LUK 10
10
Sagri snichinwirokno pírna rohormani
1Aboni ulo Subrai teibo sagri khorok snichinwirokno chong kha. Bo thángna hwnwi tongma kamirogo taunrogo bórokno khoroknwi khoroknwi khe rohor gra kha. 2Bo bórokno hai hwnwi sa kha, “Mai kwbángma munui tong kha, yang le ranai se báng ya. Aboni bagwino bini mai rana bagwi teibo borok rohor di hwnwi nokphangsano san di.#Mat 9.37-38. 3Tháng di, geguma kwcharo mera bwsano rohorma hai khe ang norokno rohor kha.#Mat 10.16. 4Rang buya, bogol buya, yaklap buya mungsa phano ta tẃi di. Khoroksano phano khulumna bagwi lama-o ta bathak di. 5Nogo hap kheno ‘O nokni kaham wng thung,’ hwnwi sa gra di. 6Aro bwkha kaham borok tong khe norok kaham wng thung hwnmani a kók bini thani nang thung; kwrwi khe ba norokni a kók ta nang thung. 7A nogono tongwi bórok chána-nungna rwmano cháui tong di, tamni hwn khe samung tangnaisa bini samungni rang manthai klai-o. Nok khungsa khibiui tei khungsa-o ta tháng di.#1Ko 9.14; 1Ti 5.18. 8Norok habwimani taunni bororok norokno yachak sok khe bórok chána rwmano’-no chá di. 9A taunni hamyarokno ham rwui aroni bororokno hai hwnwi sa di, ‘Kaitorni ha norokni gana sók phai kha.’ 10Phiya norok habwimani taunni bororok norokno yachak sok ya khe lama-o ongkhorwi thángwi hai hwnwi sa di, 11‘Norok hus wng thung hwnwi chini yakungo norokni taunni hadlwi nangmano suda chwng hu-ui klango. Hai phano o kókno si di, Kaitorni ha norokni gana sók phai kha!’#Sam 13.51. #Mat 10.7-14; Mar 6.8-11; Luk 9.3-5. 12Ang norokno o kók sa-o, Jerani Salo a taunni slái phano Sodomno Kaitor maya chá kuk anw.”#Yap 19.24-28; Mat 11.24; 10.15.
Poito kwrwi taunrok
(Mat 11.20-24)
13“O Khorasin, nwng bwswk se hamya sitrano! O Betsaida, nwngbo bwswk se hamya sitra no! Norokni bisingo ha-o nuk ya samung khlaijakma hai Tur bai Sidono khlaijakma te aroni bororok sumsok yakar kha hwnwi phunukna bagwi bumasíngo’-no pudri kanwi sago thapla phulwi achugwi tong kha mun.#Jis 23.1-18; Esk 26.1—28.26; Jol 3.4-8; Amo 1.9-10; Sak 9.2-4. 14Jerani salo norokni slái phano Tur bai Sidono Kaitor maya chá kuk anw. 15Nwng la Kapharnaum! Nwng da chuknoha swk chukna naimani! Nwng morke-o khiklaijak anw!”#Jis 14.13-15.
16Jisu bini sagrirokno hai hwnwi sa kha, “Norokni kók khunju kannai borok bo ani kókno khunju kano; norokno yachak ya borok bo ano yachak ya; ano yachak ya borok bo ano rohornaino yachak ya.”#Mat 10.40; Mar 9.37; Luk 9.48; Joh 13.20.
Sagri khorok snichinwirok kiphilmani
17Sagri khoroksnichinwirok tongthokma bára khe kiphilwi hai hwnwi sa phai kha, “Subrai, chwng nini mungwi dagi khe mwtai hamyarok suda chini kók ma khna-o.”
18Jisu hai hwnwi sa kha, “Ang Soitanno nokha philikma hai khe nokha sakani klaima nuk kha. 19Khna di, ang norokno chibuk sindrai saka tẃi kachrebwi thángwi mannani phan rw kha, Soitanno mechen suknani phanbo rw kha; mungsa phano norokno hamya khlai man glak.#Lob 91.13. 20Hai phano mwtai hamyarok norokni kók ma khna kha hwnwi ta tongthok di; tamo khe chuknoha-o norokni mung swijak kha hwnwi se tongthok di.”
Jisu khápang srangjakmani
(Mat 11.25-27; 13.16-17)
21Jisu aphuru’-no Phola Kwthar bai khápang srang rwjagwi hai hwnwi sa kha, “O chuknoha bai swngcharni bugra Apha. Ang nono hambai rw-o, tamni hwn khe nwng elem gwnang bai sinairokno khogwi tongmano siyarokno si rw kha. Au, Apha, nwng omono’-no kaham hwnwi khá chongmani.
22“Apha ani yago bebak’-no rw bai kha. Aphano karwi Sajlano sininai kwrwi, phiya sajla bai Sajla sini rwna muchungma borokno karwi Aphano sininai kwrwi.”#Joh 3.35; 10.15.
23Sagrirokni phaising uphilwi Jisu bórokno simi hai hwnwi sa kha, “Omorokno nukma bai norok hamchajak! 24Ang norokno o kók sa-o, norok nukmano aswk diyarirok bai aswk bugrarok naina muchungwi suda nuk ya, norok khnamano khnana muchungwi suda khna ya.”
Samariani borok kahamsani rwngthoma
25Kerong phrwngnai khoroksa Jisuno potaliui naina bagwi phaiwi hai hwnwi sẃng kha, “Hodakra, kwthang tong phlaina hwn khe ang tamo ma khlaithai klai?”
26“Kerongo tamo swijak tong? Nwng tamo saui man kha?” hwnwi Jisu bono sẃng kha.
27Hakhe bo hai hwnwi sa kha, “ ‘Nini Kaitor Subraino nini khá bai khúk bai yak bai uansukma bai hamjak súk di,’ phiya, ‘Nwng sakno hamjak tẃino buinobo hamjak di.’ ”#Uái 6.5; Leb 19.18.
28Jisu hai hwnwi sa kha, “Sói kókno sa kha; omo hai’-no khlai di, hakhe thang anw.”#Leb 18.5. #Mat 22.35-40; Mar 12.28-34.
29Tamo khe Kerong phrwngnai sak rwngjakmano bólaiwi Jisuno hai hwnwi sẃng kha, “Ang sabono hamjak thai?”
30Jisu hai hwnwi sa kha, “Borok khoroksa Jerusalemni Jeriko tokhlai thángmani. Lama-o bo dagaitrokni yago klai kha. Bórok bini bebak’-no segwi bu-ui thwi twtwi khe khibiui klangwi tháng kha. 31Ochai khoroksabo aphuru achomsa a lama tẃi tháng phaima jora. Bo a borokno nugwi phérwi tháng kha. 32Abo hai kheno Lebi khoroksa aro sók phai kha, bo’-bo a borokno naisigwi phérwi tháng khua. 33Phiya, Samariasa khoroksa a lama tẃi tháng phuru a borokni thani sók phai kha. Bono nugwi bo khairokjak kha. 34Bo gana thángwi a borokni kwsarogo thok bai angurni arak phulwi khaui rw kha; hakhe bini korai saka kasa rwui nograi nogo tubu-ui bono kaham khe nai kha nuk kha.#2Bo 28.15. 35Teini salo bo nograi nokni bubagrano rukphaini rang khoknwi tikhlai rwui hai hwnwi sa kha, ‘O borokno kaham khe nai sok di. Omoni slái teibo rang bai khe ang kiphil phuru abono su phai anw.’
36“Tabuk, o khorokthamni bere sabo dagaitrokni yago klainai borokno hamjakma klai kha? Nwng tamo hwn?”
37Kerong phrwngnai hai hwnwi sa kha, “Bono khairokjaknai a borok bono hamjakma klai-o.”
“Tháng di, nwngbo abo hai’-no khlai di,” hwnwi Jisu bono sa kha.
Martha bai Mariamno Jisu naimani
38Jisu bini sagrirok bai tháng te tháng te kami khungsa-o sók phai kha. Aro Martha hwnwi bwrwi khoroksa bono nogo kasa rw kha. 39Mariam hwnwi bini bahanokjwk khoroksa tongo. Mariam Jisuni yakung yaphango achugwi bo kók samano khnaui tongo.#Joh 11.1. 40Yang Martha khe chá rwna-khan rwna samung tẃi pái laijak ya. Bo aboni bagwino Jisuni thani hai hwnwi sa phai kha, “Subrai, aswk samungno kwkwi ani sago máng phinwi ton kha. Nwng omono nuk ya da? Ano chuba di hwnwi bono sa di!”
41Subrai hai hwnwi bono sa kha, “Martha, khna di. Nwng samungo máng khorok mihimwi tekto manjagwi tongo; 42nangmani manẃi le mungsa se. Mariam samung kaham’-no saiwi na kha, abono bini yakni tlangwi man glak.”
Currently Selected:
LUK 10: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
