LUK 20

Jisuni phanni kók sẃngmani

(Mat 21.23-27; Mar 11.27-33)

1Salsa Jisu noktharo lukuno phrwng twtwi Kothoma Kaham pírwi tong phuru okra chakrarok bai baksa ochai okrarok tei Kerong phrwngnairok phaiwi 2bono hai hwnwi sẃng phai kha, “Chwngno sa di, nwng bu phan bai omo tẃirokno khlai? Omo tẃirokno khlaimani phan nono sabo rw kha?”

3Jisu bórokno hai hwnwi sa kha, “Angbo norokno kók tháisa sẃngnai. Norokbo sa di, 4Johon baptisma rwmani phan le Kaitorni aroni da, borokni aroni?”

5Hakhe bórok kiching bórok hai hwnwi sẃng lai kha, “Chwng tamo sanai? ‘Kaitorni aroni,’ hwnwi sa khebo, ‘Norok tamo wngwi ahai khe Johonno poito khlai ya sla?’ hwnwi bo chwngno sẃngnai. 6Phiya ‘Borokni aroni,’ hwnwi sa khebo aswk bororok chwngno holong khitarnai, tamni hwn khe bórok Johonno diyari hwnwi tong lai-o.” 7Aboni bagwino bórok hai hwnwi sa kha, “Abo buroni chwng saui man ya.”

8Jisu bórokno hai hwnwi sa kha, “Bu phan bai omo tẃirokno khlai angbo hai khe norokno sa ya.”

Angur barini munirokni rwngthoma

(Mat 21.33-46; Mar 12.1-12)

9Jisu lukuno o rwngthomabo sa kha, “Borok khoroksa angur káimani. Bo a angur barino munirokni yago klangwi balogwi tongna hwnwi beraina tháng kha.#Jis 5.1. 10Angurni jora phuru bo bini banta angur na rw rohorna hwnwi seleng khoroksano a munirokni thani rohor kha. Yang le munirok a selengno bu laiwi yak bukcha khe kiphilwi rohor kha. 11Hakhe bo tei khoroksa selengno rohor khua. A munirok bonobo bu laiwi lachimasingcha khe yak bukcha khe rohor kha. 12Hakhe bo uáithamni jora tei khoroksa selengno rohor khua. Munirok bonobo kwsa-komok cha rwui barini kari lai rohor kha. 13Hakhe angur barini nokphang hai hwnwi sa kha, ‘Tabuk ang tamo khlainai? Khájani angslano rohor anw; bono le bórok sak ang ya wng glak!’ 14Bono nuk kheno munirok hai hwnwi sa lai kha, ‘Omo nokphangni bwsla se bla. Phai di, chwng bono buthar lai anw, hakhe buphani sompoti chini yago klai anw.’ 15Aboni bagwino bórok bono barini kariui buthar lai kha.

“Hakhe a munirokno nokphang tamo khlai no?” hwnwi Jisu sẃng kha. 16“Bo phaiwi a bororokno buthar baiwi buini yago angur bari rw anw.”

Lukurok o kók khnaui “Omo hai ta wng ja thung!” hwnwi sa kha.

17Jisu bórokno naisigwi hai hwnwi sẃng kha, “Hakhe elembago omo tamni kók?

“ ‘Nok tangnairok samung nang ya hwnwi khibiui rwmani

holongthai abo’-no wng phai kha nok busuni holongthai.’#Lob 118.22.

18O holongthai-o klainai borok bo phindrik phandrak wngnai, phiya o holongthai khoroksa swkni saka klai khe a borok kepeknai.”

Teksni kók sẃngmani

(Mat 22.15-22; Mar 12.13-17)

19Kerong phrwngnairok bai ochai okrarok Jisuno arono romna nai lai kha, tamni hwn khe bo o rwngthoma bai bórokno kók khitarwi hwno hwnwi saui man kha; tamo khe bórok lukuno kiriui tong gra kha. 20Aboni bagwino bórok bwlam naitugwi tong lai kha. Bórok Jisuno khẃi-o kwcha rwna hwnwi borok khoroknwi khorokthamno rang tuksonwi borok kaham hai khe Jisuno kók sẃng phenek di hwnwi rohor kha. Hakhe bórok bo bujni bagwi gobornorni yago yapharwi man anw. 21A siadirok Jisuno hai hwnwi sa kha, “Hodakra, nwng sama bai phrwngmani abo bebak sói se hwnwi chwng si-o. Keboni bumukhang naisik yaui nwng Kaitorni lamani kókno sói khe phrwngo. 22Hakhe chwngno sa di, Rumni bugra kotorno teks rwmani abo chini Kerong swbaima da klai?”

23Jisu bórokni phemlokmano saui manẃi hai hwnwi sa kha, 24“Rukphaini rang kaisa ano phunuk phai di. Omo saboni bumukhang? O bumung saboni?”

“Bugra kotorni,” hwnwi bórok sa kha.

25Jisu hai hwnwi sa kha, “Hakhe ba bugra kotorni manthaino bugra kotorno rw di, phiya Kaitorni manthaino Kaitorno rw di.”

26Aswk bororokni bwskango bo kók samano bórok cha ya hwnwi man li ya, hakhe bo samano se uanajagwi siring siring khe tong si-o.

“Kwthwirok thangwi da bacha no?” hwnwi sẃngmani

(Mat 22.23-33; Mar 12.18-27)

27Sadukai khoroknwi khoroktham Jisuni thani phai kha. (Bórok wng kha kwthwirok thangwi bacha ya hwnwi sa lainairok.) Bórok bono hai hwnwi sẃng kha,#Sam 23.8. 28“Hodakra Musi chini bagwi Kerongo hai hwnwi swiwi klang kha: ‘Khoroksa swk bwsa man ya sini bihikno klangwi thwi tháng khe bini bosongno narwkna bagwi a randijwkno a borokni buphayung nok phirogwi na thung.’#Uái 25.5. 29Rom di, takhuksnirok tongmani. Okra káijagwi bwsa man yaui’-no thwi kha. 30Aboni ulo tei takhuksa a bwrwino nok phirok khu a, 31phiya bini ulni tei takhuksa a bwrwino na khua. Abo hai khe máng bórok takhuksni a bwrwino naui bwsa man yaui’-no thwiwi tháng bai kha. 32Ulo khe a bwrwibo thwi kha. 33Tabuk, kwthwirok thangwi bacha phuru a bwrwi saboni bihik wngna klai? Bórok takhuksni’-no bono na lai kha.”

34Jisu bórokno hai hwnwi sa kha, “O molni bororok se káijak lai-o kái lai-o. 35Tamo khe kwthwini thangwi bachaui phainai molo tongna chúknairok bórok káijak lai ya kái lai ya. 36Bórok tei thwiwi man ya, bórok suarirok hai; bórok kwthwini thangwi bachama bai bórok Kaitorni bwsa. 37Kwthwirok mwthangwi tisajakmano Musi suda phunuk lang kha. Elembago satasuta khamwi tongmani kogo bo Subraino ‘Abrahamni, Isakni tei Jakobni Kaitor’ hwnwi sa lang kha.#Lam 3.6. 38O kók wng kha ahai, bo kwthangrokni Kaitor se, aboni bagwino borok thwi tháng phano kwthang tongo; bebakno bini thani kwthang.”

39Khoroknwi khoroktham Kerong phrwngnairok “Hodakra, nwng kók kahamno sa kha,” hwnwi sa cha kha. 40Tamni hwn khe Sadukairok Jisuno tei sẃng phina phano sẃng rak li ya.

Masiani kók sẃngmani

(Mat 22.41-46; Mar 12.35-37)

41Jisu bórokno hai hwnwi sa kha, “Masia Daudni bwsa hwnwi bororok bahai khe sa lai bai? 42Tamni hwn khe Lobmungo Daud sakphang’-no hai hwnwi sa lang kha,

“ ‘Subrai ani Subraino hai

hwnwi sa kha:

Achuk di oro ani yagra bwkhak,

43khlai ya sak ang nini kena arirokno yakung yaphangni yakung bokjaknai.’#Lob 110.1.

44“Daud se bono, ‘Subrai’ hwnwi hwn khe Masia bahai khe bini bwsa wngwi mannai?”

Kerong phrwngnairok bai hus khe tong di

(Mat 23.1-36; Mar 12.38-40)

45Bebak bororok bini kók khnaui tong phuru Jisu bini sagrirokno hai hwnwi sa kha, 46“Kerong phrwngnairok bai hus khe tong di. Bórok liling lala kanna khá tungo; hati-habarogo khulumjakna muchungjago: thumnokrogo buini slái bwskango achukna nai-o, pandarogo khamplai kahamo achukna nai-o. 47Bórok randijwkrokni nok-huk monok baiwi saka saka simi tángma-tángsa khe suri sanwi phunugo. Bórok belai khe yagul sujaknai.”

Currently Selected:

LUK 20: KOKBSI

Highlight

Copy