LUKE 24

Jisu rhüla kesü

1Deba zho theranha, keshu rena, uko ta mhakhre lüvo, mharü kethenyüko püvo. 2Uko ketsüo retu zü keta ngo; mhakhreyo. 3Vele uko ta mhakhrelü kelüce themo-o ngo mota. 4Mha süo la uko ve kedi thitha, sizi metha mi kena ufüne mevashuti khide uko khüce thatha. 5Thenomiko kerepü uko züpüki cejü merüpü bata; vele uni ukoce poti, neko dipüla kesako dolü rhü ketao phuta? Pü hice ba mote, vele rhü süte. 6Pü nekoce kepoko rükra süte; pü süce Galilee lü bazolu tice. 7Thüma Nuo tüpü kephomako belü sü vato, püpü gu kevasa zhosü nha rhüla sütato. 8Süsa uko püjüko rekrayi. 9Mhakhrelü uko salavori, uko mi keripü koce, mu kekreko metüce posü. 10Hilü, Mary Magdalene, Joana, Mary James zü, mu theno kekreko ri ta, kha apostleko koce posü. 11Vele jü süko ketho kemo pü bita, mu uko melü mota. 12Vele Peter tasü de ta mhakhre lü vo, neküki pesü, pü linen fünheko lebi ngo, süla püta celü vorita, mhathi ketako püngota,

Emmaus lü kevoni

13Hihe, sünhasü mikena ta Emmaus cholü vozü, Jerusalem zü kemecuti mile thüna mesü. 14Uni ta kezhu mhathi ketako, cholü kepovozü. 15Uni mhakepo mu mhalü keta tülü Jisu ta unice vode uni züta. 16Vele uni mhü thipü pü semova. 17Pü unice poti, neni kedipü kepode tavo züla? Uni thayi de uni thüsu bata. 18Süsa mipü püza Cleopas püfü kelasü, n lebi sojüsove thide Jerusalem lü ta zotho he, Jerusalem lü mhathi ketako sekemo? 19Pü uni ketso sa de poti, mha kedipü la? Uni posala kesü, mha sükosü Jisu Nazareth mi keku mhatho Jihova mhüjülü mu thüma metüko mhüjülü sheri. 20Hako thevo kezhoko mu krütako pü khapü mejo vade cross yo gu vale. 21Vele hako kelüce Isreal rhakeyi mitho zi bale; Ile, hizi kevasa, tha tüsozho süte. 22Sülebi mori, hako krolü thenomiko hako kere süte; tsali rena uko ta mhakhrelü vo. 23Uko pümo ngomo ta, sülü uko poti, tüyo choyimiko zümholü ngole zita; ukoce pü rhüla süte. 24Hako kezü kebako humi tavo pe mhakhrelü, de thenoko kepo bi tü pote; vele pü ngomo. 25Süsa pü unice poti, neko dithedü nyozoshi, mhase thophi, saju kepoko jü melü kemo. 26Khrista kemezhe keti hiko, thisüzo mome, de pü zapozale lü lüketako? 27Moses yo shudü vo saju kepo metüko ketho lesilü thopü kemetako po vacho vosü. Sükolü püju thopü kemetako. 28Uko ta rünalüvoto kezülü meno vota, püta mecu (vazü) vota keto bisü. 29Vele uni pü vakha sü de poti, thüva te, mu tüso vote, hice batate; mu pü unizü sülü bata tole lüta. 30Pü uni zü mhaketi miz yo kebace, pü tsükhri püyi de reliphri sü (kechothisü) mu cephro sü mu khapü uni tsü sü. 31Uni mhüko khrisü, uni püseyi ta; mu pü uni mhüjülü ngo mota. 32Uni hunehu cepoti, chodelü püzü ketace pü amice mhapo ketace avu melü lümü ta zomome? Pü ketholesikolü haphra de po kesü kolü? 33Pütü sülü unita Jerusalem lü la vori, mi keripüko sülü kengupü ba ngoyi, mu thüma kekreko sheri ba. 34Uni poti, Niepoo rhüla süta kethozo, Simon sheri mengosü. 35Uni chodelü mhathi kesüko pü posü mu tsükhri cephro kesülü unipo püse keyi kopü posü. 36Uko side theju süko kepo kebalü Jisu pütho ta zolü uko dolü metsulü thapü ba ngoyita; de ukocepoti, thelü kemenü po neko yo bayite. 37Vele uko keresü de mpe bata, uko kelüce rüpüpü ngoti zotho side lü bata. 38Pü ukoce poti, neko dipüla nekolü kemezheba? Neko melülü kedipü la mhalü bata? 39Hihe, abezi mu aphezi ko pesüte, I zole, anite (a jüsüte) de seyite; kekrelamori rüpü utrhi upho uroko bamo, neko kengoce I süko ba. 40Pü jü süko po kesüsa pü bezini mu pü phezi ni pü uko mekasü. 41Uko rethu ba ketala melü rü bata, uko ngo thide, pü uko ce poti, neko ketico hu pü tame? 42Uko fü kechü tipü kha pü tsüsü (mefijüsa). 43Pü süo püyi de pü tiyi uko mhüjülü. 44Pü uko cepoti, mhahiko I neko ce posü, I neko zü ketace, mha popü kemetako metü thitso sü ketola, Moses thezhokolü, saju kepoko mu Chelekolü ala thopü meta tiko. 45Süsa pü khakhripü ukopo seyi, ukopo ketho lesiko seyi ketola. 46Pü poti, Khrista kemezheto, mu sa keta zhosü nha rhüla sürito. 47Thelü rede keyi mu kejo vakesü Jerusalem lü poshüdü de shuye metülü püza pü posü ketola. 48Neko mhahiko zhopo kozo. 49Hi he, apo jüko khapü neko ketsü I ketsüsüto, vele neko Jerusalem nadelü fü türü bate, mesolü kevori neko thi mekusü kemothe. 50Pü uko chothazü Bethany ketso kho, mu pübe chopü uko yosü de jopü uko tsü. 51Pü jopü ukotsü kebace uko zü kekhota mu pü khipü tülü vota. 52Uko pü reshüsü, side uko nüshü mu rethu de ta sala Jerusalem lü vori ta. 53Tüsonha kereshücelü bazota, Jihova chu mu jopü putsü. Amen.

Currently Selected:

LUKE 24: NAG5BSI

Highlight

Copy