A’NPHUTNA 33
33
Jacob in Esau A’ntōpui
1Esau in ami 400 hei leh ankahong kha Jacob in aleihmu hei, khava jâra asahei kha Leah, Rachel, leh anuhmei manbohei ngansena thōia aleiṭhen hei. 2Anuhmei manbohei leh asahei khan hmapena amanse hei, abânna Leah leh asahei, khana hnung kakhôrpena Rachel leh Joseph amanse hei. 3Jacob anhma akeia a-upa asorna khan vōisari raleia inkuna aleikamuk. 4Tâk-kha Esau khan ama intōpui sik a hong katlânsōt, akut akabâna akakōa aleimajôp a kae. An-inhnibât a leikaṭap hei. 5Esau khan akimvea ahei-en pha khan nuhmeihei leh sahei kha aleihmu hei, ama’n “Hiva mihei hi tuhei mo?” tia aleider.
Jacob in, “A-u, hihei hi Pathen ṭhatna jâra aleipek eng sahei kha kae,” tia aleimasôn. 6Khava sōa anuhmei manbohei leh ansahei kha kahong heia raleia lei inkun hei; 7abânna Leah leh asahei kahong hei, khana hnung kakhôrpena Rachel leh Joseph kha kahong heia raleia lei inkun hei.
8Esau in, “Ke’n karatō rup khat heiso tuhei mo? Anmani so heitina jo hei mo?” tia aleider.
Jacob in “Sova so nang lungset a ôna chentheina sik a a’ntlo kae,” tia amasôn.
9Tâk-kha Esau in, “Kanai, ke’m katluk a kanei, nata kha inda roh,” ati.
10Jacob in, “Changmak, lungset a na-ôna eng kha kachenthei inchu kei kutchoi hi arahlâng pek roh. Tûnchu nang hi kei hnenga kaṭha hêr jo che, nahmai kahmu hi kei sik a chu Pathen hmai kahmu leh thakhat jo kae. 11Nang sik a kahei choi kutchoi hi lungset a arahlâng pek roh; Pathen in lum alo enga karangei rakip hei kha aleipek eng,” ati. Ama’n arahlâng mak kârseng Jacob khan ajôr ṭhak joa kae.
12Esau in, “Sena sik a intluk jo rih. Ke’n hma leikei rong,” ati.
13Jacob in, “Naipanghei hi ratha neimak hei ti hi nang in namanhret, khana kemōng leh sehei khana a’nte hei sik kamandon hlam kasōk. Anmani hi ni khatbek achang inum kahrat a nihe jo he’nchu ankhenga kathi sik hei. 14Hma leikei jo pa roh, ke’n jâm katia kahei jui sik che, ran leh naipanghei leh torchena inranga kahong sik unga kha Edoma kanvaphâkna sik che kanhei tlo sik,” ati.
15Esau in, “Kha achang inchu nang inṭhōipui sik a kami ṭhahrep dahlon pek hei che rong,” ati.
Tâk-kha Jacob in, “Khava sik a heite rangei mak, ajârchu nalungset a na-ôna eng rōk kha chen sik a kamadu kae,” tia amasôn. 16Khava jâra khava ning khan Esau kha Edom kajōna ahlam inle jo. 17Tâk-kha Jacob chu Sukkoth a kasea ama sik a-inn inkhat leh aranhei sik in-ungna thlâm aleisak a kae. Khava jâra ahmun kha Sukkoth tia aleiphō.
18Ama’n Mesopotamia ram inphut ajōng inle pha Canaan ram Shechema kadam senga jōng katlung khana khava khōpui hnenga khan arephōr aleisyema kae. 19Khava hleipuk ṭhen kha Shechem pa Hamor sōn leh pârhei hnenga inphut dangka 100 vânga aleirachôk a kae.#Jos 24.32; Jn 4.5 20Khana khan ama’n kamukna maichâm inkhat amatunga ahmun kha El tia aleiphō, Israelhei Pathen rahming kae.
Currently Selected:
A’NPHUTNA 33: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
