JOHON 8
8
Bwrwi khoroksano Jisuni thani tubumani
1Hakhe jotono nogo tháng bai kha. Aphuru Jisu Tháistwi hathái-o tháng kha. 2Teini phungo aisirisiri bo noktharo kiphilwi phai kha. Aswk borok kuthumui phai kha, hakhe bo achugwi phrwng kha. 3Aphuru Kerong phrwngnairok bai Pharisairok uaijaui tongma jora manjaknai bwrwi khoroksano tubu-ui bebakni bwskango bacha rw phai kha. 4Bórok Jisuno hai hwnwi sa kha, “Hodakra, o bwrwi katswi uaijaui tongma jora’-no manjak kha. 5Chini Kerongo Musi omo tẃi bwrwino holong khitarwi buthar di hwnwi dagiui klang kha. Nwng le tamo hwn sla?”#Leb 20.10; Uái 22.22-24. 6Bórok Jisuno khẃi-o ká rwui bono majra berwi manna tẃi khe omono sama se.
Hakhe Jisu bomsonwi yasi bai khe ha-o rik kha. 7Bórok bono sẃng máng tongma bai Jisu bokhorok tisaui hai hwnwi sa kha, “Norokni bere sumsok kwrwi borok bo’-no swkang khitar thung.” 8Hakhe bo bomson phirwi ha-o rigwi tong phi khua.
9Bórok o kókno khnaui sak sakno uansugwi naiwi bwkha-o nangjak lai kha, hakhe okrani simi mareui khoroksa khoroksa khe tháng kha. Jisu saichung se tong rwk si-o tei a bwrwi khe aro thóng-thóng bachajak.
10Bo bokhorok tisaui a bwrwino hai hwnwi sa kha, “Bwrwima, a bororok la? Nono majra bernairok oro khoroksa phano kwrwi kha da?”
11“I’nhi, Subrai, khoroksa phano kwrwi kha,” hwnwi bo sa kha.
Jisu hai hwnwi sa kha, “Hakhe angbo nono majra ber ya. Tháng di, tabukni simi sumsok ta khlai si di.”
Jisu se swngcharni pohor
12Jisu bórokno tei uáisa hai hwnwi sa kha, “Ang’-no o swngcharni pohor. Ano rwktharnai borok bo mwnakma-o ma him glak, phiya thangnani pohor mannai.”#Mat 5.14; Joh 9.5.
13Pharisairok bono hai hwnwi sa kha, “Omo ba nini bagwi nwng sakki rwma se bla, nini o sakki samung nang ya.”#Joh 5.31.
14Jisu hai hwnwi sa kha, “I’nhi, ani bagwi ang sakki rw phano ani o sakki kubui se, tamni hwn khe ang buroni phai buro thángnai abo ang saui mano; phiya ang buroni phai buro thángnai abo norok saui man ya. 15Norok wng kha borokni uansukma tẃi majra bero; ang le khoroksano phano majra ber ya. 16Ang majra ber phano abo sói se, tamni hwn khe oro ang saichung ya, ano rohornai Apha ang bai tongo. 17Khoroknwi sakki rwmani thansa hwn khe a sakki kubui hwnwi norokni Kerongo swijak tongo. 18Ani bagwi ang sakki rw-o, ano rohornai Aphabo ani bagwi sakki rw-o.”
19“Nwpha buro?” hwnwi bórok sẃng kha.
“Norok anobo sini ya, Aphanobo sini ya. Norok ano sinima te Aphanobo sini kha mun,” hwnwi Jisu sa kha.
20Noktharo rang tonjaknai japarok tong thani Jisu phrwng twtwi-o kókrokno sa kha. Aphuru khoroksa phano bono romnai kwrwi, tamni hwn khe bini jora sók phai ya kho.
Ang tháng thani-o norok thángwi man ya
21Jisu bórokno tei uáisa hai hwnwi sa kha, “Ang thángna nai kha; norok ano naituk anw, phiya norokni sumsogo norok thwi anw. Ang tháng thani-o norok thángwi man ya.”
22Hakhe Judai hodarok hai hwnwi sa kha, “Bo ba saichung saichung da thwina nai? Aboni bagwi da ‘Ang tháng thani o norok thángwi man ya,’ hwnwi bo ba sa?”
23Jisu hai hwnwi sa kha, “Norok wng kha hacherni, ang wng kha kuchukni. Norok wng kha o swngcharni, ang wng kha o swngcharni ya 24Aboni bagwino norokni sumsogo norok thwi anw hwnwi ang sa-o. ‘Ang’-no Bo,’ hwnwi poito khlai ya khe norokni sumsogo norok thwi anw.”
25“Nwng sabo?” hwnwi bórok bono sẃng kha.
Jisu hai hwnwi sa kha, “Yaphangni simi’-no ang ba sa kha bla. 26Norokno sanani tei majra bernani khe ani kwbángma se tongo. Ano rohornai bo wng kha kubui, hakhe bini thani khnamano simi se ang swngcharno sa-o.”
27Bo Buphani kókno samano bórok romwi man li ya. 28Hakhe Jisu hai hwnwi sa kha, “Borokni Sajlano norok kuchugo tisa phuru ‘Ang’-no Bo.’ hwnwi norok saui man anw. Aphuru norok saui man anw ang ani bai mungsa phano khlai ya, Apha phrwngmano simi se ang sa-o. 29Ano rohornai bo ang bai’-no tongo; bo ano saichung khe yakarwi klang ya, tamni hwn khe bo hamjakma samungno ang khlai máng tongo.”
30Jisuni o kókrokno khnaui borok kwbángma bono poito khlai kha.
Kubui norokno phiyóknai
31Aboni bagwino bono poito khlainai Judairokno Jisu hai hwnwi sa kha, “Ang sama hai norok tong khe hai khe se norok sói’-no ani sagri. 32Norok kubuino saui mannai, hakhe a kubui’-no norokno phiyóknai.”
33Bórok hai hwnwi sa kha, “Chwng Abraham bosongni borok, keboni seleng chwng wngwi phai ya kho. Hakhe ‘Norok phiyókjaknai,’ hwnwi nwng abo tamni kók sa ba?”#Mat 3.9; Luk 3.8.
34Jisu bórokno hai hwnwi sa kha, “Ang norokno sóino kubui kók sa-o, sumsok khlainai borok bo sumsokni seleng se. 35Seleng le nogo tong phlainai ya, sajla se tong phlainai. 36Hakhe Sajla norokno phiyók khe se norok yók súk nai. 37Norok Abraham bosongni borok hwnwi ang saui mano, ahai phano norok ano butharna nai-o, tamni hwn khe ang samani kókno norok khá hapjak ya. 38Apha ano phunukmarokno se ang sa-o, phiya norok khe norokni nwpha sama hai khlai-o.”
39Bórok hai hwnwi sa kha “Abraham se chini apha.”
Jisu hai hwnwi sa kha, “Norok sói’-no Abrahamni bwsa wngma tlai bo khlai langma hai’-no norokbo khlai kha mun. 40Kaitorni thani khnamani kubuino simi se ang norokno khna rw-o, hai phano se norok ano butharna nai lai-o; Abraham abo hai khlai lang ya. 41Norokni nwpha khlaima hai’-no norokbo khlai-o.”
Bórok hai hwnwi sa kha, “Chwng mung nangjak bwsa ya. Chini apha khoroksa se, abo wng kha Kaitor se.”
42Jisu bórokno hai hwnwi sa kha, “Kaitor sói’-no norokni nwpha wngma tlai norok ano hamjak kha mun; tamni hwn khe ang Kaitorni aroni phaimani se, hakhe ang tabuk oro tongo. Ang ani bai phaimani ya, bo rohorma bai se phai-o. 43Ang samo’-no norok tamo wngwi romwi man ya wng? Kók khe ahai se, ang samano norok khnathokjak ya. 44Norok wng kha norokni nwpha Soitanni bwsa gwja! Hakhe norokni nwphani muchungmano norok asi yók rwna nai-o. Yaphangni simi’-no bo borok butharnai. Bini thani kubui kwrwini bagwi bo’-bo kubuini bwkhak kwrwi. Bo kók tatal sa phuru khe bini tongmung tẃi’-no abono sa-o, tamni hwn khe bo’-no tatal ba, tatalni bothomabo bo’-no. 45Ang kók kubuino sama bai se norok ano poito khlai ya. 46Ani sumsok tongo hwnwi norokni bere sabo phunugui mannai tong? Ang kók kubuino sa khe norok tamo wngwi ano poito khlai ya wng? 47Kaitorni aroni phainai borok bo Kaitorni kók khna-o. Norok hai phano Kaitorni aroni ya, aboni bagwi norok ani kók khna ya.”
Abraham bai Jisu
48Judairok Jisuno hai hwnwi sa kha, “Nwng Samariasa se, nwng mwtai hamya kolobjak, chwng o kók samani abo sói ya diba?”
49“Ang mwtai hamya kolobjak ya,” hwnwi Jisu sa kha. “Ang Aphano bóri-o, phiya norok khe ano bóri ya. 50Ang ani sakni mwkhang chẃng rwna nai ya, abono chẃng rwna nainai khoroksa tongo, bo ani bwkhak kók sa-o. 51Ang norokno sóino kubui kók sa-o, ani kók khnanai borok bo thwi phlai glak.”
52Judairok bono hai hwnwi sa kha, “Chwng tabuk saui man súk kha nwng mwtai hamya kolobjak’-no! Abrahambo thwi kha, diyarirokbo thwi bai kha, hai phano se ‘Ani kók khnanai borok bo thwi phlai glak,’ hwnwi nwng saui tong kho. 53Chini apha Abraham thwiwi tháng kha, Abrahamni slái phano nwng kotor diba? Diyarirokbo thwiwi tháng bai kha. Nwng nono sabo hwn?”
54Jisu hai hwnwi sa kha, “Ang ani sakni mwkhang chẃng rw khe abo mungsa dalo klai ya. Ani mwkhang chẃng rwnai khoroksa tongo, abo ani Apha; norokbo abono’-no ‘Chini Kaitor,’ hwnwi sa laiwi tong lai-o. 55Norok bono sini ya kho, ang le bono sinijak se. Ang bono sini ya hwnwi sa khe norok hai’-no angbo tatal wngnai. Tamo khe ang bono sini-o, bini kókbo khna-o. 56Norokni nwpha Abraham ani sal naina hwnwi khatung-khaja wng lang kha, hakhe bo abono nugwi tobo tongthokjak lang kha.”
57Judairok bono hai hwnwi sa kha, “Nwng tabukbo nokha bisi bachini borok wng ya kho; nwng Abrahamno nu nuk rwk kha ba?”
58Jisu hai hwnwi sa kha, “Ang norokno sóino kubui kók sa-o, Abraham achai ya sini’-no ‘Ang tongo.’ ”
59Hakhe bórok bono khitarna hwnwi holong khocha lai kha. Aphuru Jisu sak samlogwi noktharni ongkhorwi tháng kha.
Currently Selected:
JOHON 8: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
