A’NPHUTNA 43
43
Joseph Uhe’n Benjamin leh Egypt a Anhe’nle
1Canaana ṭâm akatla hi inhnak chet-chet jo, 2khana Jacob innshunga mihe’n Egypt ram a sâng antavarôn seng kha ansâksō jo pha, Jacob in asahei hneng, “Inle ruh, eini sik sâng ajing varachôk nôk ruh,” ati hei.
3Judah’n anpa hneng, “Keini’n kannaipa hi kanṭhōi mak inchu, keini ahnenga hlut yamak ning tia inhnaktak a agîk ung kae. 4Nang in kannaipa hi keini leh inṭhōi sik a naphe’nchu, kase sik ung, nang sik a sâng kanva rachôk sik. 5Nahnōm mak inchu, keini setor mak ning, ajârchu keini’n kannaipa kanṭhōi mak inchu ahmai kunga amanhlut mak ning tia mipa khan amanthei ung,” anti.
6Jacob in, “Heisik pena mo naipa inkhat kanlanei tia mipa hneng khan nanta leihridek a hingtuk inrimna hi nantapek eng?” ati hei.
7Anmani’n, “Mipa khan keini leh ni-innshung seng ṭongderna, ‘Nanpa, alakahring mo? Sōpui lak nannei mo?’ tia derna aneiṭhak ung. Aṭong der ung kha kantamasôn sik kasōk. Nannaipa heiṭhōi ruh ati sik ung ti khachu heikhonga kanta manhret sik joa?” anti.
8Judah khan apa hneng, “Kannaipa kha kei leh inṭhōi sik a manse roh, inranga se jo rung. Khan chu eini inkhatbek vonṭâma thimak min. 9Kei hringkhō hi inkhang rong, ama sik a mô rônna kha kei naman nganthei sik eng. Nahnenga kadam a kaheiṭhōi male mak inchu, khava mô kha ke’n karôn sik. 10Khangtuk kasôt keini’n kanleihngâk mak inchu tûnhin chu vōi 2 a’nle man sik jo ung kae,” ati.
11Anpa khan anhnenga, “Kha achang sik inchu nirama kasōk, nei-nâk kaṭhapen hei kha ram vaikarôn hneng kutchoi pek sik a nantinbu shunga thōn hei ruh: thinghnai marim katui, khōihning, maru-marâng, badâm hmu, almond hmu ajing ajing. 12Khana sêr kha tehnia rônsa ruh, nantinbu chunga anta heithōn male sêr kha nanta’nrôn male nger sik kae. Antatloṭhe kachang thei. 13Nannaipa hi ṭhōi jo ruh, inrangtak a he’nle ruh. 14Akahratpen Pathen in mipa kha nanchunga lungsetna mannei chei sona nannai Benjamin leh nansōpui inkhat kha heipe male chei rasoh. Kei sik a chu, kasahei kamanhmang he’nchu sa neilo akae hnâm sik jo eng kae,” ati.
15Khava jâra, u-naihei khan kut-choihei leh sêr aja 2 anrôna, Benjamin leh Egypt sik a kase jo hei. Khana anmani Joseph hneng anbinga va’nlâr jo hei. 16Joseph in Benjamin anta heiṭhōi kha ahmu pha, a-innshung katinta sōkpa hneng, “Hiva mihei hi ka-innting ṭhōi hei roh. Anmani hi kei leh sûn bu kanta sâksap sik kae. Khava jâra ran that inna leimantluk roh,” ati. 17Sōk khan ṭongpek a’npe dungjuia u-naihei kha Joseph inna aṭhōi jo hei.
18Anmani inna anṭhōi hei pha khan anmani kaṭi heia anmandon, “Hma inkeia sêr hei kha tinbua ale’nthōn male jâra hiva hmun a anta heiṭhōi me kae. Anmani’n khavatak a anbuhlu sik mea kha nishakōrtung hei an-inlo sik, khana eini hin ansōk anmanchang sik jo me.” 19Khava jâra kot kunga khan a-innshung katintapa hnenga khan, 20“Lungset a arangei pek roh, apu, tûnhma seng khan hin sâng inchôk vōi khat kahong jo ung. 21Kan-inn inlena hlam a rephōr kanvatlung pha, kantinbu kanmazer hei, kansêr hei kha kantinbu chunga insûna aleika-om et kha kanhmu hei, kakip et a. Khava sêr hei kha nahnenga kanhei rôn malea kae. 22Keini’n sâng rachôkna sik sêr um ather kanhe’n rônsa nôk a kae. Tu’n mo kantinbu shunga sêr hei kha aleithon pek ung keini’n manhret mak ung,” anti.
23Sōkpa khan, “Nanmalung mandong mak ruh. Ṭimak ruh. Nan Pathen, nanpa Pathen khan nantinbu shunga aleithōn pek chei kachang sik. Ke’nchu nansâng rachôkna sêr hei kha karahlâng jo,” ati. Khava sōa Simeon kha anhnenga aheiṭhōi manhlut jo.
24Sōkpa khan u-naihei kha inn-shunga aṭhōi manhlut jo hei. Ankut anke sôpna sik tui apek hei, khana anshakortung hei kha kahar aleivei pek jo hei. 25Sûnṭima Joseph ahong tlung pha ankutchoi hei kha anmantluk a ka-om jo hei, ajârchu ama leh bu antasâksap sik kha anleihri pek dek jo hei. 26Joseph kha inn ahong hlut pha, ankutchoi hei kha innshunga anheichoia a-âng kunga raleia inkun heia anleikamuk. 27Ama’n anchung anpâng kayâng mo tia ader hei khana anhnenga, “Nangni’n nanpa kater chungchânga nanta manthei eng kha-e, ama heimo kachang? Alakahring, alakadam nâk mo?” ati hei.
28Anmani’n, “Kanpa, nasōk mi katlasam kha, lakahringa lakadam,” tia anmasôn. Khana a-âng kunga inkun heia ankamuk jo.
29Joseph in anaipa Benjamin kha ahmu pha, “Khana nannaipa ma-thlum nantati kha ama hi nu. Pathen in vâng peche rasoh, kasapa!” ati. 30Khava sōa Joseph khan khava phatak a adahlon jo hei, ajârchu anaipa ahmu pha amalung hong injôr joa kae. Ama hong ṭaprong ati jo, khava jâra a-inn den shunga kahlut a vakaṭap joa kae. 31Ahmit ahmai aheiphet sōa inkhimthei tak a, heikasōk a thlaithleng anta heidôn sik a ṭong apek hei. 32Joseph ta-o sik kha dokhâng inkhat a, a sōpuihei ta-o sik kha dokhâng hlop inkhat a ansyempek hei. Egypt mihei sik a ahlop mông inkhat a andôn pek hei, ajârchu Hebrew mi leh sâksōm sik kha thōi tlâkna inkhat a anmandon. 33Sōpuihei seng kha dokhâng inkhat a Joseph leh inhnget tōa, upa pena inphut mathlum pen abân bâna anman-ong hei. Anmani khanga bân kaneitak a an-inong kha anhmu pha inlak ansak a khat leh khat in-entō hei. 34Joseph dokhânga inphut bu leh an kha anhei sem, Benjamin chen kha alak-hei kanek a sem 5 kakhea anpeksa. Khang’khan ankhop phet hma seng Joseph leh anmani’n anleisâk anlei in jo.
Currently Selected:
A’NPHUTNA 43: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
