JOHON 16

1“Norok ta uslu thung hwnwi se ang norokno o kók sa-o. 2Norokno bórok thumnokni basi anw. Omo hai sal phai anw, khoroksa swk norokno buthar khe Kaitorni samung khlaijak kha hwnwi bo khá ka anw. 3Bórok Aphanobo siniui man ya, Anobo siniui man yani bagwi se norokno omo tẃirok khlai anw. 4Bórok omo tẃirokno khlainani jora sók phai khe ang o kók samano norok muitu manjak thung hwnwi se ang omono sa-o.”

Phola Kwtharni samung

“Norok bai tongma bagwi se ang swkango o kókrokno sa ya. 5Tabuk le ano rohornaini aro ang tháng anw, ahai phano nwng buro thángna nai hwnwi norokni bere ano khoroksa phano sẃngnai kwrwi. 6Tabuk ang norokno o kókrokno sa kha ba norok khá hamya wngjak bai kha. 7Ahai phano ang norokno sóino kubuk kók sa-o, ang thángmani abo norokni bagwi kaham se. Tamni hwn khe ang tháng ya khe a Chubanai norokni thani phai glak; phiya ang tháng khe norokni thani bono rohor anw. 8Hakhe bo phaiwi o swngcharni cha yano phunuk anw; sumsokno tẃi, kahamno tẃi phiya Kaitorni bujno tẃi bórokni cha yano phunuk anw. 9Sumsokno tẃi bórokni uansukma cha ya, tamni hwn khe bórok ano poito khlai ya; 10kahamno tẃiwi bórokni uansukma cha ya, tamni hwn khe Aphani aro ang thángna naiwi tongo, hakhe norok ano tei nuk glak; 11bujno tẃi bórokni uansukma cha ya, tamni hwn khe o swngcharni bugra buj thumjak kha.

12“Ang norokno sanani kwbángma tongo, tamo khe norok abono tabuk soiwi man glak. 13Phiya Kubuini Phola phaiwi bo norokno lama soui bebak kubui-o tlangnai. Bo bini bai kók sa glak, bo khnamano se sanai, phiya tamo tamo wngno abórok norokno sanai. 14Bo ano chẃngsacha khlainai, tamni hwn khe ang sana hwnmano bo norokno sanai. 15Aphani aro aswk tongmarok bebak ani máng se, aboni bagwino ang Pholano rwmani abono bo norokno khna rwnai hwnwi ang norokno samani.”

Tabuk ma khákham phano ulo tongthok anw

16“Tei srapsa tong khe norok ano tei nuk glak, phiya aboni srapsa ulo nuk phir anw. Tamni hwn ba ang Aphani thani thángnai.”

17Hakhe baksa sagrirok hai hwnwi sa lai kha, “ ‘Tei srapsa tong khe norok ano nuk glak, phiya aboni srapsa ulo nuk phir anw,’ hwnwi bo sa kha, bo hai hwnwi’-bo sa kha, ‘Tamni hwn khe ang Aphani aro thángna naiwi tongo.’ Bo o kók samarok tamo sla?” 18Bórok hai hwnwi sa kha, “ ‘Tei srapsa,’ hwnmani abo tamo? Bo abo tamo hwnwi sa chwng saui man ya!”

19Bórok bono sẃngna muchungjak laiwi tongmano Jisu saui manẃi bórokno hai hwnwi sa kha, “ ‘Tei srapsa tong khe norok ano nuk glak, phiya aboni srapsa ulo nuk phir anw,’ hwnwi ang samano da norok kiching norok sa lai? 20Ang norokno sóino kubui kók sa-o, norok kap lai-kok lai ma wng anw, swngchar khe tongthokjak anw. Norok ma khákham anw, phiya norokni khákhamma ulo khe tongthok anw. 21Bwrwirok sak kengna phuru jobor uanama klaijago, tamni hwn khe bini tekto manna jora sók phai kha. Phiya a chwrai achai bai khe o swngcharo chwrai khoroksa achai kha hwnwi tongthokma bai bo a tektono pogwi thángo. 22Norokbo ahai’-no: tabuk norok khákhamjak, phiya ang norokno hai’-no hai nai phir anw. Hakhe norok tongthok anw, a tongthokno khoroksa phano norokni yakni segwi tlangwi man glak.

23“A salo norok ano mungsa phano san glak. Ang norokno sóino kubui kók sa-o, Aphano ani mungwi mungsa swk san khe bo abono norokno rw anw. 24Tabuk phano norok ani mungwi mungsa phano san ya kho; san di, man anw, hakhe norok jai kheno tongthokjak anw.”

Ang o swngcharno mechen kha

25“Ang norokno rwngthoma bai se o kókrokno sa-o. Phiya omo tẃi sal phai anw ang rwngthoma bai tei sa glak; aphuru Aphani kókno ang norokno pháng-pháng khe sa anw. 26A salo norok ani mungwi bono san anw; ang norokni bagwi san anw o kókno sa ya, 27tamni hwn khe Apha sak baithang norokno hamjago. Norok ano hamjago, phiya ang Kaitorni aroni phai-o hwnwi norok poito khlaima bai se bo norokno hamjago. 28Ang Aphani aroni phimani, ang o swngcharo phaimani; ang tabuk o swngcharno khibiui Aphani aro thángna naiwi tongo.”

29Hakhe bini sagrirok hai hwnwi sa kha, “Nai di, nwng tabuk rwngthoma bai sa yaui pháng-pháng khe sa-o. 30Nwng bebak kókno saui mano hwnwi chwng tabuk saui man kha, hakhe khoroksa swk bai phano nwng sẃngjakna nang ya. Aboni bagwino nwng Kaitorni aroni phaimani hwnwi chwng poito khlai kha.”

31Jisu bórokno hai hwnwi sa kha, “Norok tabuk poito da khlai? 32Omo tẃi sal phai rwrwgo, abo tabuk’-no sók phai se tong kha, aphuru norok piring-poroi wngwi janija nogo tháng anw, ang saichung susuk khe khibiui klangjak anw. Phiya Apha ang bai tongmani bagwi ang saichung susuk ya. 33Ang bai thansa khe tongwi norok khá kwchang thung hwnwi ang o kók sa-o. O swngchar norokno sátoknai, hai phano khá rak di. Ang o swngcharno mechen kha!”

Currently Selected:

JOHON 16: KOKBSI

Highlight

Copy