Matthew 24

Jisue kürüsuce müka va küto po küsü

1Süsa Jisu kürüsuce lüno ta pra die ta tazü tice, Pu müthaküyikoe mha püh Kürüsuce thi kümako tha Pu ka tozu die Puce vori. 2Sücesü Jisu puko yisü, Neko mha hikohi ngo ba zotho? I nekoce po süto; Mha hikohi mütü phu kütu va mo die kütsü püh pori küpiba pü bayi lho; zita.

Mha kübü mo kümüthi vori küto dzüh küpo

3Süsa Pu Olive cejüthuyo ba küyice, müthaküyiko mükhrüh Puce vori die sü; Mha hikohi dipüh küthi ce tata? Mo hio vorita küto zasi, mocejüo thüla küta zasiko püh hakoce po süte, zita. 4Sücesü Jisu puko zü küla die sü, mipo neko Shuh va mo küto na lala bayite; 5Mhakükrenamoli, thüma kükro aza süh vori die, I Khristao zo; zidie thüma kükro shüh züh tata to tina. 6Süzomoli, neko thüriküthi mo thürithi küto dzüh küpo shuh küti se to; sücesü neko lü müyhu müzhe ta mo küto lü zoyite. Kükrenamoli, mha hikohi vori moyi lho zo tina; süri süo thülao mo. 7Sücesü shühye püh-e shühye kükre püh phimu, küde püh-e küde kükre püh phimu sürito, süsari thükre, thüpühsüh, ceyice sü küti, cejü büh kükrekre kütiko lü süri to. 8Süri mha hikohi mütü kümüzhe küto thürako zo. 9Sücesü mi neko tüpüh kümüzhe kütikolü sü die neko dokhri to. Sidie aza na shühye mütü po neko mütsü to. 10Sidie thüma kükro ri a yo jota to Mo huhu tüpüh mi belü süto, mo mi püh mipüh mütsu tato. 11Süze kücezü sadzühküse kükro süri die thüma kükro shuh kütse züh tata to. 12Mo mha küsü krothori kütana thüma kükro kükhrü müko tato. 13Süri hie zo tha pütüti küyi mi külayi zoto. 14Sülize shühye mütü mhüzülü zhopo püh thisü küto na cejü mütülü küde züyi küve hio po püh mi mütha tso sü zoto; sü züh thülao vori to.

Kümüzhe shüh küto

15Süna thazü Daniel sadzühküseo po popüh kümüta; mhava kümürho shuh süküto mo üzü küzüh thizo küto vori die kümüsathiolü tha küyi ngo küyice; zü süo phiyo kütimi po seyite. 16Sücesü Judea lü kübami po ta sü cejüthuyo vo tate. 17Mo cejüthuyo kübami po mhapühri khiyi tozü die la kiri hite. 18Mori yilü kütamiko po u khü khiyi tozu die la vori hite. 19Eli sücesü phosimo kütako mo u nune no kübakoe thiyite! 20Süri neko ta küto tü süo po tüsühce mori kürülü tü nha mo küto na sho ba yite. 21Kükrenamoli, sücesü thüma po kümüzhe püh kümüre thi die cejü thiyi prühlünovori tsü kütso mori hisari mhapühceri süsü biyi külho pü thizoto küti na. 22Süze pu tüsozho süko thi kümüzü süzo kümosa mipühri külaküyi ngoyi lho zoto. Süri küdaküyiko züve na tüsozho süko thi müzü süto. 23Sücesü mi nekoce Khristao lice ba mori hice ba ziri; mülü hite. 24Kükrenamoli, Khrista kücezü mo sadzühküse kücezü süri die mha zasi kümüre mo u malhü mhathoko thi püh mi müka to; sidie thiyi küvethe küda küyiko ri shu kütse züh tato tina. 25Yhie! I müzümüra nekoce po sü va züho. 26Süna mi nekoce, Yhie! Pu nhatsalüba, ziri vo hite; Yhie! Pu kümükhrühra ba, ziri mülü hite. 27Kükrenamoli, nathoco tü küprüh sü lize nakrocori ve voyo küti bi thümanuo küvori ri süsü bi zoto tina. 28Kükrenamoli, kühopühra ri küsamo küzüra thirhako ri vo sülü Küngu to.

Thümanüo la vori küto

29Kümüzhe küti tüsozho süko vota mütha nace züh tato; mo khri vesü mu tato, sü libizo mo ri thünyiko ri tüyo no rüra tato, mo tüyo küku mütü ri sü küna vato. 30Sidie tüyono Thümanuo zasi thipüh mika süto; Sücesü cejü küta thüma lünyiko kra tato, sidie püko thümanuo küku süh die zapozale thi die tüyono kümhülü kiri küzü ngoto. 31Sücesü Pu Pu shoyimi kütsüh püh süko po thütsü khu kümüre thi süto, sidie puko po tüyo lapühcono vo kükreco kütso tükhra küdako lüno Pue küdaküyiko phu Künguto.

Shedüboo zasi

32Süze shedüboo yono küzüve küsü nekoe seyite, pücoko müzü la die; pu nyi nyisa thü pari kütace; nekoe tülü tate zi küti seyiyo. 33Süsü bi die neko mha hikohi ngo küyice, pu tü müno te, cekhace thate; zi küti seyite. 34I neko ce potü süto, mha hikohi mütü thi tsühyi kümothe, tsüdo nulhü hiohi di talho. 35Tü mo cejü di tato, eli, azüko di ta lhozo.

Mipüh ri se kümo tüsozho mo bavüdoo

36Süri pu tüsozho mo pü bavüdoo mipühri semo, A po zo kümosa tüyo shoyimiko ri semo. 37Süri Noah tüce bi thümanuo küvori tüce ri sü bi zoto. 38Kükrenamoli, sücesü dzü de süri ta kümothe mo Noah püzu rülü ta kümothe mi mhati mha kra, thüno yi mo mhi bazo. 39Sidie zü kro süri die puko vopü ta kümothe püko se bamo; thümanuo küvori ri süsü bi zoto. 40Sücesü mi küna yilü tato, mipüh khiyi tato, mo kükreo kha vato. 41Thünomi küna mha kügünyo süh die mhagü thato, mipüh khiyi mo kükreo khavato. 42Süna neko khü ba zoyite, kükrenamoli neko Nyepoo küvori tü sekümo na. 43Süri neko hio se bato; mhaceno ce nyepomi püh-e kürügomi rikhu küvale ditsüolü vori to sü küti se ba lize puce khü münu ba die kürügomi po vori pu ce rhe va lho. 44Süna neko ri bayite; Mhakükrenamoli, neko lüba kümo bavüdo pühlü thümanuo vori zoto tina. Küzütho mo kürüzü ceta 45Süze sopühno ceta küzüthoo mo pu do küveo thi die pu nyepomi po pu thipüh celü nyepo thi die pütü tüce mhapüh püko prü kübao thi ta? 46Pu nyepoo küvori tüce süsü bi thi ba die ngoyi küto ceta süo yhevetho zo. 47I nekoce potü süto, pu thüma süo po pu mha mütü mhu nyepo thi tato. 48Süri kürüzü cetao pulü no sü, a nyepoo vori münu yo; 49Sidie pu ceta besüh kükreko vü mo küthi shühdü tato; mo kümüzühmiko züh die ti mo kra müzüh bato; 50Ceta süo ne nyepoo pu lüba kümo tüsoo lü mo pu müri ba kümo bavüdoolü vori tato. 51Sidie pu dothü küna thiva die pu püh küthüra kütiko kroolü sü vato; sülüno kra mo uhu thüzhe pu bata to.

Currently Selected:

Matthew 24: NAG5BSI

Highlight

Copy