MARK 15

Pilate mhuzülü Jisu ne küti küta

1Süsa tüsoyi mütha küswüh-o rüna sekrükühukoe kühu püh ci sü die pethiko mu lüsiküseko mu müthi kühu mütü Jisu phayi die Pu züh vo Pilate ce süva. 2Mu Pilate Pu kütso die; no Jewmi küdeo me? zisü. Pu pu zü küla die; No po küsüo sü zo, zita. 3Mu sekrüküzhoko mha kükro püh Pu müzho; eli Pu mhapühri küla muta. 4Süla Pilate Pu kütso la die, no mhapühri po lho zo me? Yhie mi mha di dü püh püh n mü Zho bata? zita. 5Süri Jisu mhapühri küla mo zo kütala Pilate pu malhü thita.

Jisu guva nodie zü kha küsü

6Sülie thünye Pühlü mi puce küzü püh kha u prü nodie sho lie süo kha küsü thüho ta. 7Sücesü Barabbas li küti püe mi sorkari kümütsu mhatho thi küsüce midokhri küva la tü püh süko zühn kha küma püh ta. 8Süze thümakoe ta khori die Pilate po hizü thi küvori bi die thi püh puko prü no die sho sü. 9Eli Pilate pukoce; Apo Judako küdeo püh neko küprü neko müdoto me? Zi die kütso. 10Kükrelamori, sekrüküzhooe Pu phimu die tü küsü se küba la. 11Süri sekrüküzhokoe pupo Barabbas püh puko prü sü noti makroo hüsü. 12Süri Pilate puko zü küla die, sülize apo Jewmi küdeo püh dipüh thi vata? Zisü. 13Mu pukoe se müto zodie sü; Pu püh guva te; zita. 14Eli, Pilate lasü; Pue dipüh küjo thi küva la ta? Zi la sü. Süri puko se müto ku die sü; Pu püh guva te, zilata. 15Süla Pilate makroo nü thi küva lü die Barabbas kha puko prü va, mu pu Jisu vü sü die Pu püh guva nodie kha puko belü süva.

Riwhümiko Jisu püh küthükrüh küta

16Süsa riwhümiko Pu züh sheticelü lüta. Sidie puko kro mütü ci künguyi. 17Sidie müreda küti khü püh Pu whü sü, mu tsahu küde pirüh thiyi die püh Pu piyo sü. 18Sidie pukoe; Jewmi küdeo, thi te; zi die Pu külu. 19Mu pukoe tükhrathü püh Pu pi vü, mhütsa püh Pu va, mu nükü prü Pu külu, zi. 20Sülize puko Pu püh küthükhrüh küva sa, Pu khü müreda kütio khiva die Pu Pu khü püh Pu yo sü. Sidie pu gu va küto la Pu züh prari ta. 21Süsa pukoe Cyrene püh Simon, Alexander mu Rufus nyi poe yi lüno vori küzüce pu kümu thi püh Pu kruso püh. 22Sidie puko Pu züh die Golgatha puco mi pikhuro li küti pühlüvori. 23Süsa pukoe hezo püh daru thi küva mir pü püh Pupo kra nota, eli Pu kra mu ta. 24Sülize pukoo Pu püh gu küvasa, Pu khüko püh somi zalü prari teshi die cethi khüle thi. 25Mu sücesü bavüdo süh-olü Pu püh gu va. 26Mu u pilü Pu kümüjo zü tho die, Jewmi küdeo; zi die tho püh ma. 27Sülize pukoe kürügomi küna; püh Pu zaco mu püh Pu veco zi die püh pu sa gu. 28Sücesü kütholüsilü; Pu püh thüzho küvarhüko saphiyite zi küti züo ti tsühyi. 29Sülize thüma pheliphe ti mütü pingü die; Hu! No kürüsuceo dorhü va die zho süh nha thi la kütoo. 30N tho n külayi die cross yono ta kirite; zi die Pu thata. 31Süsa bi sekrüküzhoko mu lüsiküseko ri Pu krünyi die huhu yisü, Pue kükremi külayiyo, eli putho Pu külayi lho; zi bata. 32Khrista, Israelmi küdeo! Pupo tsühi ri cross yono ta kirite, hapo ngo die mülüyi küto la; zi bata. Süze pu sa gu pü küba nyi ri Pupo müsü ta. 33Süze bavüdo shorüholü no vo thüci kütso zühbüh pü bata. 34Süsa bavüdo thüciolü Jisu se müto die sü; Eloi, Eloi, lamasabakthani, puco a Jihova, no dithie a khava la ha? Zita. 35Süsü se sü die u shice kübako humie sü; Co! Pu eli ci züta ho; zita. 36Süsa mi püh-e ta vo mha kümütsü khü püh kükhro zü mütsüyi die püh tükhrüthü yo süyi die püh pu po kra tozuta. Sidie sü Elijah vori Pu pühyi to ma lho shelhi pesüyi; zita.

Kra mhu küzhoo Pu zhopo thi küta

37Sülize, Jisu müyi müto sü die Pu rüpü khasü va. 38Sücesü, kürüsucelü khü u pilü lüno prü u phe kütso kro küna thita. 39Mu riwhümi kra mhu küzhooe rapeco ba die Pu se müto sü die Pu rüpü khasü küva ngo küsüce; Hiohi Poo nu kütho zo; zita. 40Sülize thünomi kümücu lüno tha die pe kübako; Magdalin Mary, James mu pu sazüh-o nyi zu Mary Jose mu Salome; 41Pu Galileelü kübace Pu shoyi thi küvoriko; mu mi kükro Jerusalem lüno Pu züh khori. 42Süsa thüva vorita mu kürülü tüsozhola mha küsüh mo küsu mhüzüce; 43Arimathiami Joseph thürho küpü, krüta mu pu thori Poo küde küvori müri tayo küti püh thüpu shüh die vori Pilate ce Jisu mo sho. 44Süsa Pilate-e Pu satü ta me moshi küti se küto la, kra pi küzhoo ci sü die pu sa küta tü puce kütso. 45Sidie krapi küzhoo celü setü küyi bi die pu thümoo püh Joseph prüva. 46Sülize pu linen khü khriyi mu Pu mo püh kiri die linen khüo püh küzüyi die Pu püh vo tsüpüh ho küma mhakhrelü va. Sidie kütsü phu küla püh mhakhre ta müka va. 47Mu Magdalin Mary mu Joseph ne zu Mary unyi Pu püh kükhrüh thi ngo.

Currently Selected:

MARK 15: NAG5BSI

Highlight

Copy