A’NPHUTNA 40
40
Joseph in Khum mihei Rahmang Amale pek hei
1Pha khat sōa, Egypt rengpa ju katintapa leh buhlom kasyempa’n rengpa malung anlei sukkhōia kae. 2Rengpa kha hiva ṭōnkarôn 2 hei chunga ahnuk leikana, 3khana Joseph omna Captainpa inn mama khan anmani aleikhum jo hei. 4Kurkhum a khan pha kasôttak leika-om jo hei, khana Captain khan Joseph kha anmani inzen sik a ṭōn aleipek.
5Jân khat chu, kurkhum a khan ju katintapa leh buhlom kasyempa’n rahmang inkhat et anleinei, rahmanghei kha ajâr hlop-hlop hei kae. 6Jîngkâra Joseph anhnenga ahong pha, anmalung inrimtak a ahmu hei. 7Ama’n anhnenga, “Heisa mo tuning hinghrep a nanmalung inrima kahmu chei?” tia ader hei.
8Anmani’n, “Keini inkhat et in rahmang inkha-khat kannei, kanrahmang inlesōt thei mi tûte hinahin om mak hei,” anti.
Joseph in, “Rahmanghei male torna ratha kapek kha Pathen kae. Nan rahmang kha ahei manthei ruh,” ati hei.
9Ju katintapa khan, “Karahmanga kahmatak a vomhrui inkhat leika-om 10abâk 3 anei. Abō ahon’bō lim leh hong kapâr, khana akara kha kahmin bât jo. 11Ke’n rengpa kōklei kaleichoi; vomhrui kara kha kaṭhet a kōklei shunga atui kasôma, rengpa kaleipek a kae,” ati.
12Joseph in, “Khava tina khachu: bâk thum kha, ni 3 tina kae. 13Nang ni 3 shunga rengpa’n amasō sik che, naṭōn hmun a amale nôk sik che. Rengpa ju katinta nalei chang laia kapōa akōklei vâng ju nalapek sik kae. 14Khana nang sik a heirakip ahong injen pha lungsettak a ahei mandonsōt roh, khana lungsettak a rengpa hneng kei rahming amandonsōt pek roh khana kurkhum a inphut kasōk theina sik a’nthōpui roh. 15Ajârchu kei hi Hebrew ram a inphut anta heimarûk eng kae, khana hiva Egypt ram a hinum kurkhum a omna sik ṭōnse katlona heite om mak,” ati.
16Ju katintapa rahmang kha madu omna tinga amale pek kha Buhlom katintapa khan athei pha, ama’n Joseph hneng, “Ke’num rahmang inkhat kanei; buhlom hrai 3 kaluchunga kaleitang. 17Hrai chung katōngpen shunga khan rengpa sik a buhlom ajât rakip ka-om, khahei kha vahe’n anleisâk a leika-om hei,” ati.
18Joseph in, “Khava tina chu: Hrai 3 kha ni 3 kae. 19Ni 3 shunga rengpa’n akeisōt sik che khana nalu atan sik! Khana nakalōng kha thing kacho inkhat chunga amakhei sik, khana chunga vahe’n naravōi kha ansâk sik,” atipek.
20Ni 3 sōa rengpa intet ning kachanga, aṭōn katlo rakip sik a revei sâktlâng aleitloa kae; aju katintapa leh abuhlom kasyempa kha akeisōt heia ṭōn katlohei hmaikunga anheiṭhōi hei. 21Ju katintapa khachu hma aleitlo aṭōn hmun a amantlo nôk jo, 22tâk buhlom kasyempa khachu aleithat jo. Joseph in alei male pek hei kapōtak a kasōk pet jo. 23Achang ravâng, ju katintapa khan Joseph chu leimandon phâkmak jo, amahngi cher jo.
Currently Selected:
A’NPHUTNA 40: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
