A’NPHUTNA 45
45
Joseph in A-uhei Tu A-e Amanthei hei
1Joseph in asōk-hei hmaikunga amalung injôrna kha inṭîm tor mak jo, khava jâra asōk-hei seng innden shung kha andahlonna sik ṭong apek jo hei. Joseph in a-uhei hneng tu a-ena ahri pek lai hei khan mihlop tûte leiom mak hei.#Ṭōn 7.13 2Ama’n rasa kasōktak a inhnuk a aṭap kha Egypt mihe’n anleithei jo, khana khava ṭongsōk kha rengpa hneng anmathlung jo. 3Joseph in a-uhei hneng, “Kei Joseph eng kae. Kapa kha tûn katlung alakahring mo?” ati. Tâk-kha a-u he’n khavakha anthei pha anṭit reia leimasôn tor mak hei. 4Khava sōa Joseph in anhnenga, “Lungsettak a ahei hnai ruh,” ati. Anmani’n anhnaidet pha ama’n, “Egypt hei hnenga nanta leijōr nannaipa Joseph kha kei eng kae. 5Kei hi hinahin nanlei jōr jâr enga tûnhin nanmalung hōimak tlomak ruh, nanbinga maset inpek mak ruh. Mihring hringkhō hukna sik a nanhma ani heikatir kha Pathen khet kae. 6Ram shunga sâk tâng honghlut hi kum 2 tlukna rōk lakae, kum 5 alavât khava shunga chu hleikhōi um om mak ning, khana sa-ât inti’m om mak ning. 7Nangnihei hukna sik khana nangni leh nansōn nanpâr he’n hringna anchenna sik nanhma Pathen in hlam inlaktak a ahei tir eng kae. 8Khava jâra hinna ani heikatir hi kadiktak a nangni changmak chei, Pathen kae. Ama’n rengpa ṭōnpui karônpen amanṭang eng kae; kei Egypt pumpui vaikarôn eng kae.
9“Tûn nangni inranga kapa hneng se una asapa Joseph ṭonghri hi, ‘Pathen in Egypt pumpui vaikarôn amanṭang jo eng; kahnenga inranga hong roh.#Ṭōn 7.14 10Nang Goshen ram a kei leh inhnaitak a ka-om thei sik che – nang, nasahei, natu hei, nakehei, nakemōnghei, nasehei, khana nanei rakip hei leh nankhenga. 11Goshena nang na-om inchu ke’n ka-enthei sik che. Kum 5 sâk akatâng hi sik kae; nang, na-innshung leh naranhei vonṭâma nanka-om sik madu mak eng,’ ati tia vahri pek ruh.”
12Joseph in amanjōm a, “Tûnchu nangni nankhenga khana Benjamin nang inum nahmit in kei Joseph khet eng kae ti nanhmu jo eng. 13Egypt ram hin kei heituk a ratha kanei jo, kapa hneng vahri pek ruh khana heirakip nantahmu hei chungchânga vamanthei ruh. Khana inrang ruh, hin heiṭhōi ruh,” ati.
14Akut azera anaipa Benjamin akakōa kaṭap jo. Benjamin inum ama akakōa kaṭap jo. 15Khanga aṭap pum a a-uhei inkha-khat a amajôp jo hei. Khava sōa a-u anai he’n ama anle’nbek pui jo.
16Joseph u leh naihei hong tlungna ṭongsōk hi reng-innpuia anleithei pha, rengpa leh aṭōnpui karônhei kha le’npâk hei. 17Rengpa’n Joseph hneng, “Na-u nanaihei hneng hri roh, anranhei phur rôn sik intluk hei sona Canaana inle hei rasoh. 18Anpa leh an-innshung injongsōt hei sona hin hong inle hei rasoh. Ke’n anhnenga Egypt ram shunga ram kaṭhapen kha kapek sik hei, anhringna sik inhleihêra anchen sik,” ati. 19Annuhmeihei leh ansahei khana anpa heiṭhōina sik a intôrna gâri Egypt a inphut anchoina sik a manthei heiroh. 20Anneinâk antadahlon hei sik a anmalung mandong sik changmak, Egypt ram a ka-om akaṭhapen ram kha antâ akachang sik kae,” ati.
21A’nhri kapōa Jacob sapa he’n anleitlo jo. Rengpa ṭongpek dungjuia Joseph in gâri apek jo hei khana anhlam hrona sik bu amantluk pek jo hei. 22Anmani inkha-khat pōn leh der inthlengna sik apek hei; tâk Benjamin chu dangka 300 leh pōn leh der inthlengna 5 apeksa a kae. 23Apa sik a Egypt a a’nhmu neinâk kaṭhapen shakōrtung 10 phur leh sâng, buhlom leh alak hlam hrona sâk thei shakōrtung 10 tarôn aleitir pek jo. 24Ama’n a-u anaihei kha atir jo hei khana anmani ansesōt pha anhnenga, “Nangni hlam a innâk-inse tlomak ruh no,” ati hei.
25Egypt andahlona Canaan ram inle jo hei. 26Anpa hneng, “Joseph tûn katlung lakahring. Egypt pumpui vaikarôn kae,” antipek. Jacob malung kha inhmak banna, leitaksen tor mak a kae.
27Tâk-kha Joseph in anhnenga ahri rakip kha anhri pek pha, ama Egypt a ṭhōina sik a Joseph tahei tir pek gâri kha ahmu pha, aratha hong kahrok jo. 28Ama’n, “Kasapa Joseph tûn kapha alakahring nu! Kei tader sik kha hivahin katluk hrep jo! Kei kase nger sik eng, kathi mak hma kava inhmupui sik,” ati.
Currently Selected:
A’NPHUTNA 45: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
