A’NPHUTNA 29
29
Jacob Laban Inn Atlung
1Jacob kha khang’khan nisō ramting leikase. 2Manhret phâkloa khava hlei razeia tuikhur inkhat akimvea kemōng rup thum inbok hret-hrōt avaratō jo. Tuikhura inphut kemōng rup-hei kha tui antaman-in ri hei kae. Tuikhur kha asingna hlungpek kalentak leika-om. 3Kemōng rup rakip anhong inchun pha leh ankakhemhei khan hlung kha antamaliksōt a tui kha antaman-in hei kae, khava sō leh hlung vâng khan antasing male nôk kae.
4Jacob in kemōng kakhemhei hneng, “Nangni khontinga mi chei mo?” tia ader hei.
Anmani’n anmasôn, “Haran khōa mi ung kae.”
5Ama’n, “Nahor tupa, Laban nanmanhret mo?” ati hei. Anmani’n, “Kanmanhret,” anti.
6“Ama kadam mo?” tia ader hei. Anmani’n, “Ama kadam. Enroh, asanu Rachel kemōng rup aheihe heia akahong so” anti.
7Jacob in, “Kani la’nshânga, innting sena sik pha’m lachang mak a, heisa mo tui nanman in sō hei leh avea phi nanta mansâk mak hei?” ati.
8Anmani’n anmasôna, “Kemōng rup rakip hin anho’ntûp sō leh hlung hi kanmaletsōt mak hma seng chu khanga tlomak ung, khava sō rōk khan kemōng rup-hei hi tui kantapek sik hei kae,” anti.
9Jacob in anmani khang’khan a’nbekpuilai hei, Rachel kha akemōnghei leh heikatlung jo. 10Jacob in Rachel kha apu Laban kemōng rup leh aheihmu pha, kasea hlung kha’m amalik sōt pek a, kemōnghei kha tui aman in jo hei. 11Khava sōa ama’n Rachel kha amajôp a, inpâk reia kaṭapsōt a kae.
12Jacob in, “Kei napa sernu, Rebecca sapa eng kae,” tia ahri pek.
Amanu katlâna apa ava manthei; 13khana apa’n atupa Jacob ahongna ṭong kha athei pha, inhmupui sik a heikatlân, akakōa amajôp a, inna aheiṭhōi manhlut. Jacob in omchen kasōk rakip Laban hneng ahri pha, 14Laban in, “Kadik, nang kei thisen karavōi khet che kae,” ati. Jacob khana khan thla khat katlung bit leika-om.
Jacob in Rachel leh Leah jâra Laban Arazen
15Jacob hneng Laban in “Katupa nachang jâra mankasea kaṭōn natlo sik changmak. Hlōman heija mo kapek sik che?” tia ader. 16Laban in sanu 2 anei hei; upanu rahming Leah, naipangnu rahming Rachel inti hei. 17Leah in ahmit a lâr asō, tâk Rachel arōng enhnōm kakai khana ahme kaṭha.
18Jacob leh Rachel kha le’nlungset hei, khava jâra ama’n, “Rachel leh naman om sik ung achang inchu nang sik kum 7 ṭōn katlo sik,” ati.
19Laban in amasôna, “Milak kapek sik kanek a nang kapek sik che; kei leh hin om rih,” ati. 20Jacob in Rachel kha chenna sik kum 7 ṭōn aleitlo, Rachel kha amadu jâra apha kha bongkhat rōk kapōa aleithei.
21Khava pha, Jacob in Laban hneng, “Pha kha katluk jo, nasanu ompui jo rong,” ati. 22Khava jâra Laban in, hmōiṭhōi revei inkhat atloa mi rakip abek hei. 23Tâk-kha khava jâna khan, Laban in Rachel kahlânga Leah jôk Jacob hneng aleiṭhōi pek, Jacob in ale’nchunpui jo. 24(Laban in asōknu Zilpah kha asanu Leah inzen sik a aleipek.) 25Jacob in khōvâr mak hma seng, ajepuinu kha Leah achang leimanhret mak. Laban hneng kasea, “Heisa mo hinga kahnenga natlo? Ke’n Rachel hlona ṭōn katlo kae. Heisa mo nahōn eng?” ati.
26Laban in amasôn, “Sanuhngâk upanu mak hma, anainu’n puise anei sik hi hiva ram ngai changmak. 27Inn-nei rehōi kani vekhat hi a’nchai sik hngâk hi roh, nang in kum 7 ṭōn nalatlo pek sik eng inchu, ke’n Rachel kapek sik che.”
28Jacob kahnōm jo, khana luhông rōi Kanive kha athlengsō pha, Laban in asanu Rachel kha anuhmei sik a apek jo. 29(Laban in asōk nuhngâk Bilhah kha asanu Rachel inzen sik a aleipek). 30Jacob in Rachel kha’m ale’nchunpui jo, khana Leah kanek a amalungset chet a kae. Khana ama’n Laban sik a kum 7 ṭōn aleitlo nôk a kae.
Jacob Sanei hei
31 Rōngpu’n Leah kha Rachel kanek a apuise lungsetna katlôm ti amanhret a asaneina sik a asyempek, tâk Rachel chu kachinga leika-om. 32Leah in nai ahong vona sapa inkhat amatet. Ama’n, “Rōngpu’n ka’nrengna ahmupek jo eng, tûnchu kapuise’n alungset sik jo eng,” atia, ama’n arahming Reuben tia aleiphō. 33Ama nai avon nôk a, sapa inkhat amatet nôk. Ama’n, Rōngpu’n hiva sapa hi’m apek nôk eng; ajârchu kei hi kapuise’n alungset mak ti hi ama’n atheia kae; khava jâra ama’n arahming Simeon tia aphō. 34Vōi khat nôk nai avon nôk a pasenai ather inkhat amatet nôk. Ama’n, “Tûnchu kapuise’n alungsetna eng kahnet tlit sik jo, ajârchu sapase 3 tak kanei pek jo,” ati; khava jâra arahming Levi tia aphō. 35Khava sōa nai avon nôk a athera pasenai inkhat amatet nôk. Ama’n, “Tûn pha hinchu ke’n Rōngpu kha kachoi ka-ân sik,” ati. Khava jâra arahming Judah tia aleiphō. Khava sōa chu avonchoi kabâng jo.
Currently Selected:
A’NPHUTNA 29: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
