lujiu katiu kengbo tingkum chinnia lunggase padam mangiugu dam khatse khom maduira lengdi nangniu kada khai rabo-e. 35Sichiujiu wangkinbo kawibo tingkum lunggase katiu hai khom madui lujiu sise namdi hinaga baikhai lujiu, sise khuanra paliutu chamtan pikhai bilo. 36Sichiujiu tingkum chinnia sai, Egypt dihga wangrabo charakhum lunggase katiuse njankhai lubui-e. Haichiusai maidungse kami mijiu shai lakge.”
Joseph Tu Egypt Dihgu Dihthinpao Pithiu Khaibo
37Chawang nai pagu chakampaodung siniu haibo chamse suijiu lukhaide, 38khatdi paniu paliu khuga din-e, “Tingwang hiupuina bambo Joseph suang kawibo kakimaitu aliuniu daolakge.” 39Sichiujiu chawangniu Joseph khuga din-e, “Tingwang niu pakhiangna hai nakhuga lenkhaibo-e, sijengniu nang hai mai hina suang ningting bamme khatdi mai hina suang khaoti-e. 40Iniu natu agu kadihgu papao pithiu khai bine, sichiujiu amai hina siniu nagu chamtan majai rabo-e. Nagu pumtan hai ahangnaga bamgap rabo-e. 41Tuhoi gasu Iniu natu Egypt dih pakhiangnagu dihthinpao pithiukhai mibo-e.” 42#Dan 5.29.Sichiujiu chawangniu pagu madan diangbo njungkhapse paben gasu khoipad lujiu Joseph njungga khai bide. Paniu fainoi ntiang kawibo khat pi-ntiang khai lujiu, pawong gadi kachia tiuriang khat matiukhai bide. 43Paniu chawanggu niabo chaqon-karise tongra patu pikhaide, sichiujiu patu chakhuang thiubo maluangtad kam khaijiu, haichiu senjiu pitad khai-e, “Npui marelo!” Npui marelo!” Sichiujiu Joseph haitu Egypt dih pakhiangnagu dihthinpao pithiu khaide. 44Sichiujiu chawang siniu pakhuga din-e, “I hai chawang si-e, chiudi nangniu suikhaibo makjiu Egypt dihga mai khatniudi paben maksai pangen khengkhangbo suimakge.” 45-46Paniu Joseph tu Egypt mai zan mathak khaijiu, Zaphenath Paneah chiujiu kukhaide. Khatdi panaoleng Heliopolis namdigu phaimiupiu, Potiphera nahpui Asenath tu pikhaide.
Egypt mai wangpiu ngam paniu kamsubo gahai Joseph tingkum samriu tang mide. Sichiujiu paniu chawanggu ladzanky saokhai lujiu, kadih pakhiangna rontad sude. 47Katiu kengbo tingkum chinnia lunggase Joseph niu katiuse khalujiu namdidung gase khai makhuan sude. 48Sichiujiu namdi hina gase pamungga bambo luzam gasu lulujiu baikhai karen sude. 49Miusy hai kengju mibo jengniu, Joseph niu wa madatson makge, haise duipuigu nbuiniang kum mibo-e.
50Charakhum hai wangmakbo suangga Asenath khugasu Joseph nah khangnia lungkhaide. 51Paniu din-e, “Tingwang niu, amagenthak hina khatdi apiu kykhun mai hinatu pimangai khai bide,” sichiujiu paniu panah katingpiu zan Manasseh#41.51: Manasseh: Hebrew ladga “pi mangai khaibo” chiubo-e. chiujiu mathak khaide. 52Paniu haichiu dinlan-e, “Iniu chariu magenthiubo kadih gahai Tingwang niu aleng nahmaidung pikhai bide,” sichiujiu paniu panah niabo piu zanse Ephraim#41.52: Ephraim: Hebrew ladga “nahmaidung pikhaibo” chiubo-e. chiujiu mathak khaide.
53Egypt dih gahai katiu kengbo tingkum chinniase loilujiu charakhum wangbo tingkum chinnia hai wangsude. 54#Tk 7.11.Joseph niu dinmibo kumjiu Katam tambo kadih hina gadi charakhum hai wangsude, chiudi Egypt dih gara katiu hai bamme. 55Egypt maidung siniu katiu hajiu makim subo tingga chawang khuga katiu kheng sude. Siga chawangniu paliutu Joseph khulam tadra khatdi paniu dinbose kamra chamtan pikhaide. 56Charakhum hai sabi-bi khangjiu kadih pakhiangna magenthiu sude, siga Joseph niu chabowky hina lekhaijiu, miusy hai Egypt maidung khuga jonkhai sude. 57Kadihpiri pakhiangna gasu katiu liura Joseph khuga wang sude, palamra pabam hinaga charakhum hai sachang sajiu wang sude.
Currently Selected:
CHABANGCHAM 41: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
