RAPHA HIQWA LAK 23
23
Sara Tsaito Kiimaq Abraham Raq Maalapchiim Hiq Rito
1Sara ka rawii shishi ri wiiroqnai ri wiimiishi sito. 2Apaiq ka Kanan mung wa Hebron chela miishe tsaito. Kiimaq Abraham raq apaiq maa ka hoqto.
3Apaiq raq tsang-nyung maa wechang hiq ba ka baiqthü raüta, Hitaiqnok phana wato. Raüta akha nguto, 4“Ngi ka wanshawe, arjaq namshiq phong na sitiikang. Ngi ma hiq phu bashi shakuq ronglaq, ngi raq ichak maa ka lap pha.”
5Kiijiishe tsangshiq raq treto, 6“Shiilangwe lei, naishiq raq chongphai tai liishaq. Naishiq raq ümniika tuwejong ashi nguta liitiikai. Naishiq hiq na hiqhea pinthum maakho sitlaq kiijaq ümchak maa ka lap liina. Naishiq phong wa juwe riili jiimin chochikhiq maq ümniima maalapkho ka mikuq i. Krai mren ümniiraq apaiq maa ka milap haü.”
7Kiijiishe Abraham ka tsangshiq man na anato hiq na bumto. 8Kiimaq akha nguto, “Namshiq raq ijamti-nyung maa ka arjaq mitlap han jiila, mangchan lanta, Jahar se Ephron ma wai rong laq, 9apaiq wakphe tho na Makhpela Longsha kra misha kuq laq. Apaiq ma ümchaü namshiq tarü makki na athü ka kunli panthit na mishakuq laq nguta chongkuq ronglaq. Krai mren kra hiq ka ihiq she miraq, ngi raq maalap-chiim miishe mithüha.”
10Ephron apaiq kiimin chela kilamchong na ngongthun chang ba kiijaq Hitaiqnok ahinti rai adam na ngashat asi riito. Apaiq raq kiijaq nokwe wiitarü raq taishat na treto, 11“Shiilangwe lei tailaq. Ngi raq kra wakram tlotli ka longsha kriimin nong nong mikuq kang. Arjaq ümchaü nokwe man na, ngi raq ümniima mikuq kang. Krai mren ümniiraq ümjamti-nyung maa ka misaiqsam haü.”
12Kiijiishe Abraham ka Hitaiqnok man na manto tiichhi hiq nü bumto. 13Raüta Ephron ma nokwe tarü raq taili chang na akha nguto, “Ikhla ngi raq bom poshi waipha. Mangchan lanta taironglaq. Ngi raq kra wakram ka tlotli ari riipha. Ngi raq athii kuqtiikang ka jaü ronglaq. Lata ijamti-nyung maa ka kiijaq lap pha.”
14Kiijiishe Ephron raq treto, 15“Shiilangwe lei, nashiq akha aki miikiimbi liipan na, kra hiq phuse thii kampho ngam sii shiblai ka apawiq shea? kra nintatali kata. Ümjamti-nyung maa ka kiijaq lap liina.” 16Kiimaq Abraham raq kra bom ka treto. Raüta Ephron raq nokwe wiitarü man na athü tankuqtaq kra phan phan kampho ka tok na shin raüta kuqto. Kampho ngamsii shiblai, kra pat na laopanbi raq langtlaq thii riikhaq li tok maq shin raüta kuqto.
17Akha, kra tachong hupsam hiqphu Ephron hiq, Makhpela hiqshong wa, Mamre hiqshong maq shedong nü na sitlaq kriika Abraham hiq miishe jakito. Kriika kriibawa wakram thun kiimin hamli she, wak ram mong wa longsha kriimin nongnong, kiimaq kiijaq pero thun sitlaq kra wiita kra wak ram phekam tro na sitlaq thun kra lot li na riito. 18Kra hiq ba ka Abraham hiq ngutiishe kiijaq Hitaiqnok ümchuwa ngongthun lomdamtiiti tarü riishe sapto.
19Raütiishe Abraham raq tsang-nyung Sara maa ka kra longsha mong na, Kanan mung na saiq samto. 20Kra ningkhan she, kra wakram ka Hitaiqnok hiq wa, kiimaq kiijaq wakram wa longsha kiimin nong nong, Abraham tachong hiq phu, maiq maalap chiim miishe jakito.
Currently Selected:
RAPHA HIQWA LAK 23: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
