RAPHA HIQWA LAK 34
34
Dina Ka Maiq Raq Haihiito
1Ranaiq shi Dina, Jakob nai Lea se ka Kanan mungti nyungre rai riihumkai kito. 2Kiimaq Hiwaiq phan Hamor se Shekhem, kra wang na welawe raq Dina ka chhito. Kiimaq apaiq raq Dina ka sheahoto. Raüta haihiito. 3Shatmaq apaiq raq kra jechakse ka shamheawiq chhi raüta apaiq raq no ka lungwiito. Kiimaq jechakse raq apaiq lungwii raüjaq nguta Dina ka tiijom nato. 4Kiimaq apaiq raq awe ma chongto, “Ümniiraq ara jechakse ara ngi ma lamkuq laq.”
5Jakob raq ase jechak se ka maiq raq shummiito nguta tho ka lapto. Shatmaq asetiim ka anyamse kong rüm rum na tatimii riito. Kra ningkhan asetiim misaü shaq wiiwii apaiq ka kaiqshak miili kheto. 6Shekhemwe Hamor ka Jakob rai bom riichongkai nguta kito. 7Kra akhing na Jakob setiim ka rum maq awa jam na asaü wan she riito. Tsangshiq raq kra tsütsa ka taito. Kra tairaüta tsangshiq ka ahang raili riito. Kiimaq Shekhem raq atinkhan ashut klotaq kiimaq Jakob se ka haihü raüta Israilnok shummiitaq kra ningkhan pinthum aphok khiqto. 8Hamor raq Jakob ma nguto, “Ise Shekhem ka ümse jechak se krai riilungwiitlo. Mangchan laüta ümse ka apaiq ma tiiwa kuqlaq. 9Nashiq liipan na kiq ri laita sikhe sirü lam ka tan rong i. Laita naishiqnok nai namshiqnok liipan na sikhe rii riija rong i. 10Laita namshiq ka naishiqnok rai nai mung arjaq sironglaq. Ümniiraq ümriiba wa lungwiitlaü kriiba kiijaq shonglaq. Kiimaq naishiq rai piikii pealea klolaq. Kiimaq tachong hupsam ka ümniiraq lungwiitlaü kra phan phan laplu laüta thülaq.”
11Kra nguraü tiishe Shekhem raq Dinawe ma nai aphutiim ma akha nguto, “Ngi ma maiq ka kuq ronglaq. Ngi riimin namshiq ma, namshiq raq aroro phan kra miklo kuq kang. 12Namshiq ma jamlai ari athü kongphiq kechang wa kra namshiq raq aro ro ngi ma chong ronglaq. Kiimaq jechakse tri tiithii ka namshiq raq aroro athü atsin maq miitang ronglaq. Namshiq raq ajaü jaü, ngi raq mikuq kang. Namshiq raq jechakse ka ngi ma tiiwake chongli.”
13Shatmaq Shekhem raq tsangshea nyung Dina kra shummii kha na, Jakob setiim raq Shekhem nai awe Hamor ma bom ka khonglaq raüta chong kuqto. 14Tsangshiq raq apaiq ma nguto, “Naishiq raq naino ka atho hanhüwe miika tiiwalot mai. Kriika naishiq ma jea tiingaü miraq. 15Naishiq raq namshiq rai kiq ram wan chang lamlu ka shi li. Kriika namshiq maiqwere ümchuwa sitlan ka naishiq jamkho atho hanlaita sitiikai kiikhiisii namshiq riimin athohan chang miraq. 16Kra ngu raütiq naishiq ka namshiq rai sikherü mirjahai. Naishiq ka namshiqnok rai adam na misi hai. Kiimaq namshiqnok rai phanshi maqshi ma mija hai. 17Shatmaq namshiq raq naishiq tri ara lang man jiika, lanta namshiq raq athohan tri ka lang man jiika, naishiq raq nai shea-nyung ka achea mirwan hai. Laita miwa wan hai.”
18Riita ara chongtaq tri arka Hamor nai ase Shekhem raq tai miika athuk tri nguta tiimato. 19Kiimaq kra jerowe raq kra athohan tri klo ka taü laü khiq li she kloto. Jamkhano ngukla apaiq ka Jakob se jechakse krai tsan riiroshe. Apaiq ka tsangta khan na akhek pinthumwe riito.
20Kiimaq Hamor nai ase Shekhem ka chela kilamchong na ngongthun chang ba kiina wato. Raüta tsangshiq chelati nokwe kiima akhiishe chongto: 21“Arwetiim arka nashiq rai khi alu. Tsangshiq ka na mung na nashiqnok rai tiisinga rong i. Raüta akhum ashiim na jamlai min tiibanbi mai misilaq. Na mung na tsangshiq shong nga miitu hü ahiq ri chamtraq jong hea. Nashiq raq tsangshiqnok setiim jechaksere kra lamrong i. Kiimaq nashiqnok setiim jechaksere kiimin tsangshiq ma tiiwa rong i. 22Shatmaq arwetiim ka nashiqnok rai adam na nokshi hiqshi na shong nga wan ma jiila, tri ka ashi li riichang, kriika nashiq raq nashiqnok maiqwere ümchuwa sitiikai kra athohan laita, tsangshiq jamkho athohan raüta sitlaq kiikha sichang nguwa. 23Riita ikhiijiika tsangshiq raq nyamse kong ümchuwa rümtlaq kiimaq tsangshiq tachong hupsam ümchuwa rümtlaq kriimin nashiq riishe miraq mak shea? Arningkhan nashiqnok min tsangshiqnok rai adam na hiqshi na shong nga wan miituli kiq ka ri rong i.” 24Kiimaq kra chelati nokmaiqse kunli raq Hamor nai ase Shekhem raq chongtaq tri kiijaq siisaq pongto. Raüta maiqwere angu thun kunli raq athohan tri ka kloto.
25Kriimaq ranaiqtsam sijai niishe, kiiwa maiqwere thun ka athohan tri klotaq kra tsangmitsi mihea shaq bala na, Jakob senai wenai, Simeon nai Lewi, Dina ma aphu nai kra tsangnai jaq na nepja doraq chhaq maq kra chela na kito. Raüta maiq raq jurmin sapmak shon liipan niili kriiwa maiqwere thun ka wiita jiip baiqto. 26Hamor nai ase Shekhem kiimin nong nong maq tsat baiqto. Raüta tsangno Dina ka Shekhem tahii jam wa chat wan raüta wa wanto. 27Maiq thun jiipbaiq jai she Jakob setiim ahinti raq tsangno shummiitaq kra phuk lam kra chela wa hup nai sam thun ka wiita tsuq wanto. 28Tsangshiq raq nyamse kong, minsaü kong, kumtoq kong thun, kiimaq chela mong na jamlai wa sitlaq kra kiimaq wak ram na jamlai wa sitlaq kra kun kun tsuq wanto. 29Tsangshiq raq ara ariq phan ka wiita tsuq wanto. Kiimaq jechakre nai nosere thun wiita kiimaq jam na jamlai wa sitlaq kra wiita tsuq wan raüta wa wanto.
30Kiijiishe Jakob raq Simeon nai Lewi ma nguto, “Namnai raq ngi ma tsa she niqkuq lan. Ümchaü ka Kanannok, Perijaiqnok, kiimaq armung na siti maiq angu wiita raq ngi ka angeng she mirho. Ngi rai maiq ka atsap se li. Tsangshiq wiitarü ka adam na pong raüta, ngi khat wan raüla, nashiq jamti ka wiijamtam mitiithen baiq.”
31Shatmaq tsangshiq raq treto, “Naishiq raq naino naishea nyung ka maiq raq mephe nyung ikha haihii ka ninlot mai.”
Currently Selected:
RAPHA HIQWA LAK 34: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
