Matthew 11

John pu sadziko kütsüh püh Puce küsü

1Süsa Jisu-e müthaküyi kürinkünakoce zü potso küva sa Pu sülüno tasü rünakolü vo mi mütha, mo mha popüh mika to vota. 2Sülize John küdücelü ba die Khristao mhatho dzühko se küsüce pu sadzimi küna kütsüh sü die, Puce: 3No vori to kütao sü me, mo die hapo kükre püh müri la bata? zi die kütso ta. 4Jisu unyi khü küla die sü, nenyi vo die John ce nenyi küseküngoko püh po süte; 5Mhücemi mha ngoyi bate, pheyhomi sho tayi, leprami müsayi, nyijimi mha khü seyi, küsami phu müsüyi, mo küdimiko ce züyiküveo püh posü bate. 6Mo thüma kühopühri mhapüh nari ayo jotayo kümomi yheve tho. 7Süsa unyi ta küta sa Jisu-e John dzüh püh thümakro-o ce po shühdü die puko yisü, neko nhatsalü dipüh pe tozü die pra la? Tükhra-e vo tükhrü hü küna küsü püh me? 8Süri nekoe dipüh pe tozü die pra-a? Thüma u khüne kümha süh kütimi püh me? Yhei, Thüma u khüne kümünü mo kümha sühyo kütimiko-e küdemi cekolü bayo; 9Eli neko dipüh pe tozü die pra la? Sadzühküsemi püh me? I nekoce potü süto, sadzühküsemi ceri zhoku küti püh zo. 10Kükrenamoli pu dzüh popüh kümüta: Yhei, I nmhuzülüno a shoyi-o kütsüh süto, mo pu n mhuzülüno n shoko küsüh süto; zipüh kümütao sü pu zo. 11I nekoce potü süto, thünomi yo Ihü küvoriko dolü John mi dzülu khaküsüo ceri zhoku küti süri mozo, süri tüyo küde balü künyithoo zo sheri pu ceri zhoku. 12Süze John tülüno vori tsüdo kütso mi tüyo küde phu murimu tate, mo murimu küyimi süo püh uzü thiyi bate. 13Kükrenamoli John vori kümothe sadzühküsemi mütü mo thüzhoo ri sadzühküse zü po vorizo. 14Mo neko ri süo ngoyi nyiyo lize, hi-ohi vori too küta Elijah zo ho. 15Uni künemi po rünyiyi te. 16Süri tsüdonumiko hi püh dipüh bi lie pota? Süsü natsimiko-e lhethothilü no mürü thi die huhu yisü: 17Ha lila khusü; eli ne-e nasu mute ha-e thükri thisü eli ne-e krayi mote, zidie po küsüko bi zo. 18Kükrenamoli, John vori die mi züh mhati mhakra mo rü, mi pu yisü thürü küsü zühyo lizita. 19Thümanuo vori die mi züh mhatimhakra zo, süri puko Pu yisü, Yhei, U coyhu kürüh mo khubüh zo büh, thüsoküyiko mo küphomoko khretho-o sü, zita. Eli, pu nuneko yono mhaseo küve tha süyo.

Mülü kümu rünako

20Sücesü Pu Pu küku mhatho thi shüh küsü rünakolü thülü küdeyi kümo na Pu süko tha shühdü die sü: 21Tsee! Chorazin, no thiyite! Tsee! Bethsaida, nori thiyite! Kükrenamoli, mhatho küzho thi puh nece küsüko hi bi die Tyre mo Sidon nyi rünalü ri thisü lize puko-e thazütho gakhrokhü mo nyogwü süh die thülü küdeyi tato murü. 22Eli I nekoce posü to, kütso küto tüso nha-e ne rüle ceri Tyre mo Sidon rülee yhieyi veku to. 23Süze no Kapernaun, n tho nthi kürükrü püh tü tso bate me? N khipüh prü mezalü sü vato. Kükrena moli, n celü mhatho küzho thi küsüko hi Sodomlü ri thi sü lize Sodom-e tha kütso ri balu to murü. 24Eli I nce posü to, kütso küto nha-e n rüle ceri Sodom rülee yhieyi veku ta zoto.

Vori rülüyi no die ci küsü

25Sücesü Jisu-e küla die sü; Apo, tü mo cejü mhu Nyepoo, n müza ve; Kükrenamoli, no mha küsekülüko mhuzülü mha hiko küva püh müta die püh payhoko müsemüngo küsü na. 26Süzi Kütho, Apo, no n mhuzüce zo-e hizi küti n müdo küta na, zita. 27Apoo tho mha mütü kha pün a prü süve; Poo zo kümosa mipüh ri nuo seyo mo; mori nuo tho tha püh müsemüngo sü zo kümosa mipühri Poo seyo mo. 28Neko kümüzhe mo ne püh müsi küta khüko ace vorite, I kürülü khapüh sümi prüto. 29Neko a kadu püyi mo a celü mhaseyite, kükrenamoli, I a zho ve, mo ko mo, kitina, süzi lize nelü kürülü ngoyi to. 30Kükrenamoli, a kadu pü rüyi, mo apüh ri pü mbro tina.

Currently Selected:

Matthew 11: NAG5BSI

Highlight

Copy