MARK 10
10
Kükhoküva küti
1Süsa Jisue sülüno süri die Jordan rü poyo no tasü Judealü vorita, mu thüma kroo la vori die Puce künguyi, sidie Putho Pu zhocethi die süko mütha sü. 2Sücesü Phariseeko Pu müno vori Pu küdo die; mipüh pu cemi kha küva thüzho to me moshi küti kütso. 3Mu Pu süko zü küla die sü; Mosae neko po dibi no die zü kha sü la? Zi die kütso ta. 4Pukoe po die; Mosae kha küva lüsi püh tho sü die süpü kha va no süzo; zita. 5Süze Jisu puko zü küla die sü; neko lü kürüh la pue zü hio kha küsü zo. 6Süri Pooe tü cejü thisü prühlüno thüpumi mu thünomi thisü. 7Hihi la thüma püh-e pupo puzu vava die pu cemi züh püh thita to. 8Mu unyi mi küna thisa mori thipüh thita to, zisü. 9Süla Pooe thi küma küsüo thüma po cekho va hite; zisü. 10Süsari müthaküyikoe celüno süsü biti kütso lata. 11Süla Pu sükoce po die; thüma kühopühri pu cemi khava die thüno kükre yita lize pu süpü züh die kürügü kürüzü thita zo. 12Mu thünomi püh-e pu nupu khava die kükremice ne ta lize pu kürüzü thita zo.
Jisu galiphi püh natsimiko küprü
13Sülize Pupo brü sü no die mi natsimiko züh puce vori, süri müthaküyikoe süko rüta. 14Mu süsü ngo die Jisu Pu lü rünü mota, sidie sü; natsimiko po ace vorite; mu puko kha hite, kükrelamori Poo küdee süko zü zo tila. 15I nekoce potü süto, thüma kühopühri natsimi bi zo die Poo küde yiyi mo lize sülü lüyi kündizo. 16Sidie pu süko rhapühyi die pu be shopüh süko yosü die galiphi sü.
Künemi püh mha kütso küti
17Süsa pu sholü ta vo küzüce mipüh ta puce vori pumhüzülü shetüyi die sü; kümütha keveo, küshothe kürhüh püh azü thiyi küto la I dipüh thi mosüa? zita. 18Eli Jisu pu yisü; No dipüh la a püh küveo lie ciyo la? Mipüh, süo sü Poo zo kümosa keve di. 19Noe, kürügü kürüzü thi sü, mi dokhri su, mi rügo su, kücezü zhopo thi su, cezü die mi swüti su, npo nzu rhoyi, zi die zü kha küsüko se ba tho? Zita 20Pue pu zü küla die; kümüthao, I a natsilüno hikohi mütü züh sürite; zita. 21Jisu pupe tha die pu krü die sü; no mhapüh tsomo balu, vo die n mha dipühpüh ba sheli mütü zhüh püh küdimi prü vayi, sülize no tüyo cene neyito sidie vori n cross pühyi die a sa müdziyite; zita. 22Eli pu zü süo la pu thü südie tata, kükrelamori pu mha kükro kübami ti la. 23Süsa Jisu rürüh lico hico pe die, pu müthaküyiko yisü, Mhakünemikoe Poo küdelü lüyi küto la didüpüh rüh to shehe, zita. 24Sücesü müthaküyikoe Pu zü süko la u malhü thita. Süla Jisu pukoce po la die; Natsiko, thüma cene mülüyo tiko Poo küdelü lüyi küto rüh zoto le he. 25Kükrelamori, mhakünemi püh-e Poo küdelü lü küyiceri Ut püh pon thüprüh celü müla pra kütae rüyi ku to ti la, zita. 26Sücesü pukoe u malhü thi mizüri zo ta die puko tho puko dolü küpo die sü; Süzilize sopüh-e külayi “veta.” Zita. 27Eli, Jisu puko pe die sü; Thüma celacoe thiyi su, eli Poo celacoe süzimo. Kükrelamori, Pooe mha mütü thiyi zo tila, zita. 28Süsa Pitore Puce; yhie; Ha mha mütü vava die n sa müdzi tate; zita. 29Eli Jisu pu zü küla die, I nekoc e potü süto; Mipühri ala mu züyiküveo la pu ce mori pu sazühzüra, mori pu lipüne, pupo mori puzu, mori pu cemi mori pu nuneko mori pu cejü vava die; 30Tsüdo külhü ce mipo u müthimünyi küti zo kümosa u cekro mu u sazühzürako mu u lipüneko mu puzuneko mu u nuneko mu u cejüko dü thükra ngoyi külho ba mo; sü libizomori vori küto külhü lü küshothe kürhühri ngo yito. 31Süri kürami kükro nu tato, mu künumi rata to; zita.
Jisu Pu süh jüh küpo va süh-o
32Süsa puko Jerusalemlü kho tozü, mu Jisue puko mhuzü ta, süce pukoe u malhü thita, mu puko sa müdzi kütakoe müprühta. Sücesü Jisue mi kürikünako zühyi die puko ce puyo dipüh thita to bata sheli küti pukoce po die. 33Yhie! Ukoe ta Jerusalem kho tozüe, sidie mi Thümanuo khapüh pethiküzhoko mu lüsiküseko belü süva to, mu mi Pu müsava kütola Pu müjoto mu Pu khapüh mülükümomi belü sü die; 34Mipo Pu krühnyi mu Pu vü, mhütsa püh Pu yo sü, mu Pu dokhrito, mu Pu zho süh nha rhühla sü tato.
James mu John nyi küsho
35Sücesü Zebedee nu nyi James mu John unyi Puce khori die sü; kümüthao, hanyi nce mha kühopüh sho zori npo thi püh hanyi prü küto müri die tale, zisü. 36Jisu punyi yisü, apo dipüh thi küsü nenyi müdo to la? Zisü. 37Unyi Pu yisü, no zapozale thi küyice hanyi mipüh po nzaco mu mipüh po nveco bayi küve kha hanyi prüte; zita. 38Süri Jisu unyi yisü, nenyie sho kübao se dien sho ba mo; nenyie I kra to küba heo krayi veme? Mu I pü to küba dzüluo nenyi püyi ve me? Zisü. 39Mu punyi sü, hanyi thiyi ve; zita, Eli Jisu punyi yisü, nenyie I krato küba heo krayi ve mu I püto küba lü nenyio Baptis thiyi ve kütho mutse! 40Süri a zaco mu a veco ba kütoe I a müdolü khasü küyidi, süri somi la küsüh müta sheli süko la zo, zita. 41Mu kürikoe sü sesü die James mu johan nyi yo uko nümo ta. 42Süri Jisu puko ci püh Puce süyi die pukoce, mülükümomikoe u kükha yo küti kopo uko mhu nyepo thi tayo sidie puko küzhoko po puko kükha bayo küti neko ri se bato. 43Süri neko dolü zoe süziyi lho; eli neko dolü küzho thi künyio po neko cetao thito. 44Mu thüma kühopühri kürao thi künyimi po mütüko ceta thito. 45Kükrelamori, Thümanuo zori mipo pu shoyi thi mori pu mi shoyi thi mu mi kükro rhayi küto la pu pho khasü to vori küti la; zita. 46Süsa puko tasü Jericholü voriyi sidie Pu mu Pu sadziko mu thüma krode püh zi Jericholü ta prari, mu Timaeus nu püh Bartima mhüceoe shode shice ba die khrüti ba. 47Sülize pu süo Nazareth Jisu li küti se küsüce kra sezo die sü, David nu Jisu, no aphimüzhe süte zita. 48Mu mi kükro pupo kümükre ba no die pu kükha ta; eli pu se müto ku die sü David nuo a phimüzhe zo süyi; zi bata. 49Süsa Jisu thayi die mi po pu cisü nosü, mu puko mhüceo ci sü die pu ce, thüpuyite, süte, pu nci yoho, zisü. 50Mu pu pu bola khava die, sü die ta Jisu ce vorita. 51Süsa Jisu pu rüthi die; Apo n yo dipüh thi küsü n nü ta? Zisü. Mu mhüceoe Puce, kümüthao, apo a mhü mhangoyi zhe! Zita. 52Mu Jisu pu yisü, tavo tate, n kümülü tho n thi nve vaho; zisü, süzisü mütha pu mhü mha ngoyita, sidie pu Jisu samüdzi ta.
Currently Selected:
MARK 10: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
