JOHON 11

Lasar thwimani

1Bethania-o tongnai Lasar hwnwi borok khoroksa hamya khlaimani. Bethania wng kha Mariam bai bini bukhuk Martha tongmani kami.#Luk 10.38-39. 2(O Mariam’-no Subraini yakungo thok motom phulwi bini bwkhnai bai hu-ui rwnai; bini takhuk Lasar’-no hamya klainai.)#Joh 12.3. 3A bukhuknwirok Jisuni thani hai hwnwi kók kwchárwi rohor kha, “Subrai, nini khájani borok hamya klaiwi tong kha.”

4Jisu abono khnaui hai hwnwi sa kha, “Lasar o hamya klaimani omo bo thwimani ya, omo Kaitorni chẃngsachani bagwi wngma se. Aboni bising tẃi Kaitorni Sajlabo chẃngsacha khlaijak anw.”

5Jisu Martha bai bini bukhuk tei Lasarno hamjago. 6Hakhe Lasarno hamya klaijak hwnwi khnaui bo tong thani o tei nokha salnwi tong kha. 7Aboni ulo Jisu sagrirokno hai hwnwi sa kha, “Hwm tho, chwng Judia-o kiphilwi tháng lai anw.”

8Sagrirok bono hai hwnwi sa kha, “Hodakra, u akhuli se Judairok nono holong khitarna naimani, aro’-no aro se nwng tháng phina nai-o?”

9Jisu hai hwnwi sa kha, “Dam chiknwi khe se salsa wngo, ahai ya diba? Aboni bagwino sal pháng-phángo himnai borok bo usta khu ya, tamni hwn khe bo o swngcharni pohor nukjak. 10Phiya horo himnai borok bo yakung thutainai, tamni hwn khe bini bisingo pohor kwrwi.” 11Jisu abono saui hai hwnwi kók manju kha, “Chini takhuk Lasar muktrwi thángwi tong kha, hakhe ang bono sochana bagwi thángnai.”

12Sagrirok hai hwnwi sa kha, “Subrai, thu-ui tong khe bo ham anw.”

13Aile Lasar thwi kha hwnwi Jisu samano se, bórok sói thumano sa khna hwnwi tong lai-o. 14Aboni bagwino Jisu bórokno srai-srai hai hwnwi sa kha, “Lasar thwi kha. 15Aro ang kwrwini bagwi norok poito khlai anw, hakhe norokni bagwi ang tongthogo. Hwm tho, bini aro tháng lai anw.”

16Thoma (bono Apherbo hwno) bini logisongrokno hai hwnwi sa kha, “Hwm tho, chwngbo thángwi bo’ bai baksa butharjak anw.”

Jisu se mwthangwi tisanai

17Jisu thángwi sógwi khe saui man kha Lasar nokha sal brwi swkang’-no phobjak kha. 18Bethania bai Jerusalem mail kwnwi swk chal anw, 19hakhe Judairok kwbángma Mariam bai Marthano bórokni takhuk thwimani bagwi khá kwchang rwna phai kha.

20Jisuno phai-o hwnwi khna kheno Martha bo bai malaina tháng kha, Mariam khe nogo’-no tong rwk kha. 21Martha Jisuno hai hwnwi sa kha, “Subrai, nwng oro tongma tlai ani takhuk thwi glak kha mun. 22Hai phano ang saui mano, tabuk phano nwng Kaitorni thani mungsa swk san khe bo abono’-no nono rwnai.”

23“Nini takhuk thangwi bachanai,” hwnwi Jisu sa kha.

24Martha bono hai hwnwi sa kha, “Bo páithakni salo thangwi bachanai hwnwi ang saui mano.”

25Hakhe Jisu bono hai hwnwi sa kha, “Ang’-no mwthangwi tisanai, ang’-no kwthang khe tonnai. Ano poito khlainai borok bo thwi phano thangnai. 26Phiya kwthang tongsani ano poito khlainai borok bo thwi phlai glak. Nwng o kókno poito da khlai?”

27Bo hai hwnwi sa kha, “I’n, Subrai, nwng’-no swngcharo phaina hwnnai Kaitorni Sajla a Masia hwnwi ang poito khlai-o.”

Jisu kapmani

28O kókno sa baiwi Martha kiphilwi thángwi bini bukhuk Mariamno tepsa khe ringwi hai hwnwi sa kha, “Hodakra sók phai kha, bo nono ringo.” 29Mariam abono khna kheno bachaui bo bai malaina do lang kha. 30(Jisu kami-o sók phai súk ya kho, Martha bo bai malai thanio’-no tong kho.) 31Khá kwchang rwna hwnwi Mariamni nogo tongnai Judairok bono bachaui do langma nuk kheno rwkthar lai kha, bórok bono kapna bagwi mangkhorno se tháng khna hwnwi tongo.

32Mariam Jisu tong thani thángwi bono nugwi khe bini yakungo klaiwi hai hwnwi sa kha, “Subrai, nwng oro tongma tlai ani takhuk thwi man glak kha mun.”

33Bo kabwi tongmano Jisu nuk kha, bini logi phainai Judairok kabwi tongmanobo nuk kha. Bo khá nangjak kha, hakhe khá yokjagwi 34“Norok bono buro phob kha?” hwnwi sẃng kha.

“Subrai, phai di, nai phai di,” hwnwi bórok sa kha.

35Jisu kap kha. 36Hakhe Judairok hai hwnwi sa lai kha, “Nai di, bo bono bwswk hamjakmani!”

37Phiya baksa ba hai hwnwi sa lai kha, “Bo phulanobo mokol nuk rw kha, hai ya diba? Lasarnobo thwi ya tẃi khe mungsa phano khlai man glak kha mun da?”

Lasarno mwthangmani

38Haino hai Jisu khá yokjagwi mangkhor gana-o tháng kha, abo wng kha ha bugurung, búkhúgo holongdap muthupjak. 39“A holongdapno norwi khibi di,” hwnwi Jisu dagi kha.

Hakhe thwinaini bukhuk Martha hai hwnwi sa kha, “Subrai, mw se mwnam khna, bono phobmani nokha hor brwi wng kha!”

40Jisu bono hai hwnwi sa kha, “Poito khlai khe Kaitorni chẃngsacha nuk anw hwnwi ang nono sa ya da?” 41Hakhe bórok holongdap norwi khibi kha. Jisu naisaui hai hwnwi sa kha, “Apha, nwng ani kók khna kha hwnwi ang nono hambai rw-o. 42Ang saui mano nwng ani kók khna máng tongo, nwng’-no ano rohoro hwnwi oro tongnairok poito khlai thung hwnwi se ang o kók sa-o.” 43O kók sa baiwi bo hai hwnwi chirikhók kha, “O Lasar, ongkhorwi phai di!” 44Hakhe a kwthwi ongkhorwi phai kha, bini yakung yak rí bai buljak, bumukhang bo rí bai khapungjak. “Khengwi rw di, rohor di bono,” hwnwi Jisu bórokno sa kha.

Jisuno butharna kók chap laimani

(Mat 26.1-5; Mar 14.1-2; Luk 22.1-2)

45Mariamni aro phainai Judairokni bere baksa baksa Jisu khlaimano nugwi bono poito khlai kha. 46Phiya bórokni bere baksa Pharisairokni aro kiphilwi thángwi Jisu khlaimanino saui khna rw kha. 47Aboni bagwino Pharisairok bai ochai okrarok Kaunsil ringwi hai hwnwi sa lai kha, “Chwng tamo khlainai? O borok soidomni samung máng se khlai tong kha! 48Chwng bono omo hai khlai rwui ton khe jotono bono poito khlainai. Hakhe Rumsong phaiwi chini nokthar bai chini dophano sokomor phainai.”

49Kaiapha hwnwi bórokni bere a bisini ochai bokhorok hai hwnwi sa kha, “Norok ba mungsa phano si ya se bla! 50Bebak dopha sokomorjakmani slái aswk borokni bagwi khoroksa thwima se ham kugo hwnwi norok uansugui nai ya diba?” 51Bo o kók bini bai samani ya; a bisini ochai bokhorok wngma bai se Jisu Judairokni bagwi thwina nai-o hwnwi bo o kók swkang’-no sa-o. 52Bórokni bagwi simi ya, bo piring-poroi wngwi tongnai Kaitorni bwsarokno thumwi thansa khlaina bagwibo thwina nai-o.

53Aboni bagwino a salni simi Judai hodarok Jisuno butharna hwnwi kók chap lai kha. 54Hakhe Jisu Judia-o pháng-pháng khe him li ya, tamo khe bo aro tong yaui hasing panthor gana Ephraim hwnwi tauno tháng kha, bo aro bini sagrirok bai tongwi kha.

55Aphuru Judairokni Yókma Ter samphajak. Hakhe ter bwskango súchajakna hwnwi hani aswk bororok Jerusalemo tháng kha. 56Bórok Jisuno naituk lai kha, hakhe noktharo kuthum lai phuru bórok kiching bórok hai hwnwi sa lai kha, “Norok tamo hwn? Bono tero phai thotok da wngjak?” 57Jisu buro tong abo khoroksa swk phano saui man khe a borok a kókno ma se ma sa phainai hwnwi ochai okrarok bai Pharisairok saui rw bai kha. Hakhe bórok bono romwi man anw.

Currently Selected:

JOHON 11: KOKBSI

Highlight

Copy