A’NPHUTNA 48
48
Jacob in Ephraim leh Manasseh Vâng Apek
1Pha ṭhahrep sōa Joseph hneng apa kana jo tia anleihri pek. Khava jâra ama’n asapa 2 Manasseh leh Ephraim aṭhōi heia apa Jacob kaphâk leikase. 2Jacob hneng asapa Joseph akaphâk kahong antipek pha, aratha asonga arakhuma in-ong. 3Jacob in Joseph hneng, “Canaan ram Luz inti hmun a khan Akahratpen Pathen khan kahnenga inlâra vâng apek eng.#Aph 28.13-14 4Ama’n kahnenga, ‘Nasōn he’n jât leh phung katamtak anhong changna sik a sa leh nai katamtak kapek sik che; hiva ram hi nasōn he’n ahei tik a antachen thang sik a kapek sik hei kae,’ aleiti,” ati.
5Jacob in amanjōm a, “Joseph, nasa 2 kei kahong mak hma Egypt ram a a’nte hei hi keita hei kae; Reuben leh Simeon kapōhrep a Ephraim leh Manasseh-hei hi kasahei kae. 6Nang in sa alak naneihei inum keisa tia intei theimak hei ning; karōi hlō sik hei kha Ephraim leh Manasseh heia inphut antachen sik kae. 7Ke’n hinga katlo hi nanu Rachel jâra kae. Ke’n Mesopotamia inphut kaho’nlea Canaan ram a Ephrath tlung sik ting, Canaan ram a Rachel in athide jo eng, kamalung kana hêr. Ephrath jōnna hlam sîra ama kaleihre jo,” ati. (Ephrath hi tûnchu Bethlehem inti jo.)#Aph 35.16-19
8Jacob in Joseph hneng, “Hiva sapahei hi tuhei mo?” tia ader.
9Joseph in, “Anmani hi Egypt ram a Pathen tapek eng kasapahei kae,” tia amasôn.
Jacob in, “Kahnenga heiṭhōi heiroh, vângṭhat pek hei rong,” ati. 10Jacob kha akum atam dungjuia ahmit hong kajîng jo, kaṭha khō hmumak jo. Joseph in asahei kha ahnenga aṭhōi hei, ama’n akakō heia amajôp hei. 11Jacob in Joseph hneng, “Ke’n nang kahmu nôk sik che tia leimandon phâk hêrmak eng, tâk tûnchu Pathen in kei nasahei katlunga amanhmu jo eng,” ati. 12Khana Joseph in anmani kha Jacob ânga inphut akadomsōt heia, ama’n apa ângkunga raleia ahmai adima akamuk a kae.
13Khana Joseph in Ephraim kha akut veiting Manasseh kha changting aman ong heia kae. 14Tâk-kha Jacob in akut amankhera, naipang achang inum Ephraim luchunga achang tinga kut ada, upapa Manasseh luchunga aveitinga kut kha ada a kae. 15Khava sōa ama’n Joseph vâng aleipek:
Kapa Abraham,
Isaac tarazen Pathen in hiva naipanghei hi vâng pek hei rasoh!
Tuning katlunga ani kaṭhōi Pathen in vâng pek hei rasoh!
16Insuksetna rakip a ani kahuksōt ngeva khan vâng pek hei rasoh!
Karahming leh kapa Abraham, Isaac rahming anmania inphut omṭhak rasoh!
Anmani hin sa katamtak leh sōn leh pâr katamtak nei hei rasoh!” ati.
17Apa’n Ephraim luchunga akut changting ada kha ahmu pha Joseph kha amalung hōimak jo; khava jâra ama’n apa kut kha Ephraim luchunga inphut Manasseh luchunga thon sik a amatu pek a kae. 18Ama’n apa hneng, “Apa, khanga changmak. Ama hi upa jôk kae; nachang tinga kut kha ama chunga da roh,” ati.
19Apa’n leihnōm mak a, “Kasapa, ke’n kamanhret. Manasseh tu leh sa he’m katam sik hei. Achang inum anaipa tu leh sa katamchet sik hei, khana jât kalen hongkachang sik hei,” ati.
20Khava jâra khava ning khan vâng apek heia, “Israel he’n vâng inpekna annei pha nanrahming anpan sik. Anmani’n, ‘Pathen in Ephraim leh Manasseh kapōa syem chei rasoh,’ anti sik,” ati. Khang’khan Jacob in Ephraim kha Manasseh hma amankei joa kae.#He 11.21
21Khava sōa Jacob in Joseph hneng, “Nang in nahmu kapōa, kei kathina sik kahnai jo, tâk Pathen in a’nṭhōipui sik che khana napa-napu ram a khan aṭhōi male sik che. 22Ke’n chemjâm leh the kathōa Amor heia inphut kalo Shechem ramkei kaṭhapen so nang kapek jo che; nasōpuihei kapek hei changmak,” ati.
Currently Selected:
A’NPHUTNA 48: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
