YAPHANG 28
28
1Hakhe Isak Jakobno ringhorwi hamari rw kha tei hai hwnwi sa kha, “Nwng khoroksa Kananjwkno phano ta káijak di. 2Bachaui Padan-aramo nwmani bupha Bethuelni nogo tháng di; aroni’-no nwmani bwta Labanni bwsajwk khoroksa swkno káijagwi di. 3Kwplaisa Kaitor#28.3: Kwplaisa Kaitor: Hibru kók bai “El-Saddai”.nono lukurokni bodol wngwi manna tẃi khe tei dopha kwbángmani bupha wngna bagwi hamari rw thung tei bwsa kwbángma rw thung. 4#Yap 17.4-8.Kaitor Abrahamno rwmani ha nwng tongwi tongmani hano mannani hamari nono tei nini bosongno rw thung!” 5Abo hai khe Isak Jakobno rwui rohor kha; bo Padan-aramni Labanni aro tháng kha, bo wng kha Bethuelni bwsla Aramsa, Jakob bai Esauni buma Rebekani bwta.
Esau tei khoroksa bwrwi káijakmani
6Esau nuk kha, Isak Jakobno hamari rwui Padan-aramo thángwi aroni bwrwino káijak di hwnwi sa phuru-o hai hwnwi sa kha, “Nwng Kananni khoroksa swk bwrwi bai phano ta káijak di,” 7tei Jakob bo bupha bai bumani kók khnaui Padan-aramo tháng kha. 8Hakhe Esau bupha Isak Kananjwkno khá phurjak ya nuk kha, 9Esau Ismaelni thani thángwi bini bwrwino karwi tei khoroksa bwrwi na phi kha, bini tongma hikno karwi Abrahamni bwsla Ismaelni bwsajwk Mahalatno káijak kha, bo Nebaiotni bahanok.
Jakob Bethelo imang nukmani
10Jakob Birsebani nongkhorwi Haran bwkhak lam rw kha. 11Bo kwrẃngsa-o phai sók phai khe sal hap kha, horo arono tong kha, bo aroni holongdap dulsa naui aro’-no kobongwi rokoui muktrwi tháng kha. 12#Joh 1.51.Hakhe bo imango yakhili kaisa ha saka-o songchajak nuk kha, abo chuknoha-o nangwijak; hakhe nai di Kaitorni suarirok aboni saka-o kasa lai-o tei nongkhor lai-o khe tong lai-o! 13#Yap 13.14-15.Hakhe nai di Subraiyung aboni saka-o bachajak khe hai hwnwi sa kha, “Ang nwpha Abrahamni Subraiyung Kaitor tei Isakni Kaitor; nwng rokoui tongmani o hano ang nono tei nini bosongrokno rwnai; 14#Yap 12.3; 22.18.tei nini bosongrok ha sakani hadlwi hai khe bángnai tei nini bosongrok salkabai, salthángbai tei salgrabai salsibai bwkhak bórokni hano phuarnai. Hakhe nini bising tẃi’-no nini bosongrokni bising tẃi khe ha sakani bebak dopharokno hamari rwnai. 15Nai di, ang nwng bai tongo nwng tháng thani’-no ang nono hamyani kati rwui tonnai. Ang nono o ha-ono ha-o kiphilwi tubu phinai. Ang nono samarok khlai pái yasak’-no ang nono yakar glak.”
16Jakob thumani sichaui hai hwnwi sa kha, “Kubui’-no Subraiyung oro tongo; ang omono saui man li ya.” 17Hakhe bo kirijagwi hai hwnwi sa kha, “Omo bwswk kirimasingcha! Omo Kaitorni nok wng ya wng glak; omono chuknohani duglam wng kha.”
18Hakhe Jakob teini phung aidrobo bacha kha tei bo kobongmani a holongno thongla kuchuk snamwi aboni saka-o thok lu-ui rw kha. 19Tei bo aboni mung “Bethel”#28.19: Bethel: O kók Hibru kók bai khe “Kaitorni nok” hwnwi hwnma bai baksa. hwnwi phar kha; tamo khe swkango a kamiyungni mung Luj se tongmani. 20Jakob Subraiyungni mungwi swmai tangwi hai hwnwi sa kha, “Tumung ang ani lama tháng thani-o Kaitor ang bai baksa tongwi ano hamyani kati rwui tong khe tei kanmung, chámungrok rw khe, 21phiya ang kaham kwrwng khe aphani nogo kiphilwi man khe nwng ani Kaitor wngnai, 22tei o holong thongla ang tisama Kaitorni nok wngnai; tei nwng ano rwmarokni bebakni’-no, ang chi-o kaisa rwnai.”
Currently Selected:
YAPHANG 28: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
