MARK 2
2
Jisu lasami püh thi küsürho küsü
1Süsa ri zho hu sa Jisue Capernaum lü lüri, mu thümakoe Pu celü vori ba küta seyita. 2Süsa thüma kükro vori künguyi ta, mu thüma krori küta la cekha kütso ri uthi di zota, sidie Pu süko ce züo püh posü. 3Süsa pukoe lasami püh mida po kükrepüh die züh puce vori. 4Süze pukoe thüma kroo la Pu müno voriyi sü küta la Pu küba müdü tülü cetu hopha sü die pu ziyo yono pu püh kürünu sü. 5Jisu puko kümülü ngo küsüce lasao yisü, anu, n küphomako va n prü vaho, zisü. 6Süri lüsiküse süce kübakoe utho ulü lüno sü; 7Dipüh la hiohi Poo kütha zü poyo shi? Poo zo kümosa sopühn mi küphoma va süyi veta? Zi bata. 8Süzisü mütha, Jisu Pu rupü lüno lüdoko seyi die puko yisü, dithi die nekoe ne lüno mhahikohi lüdo bata? 9Lasao yisü, N küphoma va n prü vaho, zi küsü mori sü die nzi püh shotayi te, zi küsünyi dipüh-o po rüyi kuta? 10Eli puko Thümanuoe cejüo yo küphomako ri vasüyi küve kuku ba küti seyi küto la pue lasao ce. 11I nce po süyo, sü nzi pühyi die ta n celü votate, zisü. 12Süsa pu vapühlü sü pu zi pühyi die mi mütü mhuzülüno taprata, sidie mi mütü po u malhü thi die Poo shu die sü, hae mha hizi küti ngomozo, zita.
Matthew (Levi li kütio) ci küyi
13Süsa Puta dzüküzho shico vo ta, mu thüma kro mütüri ta Pu ce vori, sidie Pu süko mütha sü. 14Mu Pu tavo küzü se, Pu Alphaeus nu Levi-e khazhanu kükhrü celü badie ngo küyice, pu n yisü, Asa müdziyite, zisü, mu pu ta Pusa müdzi ta. 15Süsa Jisu pu celü mhati tozu die vo ba küyice, khazhonu kükhrümi küphomami kükro ri vori die Jisu mu Pu sadziko züh bayi, kükrelamori puko thüma kükrota mu süko Pusamüdzi ta. 16Süze lüsiküseko mu Phariseeko Jisue khazhanu kükhrü mu küphomako züh die mhati küba ngo sü die Pu sadziko yisü; dipüh la Pu khazhonu kükhrüko mu küphomako züh mhati mhakra yo la! Zita. 17Jisu sü sesü die puko yisü, küsührhomi daru küsemi süh mori ve, süri küthimie süh mosü, Ie kümathomi ci mori küphomami po thülü küdeyi no küvori zo, zita.
Mvo küti dzüh kütso küta
18Sücesü John sadziko mu Phariseeko sadzikoe mvo ba, mu pukoe vori die Pu yisü, dipüh la John sadziko mu Phariseekoe mvo yo, mu nsadzikoe mvo yo mo la zi die kütso ta. 19Jisu puko Zü küla die sü, Zhosao cebülü küba nunekoe zhosao puko züh kübalüno mvo ba tayo ma! Zhosao puko züh küba the pukoe mvo batayi kündi. 20Putü vori to, sücesü mi puko celüno zhosao züh ta küta nha pukoe mvo tato. 21Mipüri khü küsapü khü kügwü yo mükhu yomo, süzi lize khü küsao khü kügwüo cekhro pü tayo, sidie pa müsu ku tayo. 22Mipühri khubühzü küsa püh thigibüh kügwülü sü yomo, mhaceno süzi lize khubühzü küsaoe thigibüh-o püpha vato, sidie khubühzü krüh prari ta mu thigibüh ri müka vato, süri mi khubühzü küsa püh thigibüh küsalü süyo.
Mi kürülüzho dzüh kütso küsü
23Kürülüzho püh nha Pu tasü ata yiko püthü vo zürü. Pu müthaküyikoe ata siko mürhü shudü ta. 24Süsa Phariseeko Pu yisü. Yhie puko dipüh la kürülüzho nha thüzho kümo thiyo zo la! Zita. 25Pu süko yisü, Neko David-e dibi die pu mu pu züh kütako müri kütace; 26Abiathar pethiküzhoo tüce, Jihova rüsucelü lü die pethiküzhoko zo kümosa kükremi po ti küti thüzho kümo mi mhüngo küthi tsükhrüdao khi tiyi mu püh pu sadziko ripo ti shi küti phi mayo mo me! 27Sidie Pu süko yisü, Thüma la kürülüzho thi küsüzo: kürülü zho la thüma thisü mo. 28Süzilize, thümanuoe kürülüzho mhuri nyepo zo zita.
Currently Selected:
MARK 2: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
