LUKE 12
12
Wasao Thiumaitu Rukhaibo
(Mt 10.26-27)
1Maidung sang sang siniu wang maduijiu, paliuniu khat khat riga tao maluijiu ahi bamboga, Jesu niu raiboga pakhommaidung khuga din-e, “Pharisee maidung khi situ phuisilo, Iniu dinbora paliugu wasao thiubo situ-e. 2Gomkhai bambo hina lepad mirabo-e, khatdi mahimgu hinase din madupad mirabo-e. 3Sichiusai, tamiuboga naliuniu dinbo hinase benboga chiukam mirabo-e, khatdi naliuniu mahim ladtum khai mibo hinadi chaky npom rigasu senpad mirabo-e.
Saotu Ping Ralo
(Mt 10.28-31)
4“Akahmaidung yo, Iniu naliu khuga dinbo-e, chapumtu gilujiu, sibosai wa kasa kamsan silakbo patu pingmi tulo. 5Saotu ping ralo chiubo Iniu naliu khuga dinlen bine: gimibo sai charuidihga thonkhai ngambo Tingwang tu pinglulo. Iniu dinbo hai malumlulo, patuse naliu pingrabo siakge.
6Takinapui mangiutu damli nialeng jonbo makma? Chiudi Tingwang niu takina khattudi mangai makge. 7Nathamkeng hinadi pariak sikamlu mibo-e. Sijengniu pingmi tulo; naliura padung kengbo takina suang paman kung nkiubo-e!
Din Madupadbo Khatdi Khrista Tu Lukhai Makbo
(Mt 10.32-33; 12.32; 10.19-20)
8“Iniu naliu khuga pachang paling dinbo-e, chiubora mai khatniu mathiu suangga pahai asai kasui mai-e, chiujiu din madu khaisai, Chamai Nahpiu siniudi Tingwang gu mazadung masuangga patu din madu khai rabo-e. 9Chiudi mai khatniu mathiu suangga atu lukhai maksai, Chamai Nahpiu niudi Tingwang gu mazadung masuangga patu lukhai lakge.
10 #
Mt 12.32; Mk 3.29. “Mai khatniu Chamai Nahpiu situ din masadi patu kuak khai lan ngamme; chiudi mai khatniu Masanbo Hiupuina situ din masa sai patura kuak khai silakge.
11 #
Mt 10.19,20; Mk 13.11; Lk 21.14,15. “Paliuniu naliutu ladjan thiura maduikyga maksai dihthin paodung, khatdi mawangpaodung masuangga maluang wangsai, naliuniu dechiujiu naliu lam dinralo, maksai degu dinralo chiubo lamga manangmi tulo. 12Palamra Masanbo Hiupuina siniu sibo wan-ga naliuniu dinrabose katikhai birabo-e.”
Kapangbo Kalekwibo Piutu Din Champanbo
13Maidung ruanggasu mai khatniu Jesu khuga din-e, “Katipao yo, apiuniu khaidiakbo maniase njan khaira asingnapiu khuga dinkhai khelo.”
14Jesu niu patu paokakge, “Singna yo, nanai kakga ladjan thiura maksai nanaigu maniatu njanra saoniu atu pumtan pijiulo?” 15Sichiujiu paniu paliu mathiu khuga dinsude, “Patiuni kasabo hina gasu naliu ronna maren lulo; palamra mai khatgu palingbo karingting sira pagu wajiukha bamjiu lungwibo mania siniu makge.”
16Sigasu Jesu niu din champanbo hai paliu khuga dinsude; “Kalekwibo piu khatniu tasiu kengkha kamlude. 17Paniu paronna haichiu maning sude, ‘Iniu agu miusydung hai waga khaira pakhai hamide. Iniu nde kamralo?’ 18Paronna haichiu din-e, ‘Iniu haichiu kamrade. Iniu abow haise ralujiu haisuang kadibo khat thiulujiu asiu khatdi agu kakibo maniadungse khaira mide. 19Sibo naise Iniu aronna atu din-e, ‘Oh, Pasan kawibopiu yo! Takum wajiukha leng mania hina bamkam mide, koina njiu-njiangjiu tiulo, saklo khatdi naronna amansai lulo!’ 20Chiudi Tingwang niu pakhuga din-e, ‘Oh, Kapangbo piu yo! Thaichun siak nagu karingting hai hami rabo-e; sichiusai nangniu naleng-e chiujiu makhuan khai bambo maniadung hai saoniu luralo?’” 21Sichiujiu Jesu niu munkomjiu din-e, “Tingwang leng lungwi khai makjiu, paliuleng ronna lungwi bambo maira haichiu rabo-e.”
Tingwang Tu Malumbo
(Mt 6.25-34)
22Sigasu Jesu niu pakhommaidung khuga din-e, “Haijengniu, naliuniu tiujiu ringraleng katiu-kasak, maksai naliu pumleng,chafai-tani jengniu manangmi makra Iniu naliu khuga dinbo-e. 23Karingting hai katiu-kasak suang kungbo-e, khatdi apum hai chafai-tani suang kungbo-e. 24N-gekdungtu phuilo: paliuniu wadi lingmakge, maksai wadi atiat makge; paliuniu khom maduibo ky maksai chabow thiumakge; chiudi Tingwang niu paliutu pitiu khajiu bambo-e! Thingnadung suang naliura paman kung nkiubo-e! 25Naliu mai khatniu manangbo donniu poinakha ringthenglu buima? Maksai naliu then hai poinakha kam maku lubuima? 26Naliuniu haikumbo kam ngam maksai, dekamjiu kakibo donniu manangbam ralo? 27#1 Chaw 10.4-7; 2 Char 9.3-6.Manamga nkinpense dechiujiu puaksulo chiubo phuilo: paliuniu chalang thiu makge, maksai paliuniu adak makge. Chiudi Iniu naliu khuga dinbo-e, chiubora Chawang Solomon niudi haibo rapendung kumjiu wadaodi palekwat siniu karulu makge. 28Nkan piubuantu karukhaibo haise Tingwang niu-e chapiubuan hainiu thainai penbam lujiu sonnai khoilujiu mangga rumi rabo-e. Sisuang monjiu paniu naliutu karukhaibi lakma? Naliugu malum hai dejiukha ha gulo!
29“Sijengniu naliuniu tiurabo khatdi sakrabo donniu manang mitulo. 30(Palamra haibo kadihpirigu nkengmai niudi haikumbo donniu manang kabamgu-e). Naliuleng haidungse pageng bamme chiubo naliu Piuniu sibambo-e. 31Sibosung, pawangdih donniu manang lulo, sichiusai paniu haidungse naliuleng pikhai san bine.
Tinggen Lekwat
(Mt 6.19-21)
32“Kasiambo milypoidung yo pingmi tulo, palamra naliu Piuniu naliuleng Chawang kadihse pikhaira pachun wijiu bamme. 33Naliugu hina jonlujiu, kahamaileng rangkangse njan khai milo. Sichiujiu wadao khatdi npikiu makbo tinggen lekwat situ matan lulo, palamra siga agatiumaidung siniu agalan ngam makge, khatdi makhiu-tariniu kam mahalan ngam makge. 34Palamra naliugu chakhiu-chalan bamboga, naliu lungchundi bamrabo-e.
Kaden Sibo Vangdung
35 #
Mt 25.1-13. “Wa hinaleng naliu pon khailujiu khatdi naliu mibung matao lujiu kaden sijiu bamlo. 36#Mk 13.34-36.Paliu wangpiu siniu tanao aruangbo gasu wangra khonbambo vangdung kum lulo. Paliu wangpiuniu wangjiu nkham magansai lekhainuang bira, paliu kadenjiu khonbambo-e. 37Paliu wangpiu wangbo tingga kadenjiu rakbam niubo vangdungse dejiukha san wilo! Iniu naliu khuga dinbo-e, paniu pa-ntiangse lupad lujiu, paliutu ntaokiura dinsune, khatdi paliutu khonkhai bine. 38Paniu chundingga wangdi, sisuang rijiu wangdi, paliuniu kadenjiu khon bambose, paniu daosai dejiuga paliu sanwi ralo! 39#Mt 24.43,44.Sigasu chaky paopiu siniu agatiu maidungse dedao wangralo chiubo paniu sisai, simaitu wangjiu paky kampangra wadaodi suilakge, chiubo naliuniu si-e. 40Sijengniu naliudi kadensiak lujiu bamlo, palamra Chamai Nahpiuse naliuniu maning makjingbo tingga wangrabo-e.”
Malum suibo Maksai Malum Suimakbo Vang
(Mt 24.45-51)
41Peter niu din-e, “Rapiu yo, din champanbo hai aliutu dinjiuma, maksai haise mai hinatu dinjiulo?”
42Rapiu niu paokakge, “Sichiusai, saose malum suibo khatdi ningtingbo vanglo? Palamra papaopiuniu pakilung pakhiangna phuikhaira khatdi pavang kakimaidung tudi pawan gapboga katiu pikhaira malinkhai diakbo piu si-e. 43Papao siniu wangbo tingga kaden lujiu bamniubo vangse dejiukha pasan wilo! 44Pachang palingjiu Iniu naliu khuga dinbo-e, papao siniu sibo vang situ pagu kabambo hina pithin khai rabo-e. 45Chiudi sibo vang siniu paronna, papao wangrabo ting thengbam kha-e chiu maninglujiu, kakibo vangdung situ maipui, maipiutu simakjiu dapbambo tingga, khatdi tiu-maniu, sak-maniu bambo wan-ga, papao piuse wangsai dechiu ralo? 46Sichiujiu paniu maningkhai makbo wan gase papao piuse wanglujiu patuse dan marami rabo-e, khatdi patuse kadinpiu makbo maidung dam lura thonpadmi rabo-e.
47Papao piuniu patu pikam khai nibose silujiu, sise kamra kaden makbo vang situra dapjiu mathadsui khai rabo-e. 48Chiudi papao piuniu patu pikam khainibo simak tadi, poinagadi paniu kabuibo kambam niusai, patu masen bibo dapsiniu poinakha mathad khai tarabo-e. Pikhai makeng mibo pakhugasu kakengbose lulan rabo-e, pikhai nkiu mibo pakhugasu nkiubose lulan rabo-e.
Jesu Niu Palam Pitam-tam Khaibo
(Mt 10.34-36)
49“Iniu kadihpiriga chami khaira wangbo-e, sichiujiu sise taoloi bamniu sai Iniu dejiukha achun ralo! 50#Mk 10.38.Atu nphum khairabo khat bamme, sise loimak thenna dejiukha alung chariu gulo! 51Iniu kadihpiriga agi-manaibo phungwang-e, chiujiu naliu maning jiuma? Chiumakge, agi-manaibo makge, chiudi palam pitam-tam khaira wangbo-e. 52Tuhoi gasuniu khang mangiu bambo kykhun siniu khangsumtu khangnianiu, khangnianiu khangsumtu mikremi raleng-e. 53#Mic 7.6.Papiudungniu nahpiudungtu, khatdi nahpiudungniu paliu piudungtu mikremi raleng-e; khatdi papuidungniu nahpuidungtu, khatdi nahpuidungniu paliu puidungtu mikremi raleng-e; khatdi panaidungniu pamupuidungtu, khatdi pamupuidungniu panaidungtu mikre raleng-e.
Pawantu Sibo
(Mt 16.2-3)
54Jesu niu maidung khuga din-e, “Naliuniu tingbanglam kamuang kensubo ngaosai, ting riune chiujiu din-e, khatdi sise pachangjiu padle. 55Khatdi tingrun lamsu tingkai hunwang sai, naliuniu ting thiune chiujiu din-e, khatdi sise pachangjiu padle. 56Wasao kathiu maidung yo! Naliuniu tingra matad lujiu, tingkai, tingriutu silu-e; sichiusai tuhoi ken-gu ramba haitu dekamjiu naliuniu simak jiulo?
Naliutu Atungmaitu Chun Chamlulo
(Mt 5.25-26)
57“Naliuniu dechiujiu majibo siniu naliutu ladjan thiumak jiulo? 58Naliuniu, mai khattu n-gijiu paniu ladjanky lam puitadra kamsai patu n-gikhai mibose kam mahakhai mira matan lulo. Naliuniu sichiulu maksai paniu naliutu ladjanpao khugase naliutu jukhaine, chiusai paniu naliutu chamai minmai khuga pikhaijiu paliuniu naliutu kavangkyga jukhai mine. 59Sichiusai Iniu naliu khuga dinbo-e, naliuniu damli poi katang pikam makthen siga naliu bammi rabo-e.”
Currently Selected:
LUKE 12: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
