JOHAN 18

Jehudinok Welabi Raq Jesuq Lapto

(Mot 26.47-56; Mak 14.43-50; Luk 22.47-53)

1Jesuq raq ara achu jaü lot jai she, ajaqshisetiim ka shea wan raüta, Kidron raise reko nü niishe wawanto. Kiijaq maiq raq achhi Olip pero ashi asi. Kiimaq Jesuq nai ajaqshisetiim ka kiijaq wawanto. 2Jesuq shaphaqti mat we Judas raq kra Olip pero ka asap. Judas raq kriiba ka jamkho sapta ngukla, Jesuq raq ajaqshisetiim ka akhing khing na kiijaq sheaho lili raüta tsangshiq rai adam na nga raüta haisiq kilili riitlo. 3Krai mren, Judas ka Roman phenlanok kongshi, kiimaq ramwe jongbi nai Phorisinok raq atiiwa Shomjam kheti petanok kriiri kongshi shea wan raütiishe kra, Olip pero kiina wawanto. Tsangshiq ka rewa awarai. Kriikha maq, tsangshiq ka wiija wiipiq, kiimaq waniitei thun piraq chhaq kiimaq lemtem thun ka doraq chhaq maq kiijaq saü wanto. 4Jesuq raq apaiq ningthoi ranaiq akhing ka saü wato she nguta sapshat. Kriikha miishe apaiq ka tsangshiq khaki na dongchhaq raüta, “Namshiq ka ju rit wa awa han wa?” nguta tsangshiq ma waito.

5Kiijiishe, “Najareth hiqti we Jesuq rittiikai,” nguta tsangshiq raq treto.

“Ngi ahata apaiq,” nguta apaiq raq tsangshiq bom ka treto.

Apaiq shaphaqti we Judas Iskariot kiimin phenlanok nai petanok rai kiijaq adam na chapshat riito. 6Jesuq raq ümtiikiiwa, “Ngi ahata apaiq,” nguta tsangshiq bom ka tretaq, kra tai raüta, tsangshiq ka jai nü na tiisot rang raüta, jainong nü na hiq na riwan rang riito. 7Kiijiishe, Jesuq raq jangshi ri hali, “Riita, namshiq ka ju rit wa awa hanjiq ngu kai?” nguta hali tsangshiq ma bom ka wai nongto.

“Najareth hiqti we Jesuq rittiikai,” nguta hali tsangshiq raq apaiq bom ka tre nongto.

8“Riita, ngi raq namshiq ma chongkang she. Ngi ahata apaiq. Namshiq ka ngi rit wa awahan jiika, ara i sengi thun arka wiita ahin na mitiijin wan liina,” nguta apaiq raq bom ka tsangshiq ma chong kuq nongto. 9Apaiq raq ara bomtaq arka, apaiq raq kongkhuji maq, Awe ma, “I We lei, ümniiraq ngi ma i sengi ümchuwa kuq laü, kiiwa ngi raq ashi min tiimomiq mang maq khup wong kuq kang,” nguta bom khamkuqtaq kra tiiku wan miitu she hongtha wanto.

10Kiijiishe, Simon Petar raq nepja ashi adü na wishat kra chathit raüta, Ramwe Ajong Pinthum we dise nitsi nü ka tiidearok hoq baiqto. Kra dise mang ka Malkas. 11Kiijiishe, “Ümnepja ka ahi na rei tlo laq! I We raq ngi ma akuq chamchao kok kra, ngi raq nyang mang miili lea wan chang ngutiisha tiima tlaü?” nguta Jesuq raq Petar ka sonto.

Jesuq Ka Annas Rung Na Tiichapto

12Kiijiishe Roman phentuwe nai asengi phenlabi, kiimaq Shomjam kheti Jehudi phan petanok raq Jesuq ka lapho raüta raü maq khato. 13Raütiishe, tsangshiq raq Jesuq ka apha na, Annas rung na sheaho raüta tiichapto. Annas ka, kra rawii Ramwe Ajong Pinthum jati we Kaiaphas ma ahuchhi we riito. 14Kongkhuji maq, Jehudinok welabi ma, Jehudi phan maiqse wiimungtam thenkai nam miika, maiq weshi tsai kai riiwe ka ahea miraq, nguta welabi ma tsii chongke wanti we irka Kaiaphas riito.

Petar Raq Jesuq Tiishaüto

(Mot 26.69-70; Mak 14.66-68; Luk 22.55-57)

15Simon Petar nai jaqshi se weshi raq, Jesuq jai ka trü phan hoto. Ajaqshi se weshiti kriika, Ramwe Ajong Pinthum we rai mang arsap. Kriikha maq, apaiq ka Jesuq rai Ramwe Ajong Pinthum we jam rukmong rinkea na saüli wawan damto. 16Kiimaq, Petar ka jamkea rukjai niili khingkito. Kiijiishe, ajaqshi se ashiti ka rukphai na dongki nong raüta, ruk kilam na chap raü jechakse ashi asi kriima chongto. Raütiishe, apaiq raq Petar kiimin wangmong niishe shea wanto. 17Ruk kilü na chap raü jechakse raq Petar ma, “Ümniikiimin kriiwe jaqshise sii riimak sha?” nguta nguto.

Kiijiishe, “Riimak. Ngi ka riimak tiina,” nguta Petar raq akiq ka khiito.

18Kra akhing ka rasonghea riito. Kriikha maq, Ramwe Ajong Pinthum we jaqshisetiim nai Shomjam kheti petanok raq wachan chaq raüta, tsangshiq ka wa tro na wawo riitam chapto. Kra chhi raütiishe, Petar min arasong tsi ma tsangshiq rai wawo chap wa damto.

Ramwe Ajong Pinthum We Raq Jesuq Kha Photo

(Mot 26.59-66; Mak 14.55-64; Luk 22.66-71)

19Ramwe Ajong Pinthum We raq Jesuq ma, “Ümjaqshisetiim ka juju wa. Kiimaq ümniiraq jamlai phan wa shrinkuq wan tlaü?” nguta bom ka sidi waito. 20Kiijiishe, Jesuq raq apaiq bom ka treto, “Ngi riika nokwe man na kholam kholiiq maq traho bom chongkuq wan kang ihata. Ngi raq mungmaiqse ma traho bom chongke wan ka nokwe riitam nga chang sinagok thun nai Shomjam mong maq chongkuq wan kang ihata. Ngi raq adam apaü lam maq, jamlai bom min chongkuq mang. 21Riita, ümniiraq ngi miika jaram wa waitlaü? I bom chong tai wanti mungmaiqse kiima wai liina. Ngi raq jamlai bom wa chong kuq kang kriika, tsangshiq raq asap. Tsangshiq ma wai laq,” nguta apaiq bom ka treto.

22Jesuq raq ara bomtre ara tai raüta, Shomjam kheti peta weshi raq Jesuq ka atheaphi na riisiiq tsatto. Raüta, “Ümniiraq Ramwe Ajong Pinthum we ma akha bomke min sha mai ta?” nguta siato.

23Kiijiishe, Jesuq raq abom ka treto, “Riita, ngi raq ajiq bomkang jiika, arjaq thung tlaq rung welabi man na, i jiq kra tiichhi kuq liina. Shatmaq, ngi raq ümchaü jamlai wa bomkang kra riikhaqli jiika, ümniiraq i dü na jaq ka jaram miiq wa?”

24Kra raütiishe Annas raq Jesuq ka tiikhashat miili Ramwe Ajong Pinthum we Kaiaphas rung niishe tiishea wanto.

Petar Raq Jesuq Tiishaü Nongto

(Mot 26.71-75; Mak 14.69-72; Luk 22.58-62)

25Petar ka watho na wawo chapshat li riito. Kiijaq chapti nanok maiq ahinti raq hali, “Ümnaq armin la kriiwe jaqshisetiim phong wiidea riimak sha?” nguta Petar ma bom ka waito.

Shatmaq Petar raq, “Riimak. Jambawo, ngi ka apaiq jaqshi riimak,” nguta tiidamki nongto.

26Kiijiishe hali, Ramwe Ajong Pinthum we disetiim phong wa weshi, Petar raq ani lüprat tiiwe ma tanyang seno lam maiq ashi raq hali, “Ngi raq ümniika Olip pero na, Jesuq rai dea miina chhikang?” nguta Petar ma bom ka tiichop waiho nongto.

27Kiijaq hali, Petar raq, “Riimak, ngi ka riimak,” nguta apaiq ka tiidamki nongto. Apaiq raq kra bom ka tre ri li she wuwa riigoli she riito.

Jesuq Ka Pilat Rung Na Tiichapto

(Mot 27.1-2,11-14; Mak 15.1-5; Luk 23.1-5)

28Ranap chu maq, Jehudinok welabi raq, Jesuq ka Kaiaphas jam maq Wanghupti we jam niishe sheahoto. Jehudinok welabi ka Wanghupti we jam wang mong niika wamak dea riito. Tsangshiq raq kra ranaiq ka Tiichhii Wan Poi dung sia chang. Kiijaq jam mong na wa ka tsangshiq ma apii. Kiijaq waraü ka tsangshiq khum ka misheki. Kriikha maq, tsangshiq khum ka asii thü raa ngo maq, tsangshiq ka jam wang mong na wamak dea riito. 29Kra ningkhan she, Wanghupti we Pilat ka rintsii na dongki raüta, “Namshiq raq arwe ma jamlai kha wa nyan tlan?” nguta tsangshiq ma bom ka waito.

30Kiijiishe, “Mungtu we lei, apaiq raq kha tangmak dea ngu raüka, naishiq raq apaiq ka ümrung na jaram wa misheaho,” nguta tsangshiq raq apaiq bom ka treto.

31Kiijiishe, “Ikhiijiika, namshiq raq apaiq ka sheaho lanta, namshiq Jehudinok Thungtri maq, apaiq kha ka pho rongliina,” nguta Pilat raq tsangshiq bom ka treto.

Kiijiishe, “Namshiq Roman mungtubi raq, naishiq ma miisaq tanli chang khapho wan arang ka thaq man dea,” nguta tsangshiq raq apaiq bom ka treto. 32Arthun hongtha wan taq arka, Jesuq raq apaiq tsai lamlu ka kongkhu ji maq tiithaitaq bomtsi kra tiiku miitu she hongtha wanto.

33Kiijiishe, Pilat ka hokham jam rinkhok kiijaq wawan nongto. Raüta, Jesuq ka akhaki na tiichap raüta, “Riita, ümniika Jehudinok Hokham we dea sha?” nguta Jesuq ma bom ka waito.

34Kiijiishe, “Riita, ara bom waitlaü arka, ümtsan mong maq adong sha, shea ngi miitu maiq ahinti raq achongkuq wa?” nguta Jesuq raq Pilat bom ka treto.

35Kiijiishe, “Ngi ka Jehudi we sha? Ümnok ümta nai ramwe jongbi raq khata, ümniika i rung na hitho raüta tiichap wanti ka! Ümniiraq jamlai mat atsa wa tang laü?” nguta Pilat raq Jesuq ma bom ka waiwan nongto.

36Kiijiishe, Jesuq raq treto, “Ngi ka mangjong hiq wa hokham riimang. Ngi ka hokham we ngu raüka, i sengi thun ka wa raüta, Jehudinok ma ngi ka tlap mak mikhat wan wa. Riimak. Ngi raq hokham arang hotiikang arka, ara mangjong hiq rümti raq akuq ka riimak!”

37Kiijiishe, “O, ikhiijiika, ümniika hokham we dea kata nya?” nguta Pilat raq Jesuq ma bom ka wai nongto.

Kiijiishe, Jesuq raq treto, “Ümniiraq ngi ka hokham we nguta ngutlaü kata. Ngi ka ara mangjong hiq na pokikang arka, ara tengteng bomtsi ara chong kekai miitu kikang. Jurwa tengteng bomtsi kra lang tlaq, kriiti riika, i bomchong arka phaqchii nichii maq taitlo.”

38Kiijiishe, “Riita, ikhiijiika, tengteng bomtsi ka jamlai wa?” ngutiishe hali Pilat raq Jesuq ma wai nongto.

Pilat Raq Jesuq Tsea Baiq Kha Tanto

(Mot 27.15-31; Mak 15.6-20; Luk 23.13-25)

Kra ngu raütiishe, Pilat ka rintsii na hali kiho nongto. Raüta, mungmaiqse thungrai tlaq kriima hali bom ka akha chongkuqki nongto, “Ngi raq arwe dü na, apaiq tiishut chang kha jam min ahü chhi mang. 39Kiimaq, namshiq nok thunglai ri asi dongdii ngo kha maq, ngi raq Tiichhii Wan Poi akhingtek na, phaqtek mong na siti shumwi kong phong kiiwa, namshiqnok mungmaiqse raq aroroti we shumwi kra namshiq ma weshi ka tiidong kuq tiikang. Riita, ija, ümchaü min, ngi raq namshiq mungmaiqse ma ara Jehudinok Hokham we ngutlan we arsha mitiidong kuq ha?” nguta Pilat raq mungmaiqse ma waito.

40Kiijiishe, “Raa mak! Apaiq ka raa mak! Naishiq ma Barabas kra tiidong kuq laq!” nguta, tsangshiq ka agi lülü, asii watrang lam miishe, Pilat bom ka treto. (Barabas ka thiimeaq jati we riito.)

Currently Selected:

JOHAN 18: TANGSBSI

Highlight

Copy