JOHAN 9
9
Anyung Pukdong Makchukwe Tiiheato
1Jangshi Jesuq ka lam na awarai riito. Akhum lam maq apaiq raq maiq weshi, anyung pukdong makchuk we kra chhito. 2Kra chhi raütiishe ajaqshisetiim raq apaiq ma, “Shrinketi we, ju ngarai riiwa, arwe makchuk dongtaq arnya? Apaiq ngarai riisha, sha anyungwe ngarai raq wiinya?” nguta waito.
3Kiijiishe, Jesuq raq tsangshiq bom ka treto, “Apaiq makchuk dongtaq arka, anyungwe ngarai nai apaiq ngarai ningkhan ka riimak. Shatmaq, apaiq khum na Shiikeawe wangchang jaqsham kra tiichhike miitu dongto. 4Rawü asi wiiwii, nashiq raq ngi tiikaiti we jaqsham arka sham wan ruq riichang. Ranyaq akhing she saü wan raüla, jurmin jaqsham wan lot mak she miraq. 5Mangjong hiq na ngi sitiikang bala na, mangjong maiqse ma rawü li ka ngi.”
6Jesuq raq ara ngu raütiishe, apaiq raq ajaq na hiq win phanshise tsunto. Raüta, atho maq nyatto. Raüta kra boq dase maq amii we mak khü na nyat kuqto. 7Kra raütiishe, apaiq raq, “Kilaq, Silom Thamchum na ümthea ka maikikiq,” ngutiishe makchuk we ka thaüto. (Silom liichum ka “tiikito” nguta ngo riito). Krai mren, makchuk we ka thamchum kiina kihoto. Raüta athea ka maito. Kiimaq amak ka heakisaq li she heakito. Raüta apaiq ka maiqhea tingsang she ajam na jang wanto.
8Apaiq thatsi heakai jai she maiq chiiti nai chiiti liipan, kiimaq apaiq ka kongkhuji na maiq hisea poraki ja chhi wanti liipan na, “Arwe ara riimak sha kongkhuji na, lamkii na nga raüta maiqjaq wa hirii phaqsiq tlaq we ira?” ngutiishe bom ka riiwaisoto.
9Kiijiishe, maiq wiijamti riika, “Apaiq ardea” nguta treto. Shatmaq, maiq abiti riika, “Riimak. Apaiq ka riimak. Apaiq ka ira makchuk we sham ikha shamshi riito,” nguta bom ka tsangshiq liipan na riiwaito.
Kra tai raütiishe, “Ngi ahata apaiq ka,” ngutiishe atati we raq tsangshiq bom ka treto.
10“Riita, ikhiijiika, ümmak ka jamkho heaki tiita?” ngutiishe, tsangshiq raq bom ka apaiq ma tiitsang wainongto.
11Kiijiishe, “Maiq weshi, Jesuq nguta chongtlaq we kriiraq, boqda se ka da raüta, i mak na nyat kuqto. Raüta, apaiq raq ngi nangnga Silom thamchum na kilaüta, ümthea ka maikikiq nguta thaüto. Krai mren, ngi ka thamchum na kilata, i thea ka maiki kang. Ngi raq i thea mai kang rai mren, i mak armin piiqki saqli she heakito,” nguta apaiq raq tsangshiq bom ka treto.
12Kiijiishe, “Riita, apaiq ka ümchaü ümbano?” ngutiishe tsangshiq raq apaiq ma waito.
“Ngi sapmang” nguta apaiq raq tsangshiq bom ka treto.
Makchuk We Tiihea Kuqtaq Kra Konchonto
13Kra bom riiwaiso wan lot jai she, tsangshiq raq makchuk wa aheaki we kra, Phorisinok phaniishe shea wanto. 14Jesuq raq boqda maq achuk we mak na nyat kuq raüta, makchuk we mak ka tiihea kuqtaq kra ranaiq ka Asii Niitiitsak ranaiq riito. 15Kriikha na, Phorisinok raq amak heakitiiwe ma, amak ka jamkho tiihea kuqta nguta bom ka konchon waisoto. Apaiq raq tsangshiq ma, “Apaiq raq boqda se maq i mak na nyatto. Kra nyat jai, i thea ka mai wan kang. Krai mren, ümchaü i mak ka apiiq she heaki kang,” nguta chongkuqto.
16Kra tairaütiishe, Phorisinok phong wa maiq wiijamti raq, “Arwe mak tiihea keti we arka Shiikeawe pha wa aki ka riimak. Ara jamkhano chongtiikai ngukla, apaiq raq Asii Niitiitsak ranaiq tri ka lang mak,” nguta bom ka chechiipto.
Shatmaq, tsangshiq phong wa maiq wiijamti riika, “Shatmaq, notsam, ngarai maiqse riika akha awang chang jaqsham arka misham lot sha?” nguta khiito. Krai mren, tsangshiq liipan niimin kongnai miishe riido riijin she riiphea kito.
17Kriikha miishe, Phorisinok raq thongshi ri hali, “Riita, ümniinga, apaiq raq ümmak ka tiipiiq kuqto ngutlaü. Ahea. Krai mren, ümchaü ümniiraq, apaiq ka ju nguto tiima tlaü, chong liita?” ngutiishe hali maiqwe kiima bom ka tiitsang wai nongto.
Kiijiishe, “Apaiq ka shammi we,” nguta apaiq raq Phorisinok bom ka treto.
18Kra tiitsang waijai she dongdii min, Jehudinok welabi raq, apaiq ka makchuk wiidea heakito ngutiika kam mak riito. 19Kriikha miishe, tsangshiq raq anyungwe kriishe tiiheaki raüta, “Riita arwe arka namse dea sha? Anyung pukdong makchuk dea sha dongta? Riita, ikhiijiika, ümchaü amak ka jamkho heakita?” ngutiishe bom ka sidi waiso nongto.
20Kiijiishe, anyungwe raq tsangshiq welabi bom ka akha treto, “Arka naise dea. Kiimaq apaiq ka anyung pukdong makchuk dea dongto. Kriika tengto. 21Shatmaq, ümchaü naise mak arka juro tiihea kuqtaq, kiimaq kriika jamkho tiipiiq kuqtaq, kra bom riiwe kla nainai anyung nai awe riimin sap mai. Kriika apaiq ma wai rong laq. Apaiq ri maiqla she. Namshiq ma apaiq raq michong kuq lot!” 22Jehudinok welabi ma hai ma anyungwe raq bom ka akha treto. Kra jamkhano hai tla ngukla Jehudinok welabi raq, jurwa Jesuq ka Khristo dea nguta kamtlaq kiimaq nanok ma chongkuq tlaq, kriiti ka sinagok wa ashleq baiq chang nguta aming ashatthü wishe riito. 23Kriikha maq, “Apaiq ri maiqla she. Apaiq ma wai ronglaq,” nguta anyungwe raq welabi bom ka treto.
24Welabi raq thongshi ri hali, anyung pukdong makchuk wa aheaki we kra tiiheaki nongto. Raüta tsangshiq raq apaiq ma waito, “Shiikeawe man na bom ka tengteng chong laq! Naishiq raq asap hai, ümmak tiipiiq keti we ka ngarai maiq se.”
25Kiijiishe, apaiq raq welabi bom ka treto, “Welabi lei, ngi riikla, apaiq ka ngarai maiqse sha, riimak wa, kriika sap mang! Ngi riika bom poshi sap tiikang arli. Ngi ka man na makchuk wa, ümchaü chhi tiikang she.”
26Kiijiishe, “Riita, apaiq raq ümmak po ka jamkho riita? Apaiq raq ümmak po ka jamkhii raüto tiihea kuqta?” nguta hali tsangshiq raq apaiq ma bom ka bliiq wai nongto.
27Kiijiishe, apaiq raq treto, “Riita, welabi lei, ngi raq namshiq ma chongkuq kang she ihata. Shatmaq, namshiq raq i bomchong ka tairo man. Riita, namshiq raq thongnai ka jam ngutiiwa wai tlan? Namshiq min apaiq jaqshisetiim ma jawan ka ro tlan sham na?”
28Kra tairaütiishe, tsangshiq ka akhiq she riito. Kiimaq apaiq ka akha sonto, “Ümniili tiina kriiwe jai phanti, apaiq jaqshise. Shatmaq, naishiq ha Mosheq jaqshisetiim. 29Naishiq raq asap hai, Mosheq miika Shiikeawe raq bom chongkuqto. Shatmaq, naishiq raq arwe arka ahiqshong arahai santla sap mai!”
30Kriiwe raq tsangshiq bom ka treto, “Arka maiq wangchang bomtsi ashi ahata! Namshiq raq, apaiq ka ümriihiqti wa kiimin sap man. Shatmaq, apaiq raq i mak ka achuk wa tiipiiq kuqto! 31Nashiq raq asap i. Shiikeawe raq ngarai maiqse achu jaü ka tre kuq mak. Apaiq riika, juwa apaiq wokhong na sitlaq, raüta apaiq bom ka tai tlaq, kriiti achu jaü kli tre kuqtlo nguta asap i. 32Rapha hiqwa maq pha wan raüta, ümchaü ranaiq niitaq, maiqse ashi anyung pukdong makchuk adong we mak ka tiipiiq kuqto nguta, tsütsa ka tai mai shaqli. 33Riita, krai mren, arwe armin Shiikeawe raq atiiki riimak ngu raü jiika, i mak ka tiipiiq kuq lot mak mirwa.”
34Kra tairaütiishe, “Naq bom kiq! Ümniika ngarai tak mong maq dong laüta ajong luwan haü! Kiikhiinok maiqse riitiq sha, naishiq ma tsii michong kuq haü ngu kai?” nguta tsangshiq raq apaiq ka sonto, Krai mren she, tsangshiq raq apaiq ka sinagok wa shleq baiqto.
Wenyi Na Makchuk
35Jesuq raq apaiq ka welabi raq sinagok wa shleq baiqto nguta tsütsa kra tai raüta, apaiq rai riihumkai kito. Apaiq rai riihum raütiishe, Jesuq raq apaiq ma akha waito, “Ümniiraq Maiq Se miika kam tlaü sha?”
36Kriiwe raq treto, “Shiilang we, kra chong tlaü we ka ngi ma tiichhi kuq liina, ngi raq apaiq ma mikam ha!”
37Jesuq raq apaiq ma chongto, “Ngi ahata apaiq. Ümchaü ümniirai riibom tiikang we ahata.”
38“O Tatiwe, ngi ka ümniima kamtiikang!” ngutiishe apaiq ka Jesuq jichong na kaütsrong na bumsaq raütiishe, Jesuq ka shomnoqto.
39Jesuq raq apaiq ma chongto, “Ngi mangjong hiq na kikang arka, maiq chechiip kai kikang. Krai mren, makchukti ka makpiiq ma mija wan. Kiimaq makpiiqti ka makchuk ma mija wan.”
40Phorisinok phong wa maiq wiijamti ka, kra akhing na apaiq rai kiijaq asi riito. Tsangshiq raq apaiq bom ka tai raüta, “Ümniiraq naishiq nangnga makchuk ngutiika ngu maü ahiq na?” nguta apaiq ma waito,
41Jesuq raq tsangshiq ma chongto, “Namshiq ka makchuk ngu raü jiika, namshiq dü na ngarai kha ka ahü mirwa. Shatmaq, namshiq raq makpiiq sitiikai nguta tiima tlan krai mren, namshiq khabu ka namshiq khuthaq na bumshat li she misi.”
Currently Selected:
JOHAN 9: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
