LUKE 16
16
Ningtingbo Changam Phungpao
1Jesu niu pakhommaidung khuga din-e, “Pawan khatga kalekwibo piu khat bamme, sinapiugu changam phungpao, pavang khat ronna bamme. Changam phungpao siniu, pawangpiugu rangkangse thin mawi makge chiubo chamse kalekwibo piu khuga paowangde. 2Sijengniu paniu patu kulujiu din-e, ‘Iniu nalamga chiubo hai dechiubo gulo? Agu maniagu pad-ngutbo tachak hina palam pilo, palamra nangniu agu changam phung silak mide.’ 3Siga pavangpiu siniu paronna haichiu din-e, ‘Awangpiu hainiu angam gasu atu lupad mine. Iniu dekam ralo? Iniu kadih chu ngam-lakrai, maksai Iniu takheng radi mangamme. 4Tuhoira Iniu dekam ralo chiubo I si-e! Iniu angam hami tadi, akahmaidung siniu paliu kyga atu lukhai raleng kamra mide.’
5“Sijengniu pawangpiu paw kaphungmai hinatu paniu kuwangde. Paniu raithubo piu khuga maniu-e, ‘Nangniu awangpiu pawse dejiukha phungbam jiulo?’ 6Paniu paokakge, ‘Wasa bung kai khat.’ Changam phungpao siniu din-e, ‘Nagu tachak khuangse haiga bamme, nangniu ntaokiu lujiu ringiu ronna-e chiujiu raokhai lulo,’ 7Sibosai paniu khangkhat khuga maniu-e, ‘Nangra dejiukha phungbam jiulo? Paniu paokakge, ‘Chabanmiu phaopot sang khat.’ Changam phungpaoniu pakhuga din-e, ‘Nagu tachak khuangse haiga bamme, kai tachat ronna-e chiujiu raokhai lulo.’
8Haichiujiu ningtingbo jengniu pawangpiu siniu palung masan makbo changam phungpao situ thuonde. Haichiujiu haibo kadihga lungbo maidung siniu paliu ngamga, kabenbo nahdung suang ningting nkiu-e.” 9Sichiujiu Jesu niu dinkiu-e, “Siniu naliu khuga Iniu dinbo-e: haibo kadihgu chakhiu-chalantu naliu ka thiu silulo, hainiu naliutu thonpad dasai, tingtheng ringbo kygase naliutu lukhai rabo-e. 10Mai khattu changam poinaga malumsui sai, kadibo gadi malumsui rabo-e; mai khattu changam poinaga malum khaidao laksai, kadibo gadi malum khai silakge. 11Naliutu haibo kadihgu chakhiu-chalan gadi malum maksai, dechiujiu majibogu chakhiu-chalan gase malum silu ralo? 12Khatdi naliutu maigu maniaga malum khaidao laksai, saoniu naliutu naliugu maniaga malum silu ralo?
13 #
Mt 6.24. “Kavang khatniu wadaodi chawang khangnia vang thiu nda silakge; paniu khang khattu marengjiu, khang khattu lungsa rabo-e; paniu khang khatlam liangjiu khang khat ken tiarabo-e. Naliuniu Tingwang nai rangkang vang thiu nda silakge.”
Jesu Niu Dinkhaibo Kasia
(Mt 11.12-13; 5.31-32; Mk 10.11-12)
14Haise Pharisee maidungniu chiuluboga, paliuniu Jesu tu nui-e, palamra paliuse rangkangtu masenbo maidung-e. 15Jesu niu paliu khuga din-e, “Naliu hai maidung masuangga majibo sao kathiubo mai-e, chiudi Tingwang niu naliu lungchun sibamme. Palamra chamainiu kakungbo leng lukhaibose Tingwang lengra wadi makge.
16 #
Mt 11.12,13. “Mose gu Tacheng-tajai nai phaimiukakung maidungniu raokhaibose John Baptist ken tangbo thin-e, sibo wan gasu Tingwang gu Chawangdih lamga Kawibo Champaose dinbam mibo-e, khatdi mai hina sibo npui gase ngutra matanbam mibo-e. 17#Mt 5.18.Sichiujiu sibo Tacheng-tajaiga siamthubo khattu kam maha mirabo suang, ting-kadih hamiboniu mala-e.
18 #
Mt 5.32; 1 Co 7.10,11. “Panaotu talujiu kakimaitu lulan maise makhabo-e; khatdi tamibo puitu lulan maidi makhabo-e.
Kalekwibo Piu Nai Lazarus
19“Pawan khatga kalekwibo piu khatniu pafai-pani kawibo maliang piujiu lung amansai khai mibo piu khat bamniu-e. 20Sigasu kaleksabo, pazanniu Lazarus kubo masakjiu akhuanbo piu khatniu, 21sibo kalekwibo piu ky kamun gase, pakuangkai gasu ntiakiubose khoitiu khaira chiujiu wang-e. Siga pagen akhuanbo jamse tathiniu wangjiu maliak bamme.
22Siga kaleksabo piuse shaikiu mide, sichiujiu Abraham mungga ntaolujiu tinggen maluadse tiura, mazadungniu puikhang mide. Siga kalekwibo piu sidi shaijiu bailan mide, 23siga pase magenthiubo charuidih gase wangjiu, phuikhangboga, Abraham niu Lazarus tu maluang ntao bambose ngaode. 24Siga paniu kujiu din-e, “Apiu Abraham yo! Lungsajiu Lazarus tu langkiu, pa-njung ton-gasu tadui sumlujiu alee pisum agi khailo, palamra haibo miniu magenthiu asangjiu bamme!”
25“Chiudi Abraham niu din-e, ‘Anah yo, nangra nda nagu karingtingga kawibo maliang daomide, chiudi Lazarus ra kasabo maliang dao mibo-e. Siniu, tuhoira nangniu magenthiuboga, paniu amanboga bambo haide. 26Sironna makjiu, aliu kakga kasukbo khunki hai bamme, sijengniu haigasu naliu khulam padkhaini maidi kenpad ngamlakge, khatdi naliu khulam niudi aliu khulam mai khatniudi kenpad ngamlakge.’ 27Siga kalekwibo piuniu din-e, ‘Sichiusai, apiu Abraham yo, apiu ky lam Lazarus tu langwang khaira, Iniu nakhuga khengbo-e, 28siga asingnamai khang mangiu bamme. Siga patu pitad lujiu paliura haibo magenthiubo bamga wangmak raleng pijiu rukhailo.’
29“Abraham niu din-e, ‘Nasingna maidungtu rukhai raleng Mose khatdi phaimiukakung maidung bamme; paliuniu dinbose nasingna maidungniu lukhai rabo-e.’ 30Kalekwibo piu siniu paokakge, ‘Siniu buimakge, apiu Abraham yo! Chiudi mai khattu pi kashaibo gasu ringwanglan lujiu paliu khuga langkhai bisai, paliu nuan gasu lungli lubui-e.’ 31Chiudi Abraham niu din-e, ‘Paliuniu Mose khatdi phaimiukakung maidung chamtu lukhai maksai, mai khatniu kashaibo gasu ringwanglan bidi paliu lung lisi lakge.’”
Currently Selected:
LUKE 16: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
