A’NPHUTNA 50
50
1Joseph in apa kalōng chunga inbok a kaṭap a ahmai amajôp pek a kae. 2Khava sōa Joseph in apa kalōng kha aṭop thei makna sik thai kano ruh tia ṭong apek hei. 3Angaia kathi kalōng thai kano sik hi ni 40 kahlut. Egypt mihe’n ni 70 ralûm andea ṭajai ansui.
4Ṭajaisui kha a’nchai pha Joseph in rengpa ṭōnpui karônhei hneng, “Rengpa hneng lungsettak a hiva ṭong hi amathlung pek ruh: 5‘Kapa khan athi sik ting ama’n Canaan ram a amantluksa thlâna khan ke’n ama kahrena sik a intepna inkhat amannei eng. Khava jâra vase eng sona kapa hi vahre rong, khan hong inle sik eng,’ ati vati ruh” tia ahri pek hei.#Aph 47.29-31
6Rengpa’n, “Naṭong leitep dungjuia se ina napa vahre roh,” tia amasôn.
7Khang’khan Joseph in apa kavûm sik leikase. Rengpa ṭōnpui karônhei, a-innpuia re-upahei, khana Egypt ram shunga hlamkakei rakip in Joseph kha anlei-inṭhōipui joa kae. 8A-innshunghei, a-u anaihei, apa innshung mi rakip ama leh inṭhōia kase hei. Goshen ram a khan nai-panghei, kemōng, kehei leh serup-hei rōk kha anleidahlon hei. 9Ama leh inṭhōia shakor gâri leh shakor kachōng he’m ama leh kase hei; khavakha mi katamtak rup-hei kae.
10Jordan nisōtinga Atad a savōkna saphōr hmun a anheitlung pha, pha kasôttak kare kasōk a ṭajai anleisuia kae, khana Joseph in jaidena ṭōnhlam kha ni 7 aleihmanga kae. 11Atad hmun a ṭajai anta leisui kha Canaan mihe’n anhmu hei pha anmani’n, “Egypt sahe’n heituk kalûrtak a jaidena ṭōnhlam hi antahmang jo mo!” anti. Khava jâra ahmun kha Abel Mizraim tia anphō.
12Khang’khan Jacob sahe’n ama ṭongpek-hei kapōa anleitlo jo; 13an-mani’n akalōng kha Canaan ram a ankadoma khana thlân hmun sik a Abraham in Hit phung Ephron hnenga aleirachôk Mamre nisōtinga ka-om Machpelah hlungkhura ama anvûm jo.#Ṭōn 7.16 14Joseph in apa anvûmsōa, a-u anaihei khana apa vûmna sik a alei inṭhōipui hei seng leh Egypt a hong inle jo hei.
Joseph in Asōpuihei hneng Avea Ṭong Amanther
15Anpa thisōa Joseph sōpui he’n, “Eini’n achunga ṭhatmak nileitlo rakip jâra Joseph in tûn katlung amater mea phuhlōna sik a’ntluk inne heikhonga sik?” anti. 16Khava jâra anmani’n Joseph hneng ṭong anlei mansea: “Nipa athimak hma, 17hinga der sik chea amanthei ung, ‘Lungsettak a nasōpuihei ṭhena, nachunga andik makna rangei mandam heiroh’ aleiti. Tûn napa-Pathen sōk, keini hei ṭhena arangei mandam roh,” anti. Ṭong thangkōi kha athei pha Joseph kha leikaṭap jo.
18Khava sōa asōpuihei antakkhet ahmai kunga kahong heia le’nkun heia, “Nasōk keini nahmai kunga hin ka-om ung,” anti.
19Tâk-kha Joseph in anhnenga, “Ṭitmak ruh, ke’n Pathen hmun lathleng tor mak eng? 20Nangni’n kei chunga ṭhatmak nanleimantluk, tâk Pathen inchu omchen kha aleisōk jâra tuning alakahring mi katamtak hei hringkhō hrung theina sik a khavakha akaṭha ting amalet jo kae. 21Nantaṭit sik heite om mak. Ke’n nangni leh nansahei ka-en kaṭha sik chei,” ati. Hing’hin lungset ṭong vânga taksenna amannei heia anmalung alei manhōi pek heia kae.
Joseph Kathi
22Joseph in apa innshunghei leh Egypt a ka-om ṭhak hei; ama athi pha khan akum 110 katluk jo. 23Ama’n Ephraim sahei leh atu hei katlunga ahmu hei. Ama’n Manasseh sapa Machir sahei kapha innshunga rahlâng manhlutna aleinei hei. 24Ama’n asōpuihei hneng, “Kathina sik kahnai jo, tâk Pathen in nangni a-en kaṭha sik chei khana hiva ram a inphut Abraham, Isaac leh Jacob hneng kalûrtak a ale’ntepna ram a khan aṭhōi sik chei,” ati. 25Khava sōa Joseph in amihei intepna sik a angek hei. Ama’n, “Pathen in nangni khava ram a aṭhōisōt pha chei leh kataksa hi kanchoi sik tia intep ruh,” ati hei.#Sōk 13.19; Jos 24.32; He 11.22 26Khang’khan Joseph kha akum 110 atluk a kathi jo. Anmani’n aṭop makna sik thai ankanoa kathi rakōnga anthōn jo.
Currently Selected:
A’NPHUTNA 50: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
