CHABANGCHAM 46
46
Jacob Nai Pakikhunmai Egypt Dihlam Tadbo
1Jacob niu pagu bambo hina kaden lujiu, papiu Isaac Rawang tu kahumra, Beersheba lam tadsude. 2Nchunse Tingwang niu patu ngaolen khaijiu kusude, “Jacob, Jacob!”
“Yo, haiga I bam-e,” chiujiu paniu paokakge.
3Paniu din-e, “I hai napiu Rawang, khatdi Tingwang si-e. Egypt dihlam tadra manang tulo. Iniu siga nakai-kikdung situ kadibo jat pithiu khai bine. 4Iniu Egypt dihlam natu maluang tadne, khatdi nakai-kikdungtu haibo kadihga maluangwang khai lanbine. Nang shaibo nai Joseph niu natu maluang bamne.”
5Jacob niu Beersheba gasu tadpad sude. Panahmaidung siniu patu khatdi paliu nao-nahdungtu Egypt mai wangpiuniu pikhaibo talai gasu ponlujiu tadsude. 6#Tk 7.15.Paliuniu Canaan dih gasu daolubo khaorui-khaonadung hina khatdi mania hina phung lujiu tadpad sude. 7Jacob niu patah-panahdung khatdi pakaikikdung hinatu maluang lujiu tadpad sude.
8Jacob kykhunmai, patu Egypt dihlam maluangtad maidung sira panah tingthubopiu Reuben, 9khatdi Reuben nahdung: Hanokh, Pallu, Hezron khatdi Carmi. 10Simeon nai panahdung: Jemuel, Jamin, Ohad, Jachin, Zohar khatdi Canaan maipui nah Shaul. 11Levi nai panahdung: Gershon, Kohath khatdi Merari. 12Judah nai panahdung: Shelah, Perez khatdi Zerah (Judah nahdung kakibo siniu, Er nai Onan hai Canaan gasu shaimibo-e) Perez nahdung siniu Hezron nai Hamul. 13Issachar nai panahdung: Tola, Puah, Jashub khatdi Shimron. 14Zebulun nai panahdung: Sered, Elon, khatdi Jahleel paliu-e. 15Haibo nahdungse panahpui Dinah jaojiu Leah niu Mesopotamia ga Jacob leng lungkhaibo-e. Leah niu lungbo kaikikdung hai pakhiangna samriuje-sumkiu-e.
16Gad nai panahdung: Zephon, Haggi, Shuni, Ezbon, Eri, Arod khatdi Areli. 17Asher nai panahdung: Imnah, Ishvah, Ishvi, Beriah khatdi paliu tanpui Serah. Beriah nahdung siniu Heber nai Malchiel. 18Haibo khang kariu-je-charukkiu haise Laban niu panahpui Leah leng pikhaibo kavangpui Zilpah niu Jacob leng lungkhaibo-e.
19Jacob nao Rachel niu npiumainah khangnia Joseph nai Benjamin tu lungkhaibo-e. 20#Chab 41.50-52.Egypt dihga, Heliopolis maigu phaimiu Potiphera nahpui Asenath niu Joseph leng Manasseh nai Ephraim tu lungkhai-e. 21Benamin nahdung siniu Bela, Bekher, Ashbel, Gera, Naaman, Ehi, Rosh, Muppim, Huppim, khatdi Ard paliu-e. 22Haibo khang kariu-je-madaikiu hai Rachel niu Jacob leng lungkhaibo-e.
23Dan nai panah Hushim. 24Naphtali nai panahdung: Jahzeel, Guni, Jezer khatdi Shillem. 25Haibo khang chinniase Laban niu panahpui Rachel leng pikhaibo kavangpui Bilhah niu Jacob leng lungkhaibo-e.
26Jacob niu Egypt dihlam tadboga puitadbo pakaikikdung siniu, panahmai naodung jaomakjiu riakcharuk-je-charuk kiu-e. 27#Tk 7.14.Sichiujiu Joseph niu lungbo nah khangniatu sikhaijiu, Jacob kykhunmai Egypt dihga wangbo haise riakchinnia-e.
Egypt Dihga Jacob Nai Pakikhunmai
28Jacob niu Joseph tu Goshen gasu adao raleng chiujiu Judah tu langmeng rai-e. 29Joseph niu papiutu adaora pagu chaqon-kari tuanglujiu Goshen lamse tadsude. Panai adaoboga, papiu wongcheng kiapman lujiu kapsui khaide. 30Jacob niu Joseph khuga din-e, “Tuhoira I shaidi sui mide, palamra Iniu natu ngaolude, haichiujiu nang ringbam kha-e.”
31Sigasu Joseph niu pasingnamaidung khatdi papiu kykhunmai mathiu khuga din-e, “Canaan kadihga lung bambo asingnamaidung khatdi apiu kykhunmai mathiu akhuga wang bamme chiubo hai Iniu tadlujiu chawang khuga paokhai rabo-e. 32Sichiujiu naliu haira mily khuanmaidung-e, khatdi naliugu khaorui-khaona khatdi naliugu bambo hina phung lujiu wang bamme chiubo hai Iniu pakhuga paokhai rabo-e. 33Sichiujiu chawangniu naliutu kulujiu maniubo tingga, naliu pao-pehdungniu kambo kumjiu naliu haidi khaorui-khaonadung maruijiu lungbo maidung-e chiubo pakhuga dinlo. 34Sichiusai, paniu naliutu Goshen luongriang gahai pijiu lungkhai bine.” Joseph niu haise dinbora Egypt maidungniu mily khuanmaidungtu wadi kamra habo jengniu-e.
Currently Selected:
CHABANGCHAM 46: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
