A’NPHUTNA 38
38
Judah leh Tamar
1Khava phalai khan Judah’n anaihei adahlona Adullam khōpuia inphut Hira inti mipa in-khat hneng om sik a kasesōt jo. 2Khava hmun a Judah’n Canaan ram a, apa Shuah intipa sanuhngâk inkhat a’ntōpui. Ama’n a-ompui jo. 3Amanu’n sapa inkhat amatet pek, arahming Er tia aphō. 4Amanu nai avon nôk asapa inkhat anei nôk, arahming Onan tia aphō. 5Avea sapa anei nôk a arahming Shelah tia aphō. Nai hi a’nte pha Judah’n Achzib a leika-om.
6Judah’n asapa hmakakei Er sik nuhmei ajongpek arahming Tamar inti. 7Er omchen hi ṭhamak Rōngpu malung leitlai mak jo, khava jâra Rōngpu’n aleithat jo. 8Khava sōa Judah’n Er naipa Onan hneng, “Na-upa nuhmei renghmeinu nuso inchunpui roh. Apuise naipa nachangna tlohlam kasōk kha pui mathluk roh. Khang’khan na-upa khan sōn leh pâr aneithei sik kae,” ati. 9Tâk-kha Onan in amannei sik sahei kha ama sa anchangmak sik kha amanhret a, ama’n a-upa nuhmei leh hmun an-inchun kataia asetui kha raleia aleimathlâk jo, hivahi a-upa sōn leh pâr asōk makna sik a aleitlo kae. 10Ama ṭōntlo kha Rōngpu malung tlaimak jo. Khava jâra ama kha’m Rōngpu’n athat jo. 11Khava jâra Tamar hneng Judah’n, “Kasapa Shelah’n rether atluk mak hma seng napa inna renghmeinu changa va-om hi roh,” ati. Ama’n hinga aleiti kha Shelah kha a-uhei kapōa that a ka-om khâk sik ti ṭit jâra kae. Khava jâra Tamar kha apa inna inle jo.
12Pha ṭhahrep sōa Judah nuhmei kha leikathi jo. Ṭajai sui, ralûm de a’nchaisō pha aṭhōnpa Adullama Hira leh inṭhōia akemōng sam epna hmun Timnah a leikase hei. 13Tamar hneng tu mo inkhat in, aterpu kha akemōng sam epna Timnah a kahong sik, anleiti pek. 14Khava jâra ama’n renghmeinu pōnsi adahrek a, hmai pinden a’nkhua, Timnah sena hlam a khōpui, Enaim hlutna hmun a leika-om jo. Ajârchu Judah sapa matlumpen Shelah kha kalen jo, kha’num amanu ka-ompui sik a leipek mak jo ti hi kaṭhadek a aleimanhret a kae.
15Judah’n ama kha ahmu pha notinu kachang sik tia amandon, ajârchu ahmai aleimakhu tlit a kae. 16Hlamlen panga ka-om amanu hneng kahlut a, “Kaṭha jo, heija sâm mo nati?” tia ader. (Ama’n amanu kha ahmōinu kae ti leimanhret mak.)
Amanu’n, “Nang in heimo napek sik eng?” ati.
17Ama’n, “Ke’n ke rup a inphut arala inkhat kahei tir pek sik che,” ati.
Amanu’n, “Kaṭha jo, nang in khavakha nahei tir mak hma seng naṭong tepna heimo nadahlon sik?” ati.
18Ama’n, “Nahnenga intepna kha heimo kadahlon sik?” tia ader.
Ama’n, “Nakutkhi leh ahrui khana nakhōnghre kha naṭongtep manhretna dahlon roh,” ati. Neinâk-hei hi Tamar hneng apek jo. Khava sōa anmani hmun inchun jo hei, khana amanu khan nai avon jo. 19Khava sōa Tamar kha kasea a-inna ahmai makhuna pōn kha ahliksōt a reng-hmeinu von kha a’nvon nôk jo.
20Judah’n aṭhōnpa Hira kut a kete kha amanṭhōia nuhmeinu hnenga intepna neinâk-hei kha vamanlona sik a atir pha nuhmeinu kha hmutor mak jo. 21Ama’n Enaim a mi ṭhahrep hneng, “Hlampanga ka-om notinu kha khonting mo kase jo?” ati.
Anmani’n, “Hiva hmun hin notinu inkhatbek um omphung mak,” anti.
22Khava jâra ama Judah hneng hong inlea, “Nuhmeinu kha hmutor mak jo eng. Khava hmun a mihe’n khana khan notinu omphung mak anti,” ati.
23Judah’n, “Neinâk-hei kha inda jo parasoh. Mihei tamanuisō sik me kha madu mak me. Aman pek rong tia katlo kae, tâk nang in jongsōt tor mak jo che,” ati.
24Thla 3 sō vena mi inkhat in Judah hneng, “Nahmōinu Tamar kha noti ṭōn atlo jo, tûnhin nai avona kae,” ati.
Judah’n, “Ama kha ṭhōisōt inna hmeia rohlon roh,” ati.
25Amanu kha anheikeisōt pha aterpu hneng ṭong aleimathlung, “Kei tavon sa hi hiva neinâk-hei kapupa sa kae. En hei ruh, tuta hei mo–kutkhi leh ahrui khana khōnghre hei hi,” ati.
26Neinâk-hei kha Judah’n aleimanhret jo heia ama’n, “Ama kadik jo. Ke’n tlohlam kasōk kha leitlo mak jo eng, kasapa Shelah kha kalei man ompui sik kae,” ati. Judah’n Tamar kha ave nôk a inchunpui hêrmak jo.
27Asanei pha ahong tlung jo pha avona nai 2 ka-om jo ti inhret jo. 28Amanu naiha ahongphut pha nai inkhat in akut vângting ahei razitsōt a kae, sa inneinu khan naite kut a pat razang kasen aleikhit pek jo. Ama’n, “Ama hi a’nte masa kae,” ati. 29Tâk-kha akut kha akei manhlut nôk a anaipa kha heikasōk masa jo. Khana nai inneinu khan, “Hing’hin nahlam nahong petan jo!” ati. Khava jâra arahming Perez anphō jo. 30Khava sōa pat razang kasen inkhit a-upa kha hong inte jo. Arahming Zerah anphō jo.
Currently Selected:
A’NPHUTNA 38: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
