LUKE 19

Jesu Nai Zacchaeus

1Jesu niu Jericho ga wanglujiu rontad bamde. 2Siga ramkha khabo papee khat, pazanniu Zacchaeus chiu kubo kalekwibo piu khat bamme. 3Jesu hai dekumbo mailo chiubo pah phuikhai nijiu bamme, chiudi maidung kengbo donniu khatdi pase pakhao siambo donniu Jesu tu phuitang lulak mide. 4Sijengniu maidung masuang paniu pakmeng railujiu biuruibang khatga buangkiu lujiu Jesu wangrabo tu phui bamme. 5Sibo bamga Jesu niu wangboga, phuikhang lujiu Zacchaeus khuga din-e, “Zacchaeus, kalangjiu nkumlo, palamra thainai, I nakyga riukhai rabo-e.”

6Zacchaeus niu kalangjiu nkumde khatdi pachun wichang wijiu patu lukhaide. 7Haisitu ngaomaidung siniu haichiujiu khansude, “Haina piuniu nuan phungmai kyga riukhaira tadmide.”

8Zacchaeus niu chaplujiu Rapiu khuga din-e, “Rapiu yo! PhuiIo, kaleksa maitu agu kabambo mania phankhat lamse pirabo-e, khatdi mai khatgu Iniu aratjiu lubam niusai, sise Iniu patu dam madai thiujiu pirabo-e.”

9Jesu niu pakhuga din-e, “Thainai haiboky gahai juringbose wangde, palamra haina piudi Abraham kaikikge. 10#Mt 18.11.Chamai Nahpiu siniu hami maitu phiura khatdi rankhai raleng wangbo-e.”

Kachia Khuangtu Din Champanbo

(Mt 25.14-30)

11Maidung siniu haise nkingjiu bamboga, Jesu niu din champanbo haise paliu khuga dinlan-e. Pah tuhoira Jerusalem wangtang kinbo-e, siniu Tingwang gu Chawangdihse ngaoji sune chiubo paliuniu maningjiu bambo-e. 12Sijengniu paniu din-e, “Pawan khatga kadimai khatniu charam kadiu khatlam tadlujiu, chawang thiulujiu malanwang raleng tad mide. 13Paniu tad makhaga, pavangmai khang kariutu paniu kulujiu, paliu mathiu leng kachia khuang khat khat khaidiak lujiu paliu khuga din-e, ‘Iniu nbintad mibo lungga haise naliuniu dejiukha lipad ngamlu ralo phui matailo.’ 14Haina piu haitu param maidung ngaokhai lakbo piu-e, sijengniu pasai lamsu paliuniu walangtad maitu langkhaijiu din-e, ‘Aliuniu haina piu haitu aliu wang thiura suini makge.’

15“Chiudi sibo piuse chawang thiulujiu wanglande. Pavang maidung siniu dejiukha lipad lulo chiubo phuira paniu chamtan pikhai sude. 16Raithubo piu siniu wanglujiu din-e, ‘Paohubo, nangniu pikhai diakbo gasu, Iniu kachia khuang kariu hai lipad lude.’ 17Paniu din-e, ‘Kamdaode, nang hai kawibo vang-e! Natu hai poi riga malum suibo donniu, Iniu natu namdi kariu paopiu pithiu khai rabo-e. 18Niabo vang siniu wanglujiu din-e, ‘Paohubo, nangniu pikhai diakbo gasu Iniu kachia khuang mangiu hai lipad lude!’ 19Paniu sinapiu khuga din-e, ‘Nangdi namdi mangiu paopiuse thiurabo-e.’

20“Kavang khat siniu wanglujiu din-e, Paohubo, nagu kachia khuangse haisi-e; Iniu chafairenniu majiu lujiu haise baikhai mibo-e. 21Palamra nang hai kasabo donniu natu Ira ping-e. Nangra nagu makbose lu-e khatdi nangniu lingkhai makbose atiatle.’ 22Paniu pakhuga din-e, ‘Kasabo vang! Nagu ladkeng saisuijiu natu ladjan thiu rabode. I hai kasabo, agu makbotu lubo khatdi Iniu lingkhai makbotu atiatbo piu-e chiujiu nangniu si-e. 23Sichiusai, wide, dekamjiu nangniu agu rangkangse rangkangbung kyga khaimi mak jiulo? Sichiusai Iniu malanwangbo naise paton-pana tamanjiu daolu rabo-e!’

24“Sichiujiu siga chapbam maidung khuga paniu din-e, ‘Kachia khuangse pakhugasu khoilujiu, khuang kariu bambo piu khugase pikhai milo.’ 25Siga paliuniu din-e, ‘Paohubo, pakhu gara khuang kariu bambo-e!’ 26#Mt 13.12; Mk 4.25; Lk 8.18.Paniu paokakge, ‘Iniu naliu khuga pachang paling dinbo-e, poinakhadi bammaileng pikhai sanbine, chiudi wadi habo pakhu gasu, kabambo poi sidi lupadmi rabo-e. 27#Mt 25.14-30.Tuhoira, agu mikre maidung, atu pijiu paliu wang thiukhaini makbo maidung situ haiga puiwanglo, khatdi amasuangga paliutu kamshat milo.’”

Chawang Thiujiu Jerusalem ga ngutbo

(Mt 21.1-11; Mk 11.1-11; Jn 12.12-19)

28Jesu niu haichiujiu dinlubo sai Jerusalem lam paliu masuang tadrai mide. 29Paniu Olive Luong wangtangboga Bethphage nai Bethany wangtang suboga, paniu khommai khang niatu haichiu dinkhaijiu langkhaide. 30“Nanai masuangga bambo namgase tadsulo, sichiujiu nanainiu ngutboga qonniampoi mai khatniudi tongkhai matai makhabo khattu khinkhai bamniubo ngaosune, Sise khilujiu haiga juwanglo. 31Nanaitu mai khatniu dekamjiu sise khibam jiulo chiu maniusai, papaoniu thinrabo pageng bamjiu-e chiu pakhuga dinlo.”

32Sichiujiu panainiu tadboga Jesu niu panai khuga dinkhaibo kumjiu daode. 33Panainiu qonniampoi situ khibamboga papao siniu panai khuga din-e, “Dekamra nanainiu sise khibam jiulo?”

34Panainiu paokakge, “Papaopiu siniu haise thinrabo ngam bamjiu-e” 35Sichiujiu panainiu qonniampoise Jesu khuga juwangde. Khatdi paliuniu paliu faise sibo khao riga thapkhai lujiu Jesu tu pi ntao khaide. 36Sichiujiu paniu sise tuanglujiu padboga maidung siniu paliu faise npuikiga thapkhai khuan sude.

37Sichiujiu paniu Jerusalem wang mana suboga, Olive Luong kiusu raboga, pasai suikinbo maidung siniu, paniu maisuang habo ngamdung kamkhai mibose ngaolujiu paliu khuan tanjiu Tingwang tu thuonsude! 38#T.Lui 118.26.“Rapiu zan gasu wangbo chawang situ Tingwang niu thoikhai milo! Tinggen lam agi-manai bamlo, khatdi Tingwang maken dibamlo!”

39Siga maidung ruanggasu Pharisee mai khangsianiu Jesu khuga din-e, “Katipao yo, nakhommaidung haitu maliumak bamra chamtan pikhailo.”

40Jesu niu paokakge, “Iniu naliu khuga dinbo-e, paliuniu maliumak bammisai tatudung hainiu paliu ronna marapad surabo-e.”

Jerusalem Jengniu Jesu Huibo

41Paniu namdise wang mana suboga, haise phuikhai lujiu, khatdi kapjiu haichiu dinsude: 42“Thainai hai agi-manaijiu bamrabo pageng bambo situ nangniu sibamniusai wirabo-e! Chiudi nangniu haisitu tuhoi sitanglu makge! 43Nagu mikre maidungniu natu chap magui lujiu khatdi pake hina lamsu natu dangkham mirabo tingse wangkinne. 44Paliuniu nareng lungga bammai hinatu kam mahami rabo-e; khatdi siga tatukang khat nakhadi masiak khaidiak lakge, palamra Tingwang niu natu gukhai raleng wangbo tingga nangniu sitanglu makge!”

Charaky Lungga Jesu Niu Ngutbo

(Mt 21.12-17; Mk 11.15-19; Jn 2.13-22)

45Sibosai Jesu niu Charaky lunggase ngutlujiu, alijiu bam maidung situ haichiu dinjiu hasude: 46#Isa 56.7; Jer 7.11.“Masanbo Ariakkhuangga haichiu raokhai bamme chiubora Tingwang niu dinne, ‘Atu kahumboky haitu kakheng thiuboky kurabo-e!’ Chiudi naliuniu pijiu agatiu maidunggu nbaiky pithiu khai mide!”

47 # Lk 21.37. Naimachang Jesu niu Charakyga katikhaijiu bamme. Siga singkudung, Tacheng-tajaigu katipaodung, khatdi maidunggu jupaodung siniu patu kamshatra rangsude, 48chiudi paliuniu sise kamrabo npuise phiudaolu makge. Palamra paniu katikhaibo ladkengse khatnadi maidung siniu kam maha nimakjiu nkingjiu bamme.

Currently Selected:

LUKE 19: LIANBSI

Highlight

Copy