LUKE 6
6
Mathrilna Tlainiyei Ngamrou Tlou Kngai
(Mt 12.1-8; Mk 2.23-28)
1 #
Khn 23.25. Jesu'ne Mathrilna tlainirou Aiyei ruishik raple kalhonne louyaora yenralyeinung; heirou Aiyei ruishik rapne loutlairei gehu hui rapya thatbine yai hutmaira manuibi shaikur. 2#Hoy 20.10; 23.12; Khn 5.14. Heisi tounarouri Lhangai karsa thimi thane mulhakurbi kngai, “Kounungei kai tloulamya karhane nane Mathrilna tlainirou heinaksi lhouya toukurawo?” 3#1 Sa 21.1-6. Heirou Jesu'ne yanung loumallang, “Davidni aiyei thimi raple, heirou yane msulyeinung kousi toukuro touri nane pathimakhuiko? 4#Lev 24.9. Ane Dunpuei Cheemra polhakbi, Dunpu'nung makatkur mumtolya loubi shaikur, heitoubi ane aiyei thimi rapnungkhi malanpi. Heisiya hoiyanungkhi aitoukur heiri kaiyei tloulamra karhana lhou, ngamri makatkur mumtol heiri Suipi punitom loushai kya.” 5Heirou Jesu'ne, “Thimiyei Chanapawa heiri Mathrilna tlainiyeikhi Pume,” toubi yunbine luilhakkur.
Hutbang paangkhat Hisundakur Napawa Napungkhat
(Mt 12.9-14; Mk 3.1-6)
6Mathrilna tlaini khatrou Jesu'ne Pukhrumna Cheemra polhakbi Ane marnopiyeinung, bi heirou thyarei hutbang hisundakur napawa napung-khat louklei. 7Heirou Tloulamei uparap thale heitoubi Lhangai karsarap thane yunkantlangbi Jesu'ya klal theibaangninei ngamrou yane Aiyei pongra knakne wakarsilbi, Ane Mathrilna tlaini heirou kna raiyerleiko toubine ngakkbi klei. 8Heiya Jesu'ne yai ningchabi klei heiwaya muwurbi, Ane napawa heiwanung kyun, “Nangne katmayungbi ara maibong lhangra hungthuka.” Heitounei napawa heine loukanthoubi mayungkur. 9Heirouri Jesu'ne yanung kyun, “Kei kngairi: Kaiyei Tloulamni Mathrilna tlainirou kaya koulhou touyernilei? Trungpinanungo, nimanung klah dayernanung? Thimi khatdei chaanya kalpinanungo, nimanung aya klah dayernanung toulei?” 10Heirou Ane ya nammaya karhilne thiphabi, Ane napawa heinung kyun, “Neiyei hutbang hei'engthutlak.” Heirouri ane hutbang loumyengthutkur, heirouri aiyei hutbang heiri khatlhangrei naksine lhangaikur. 11Heirou yari malung kanthringne malungkhawura, heirou yane khatle-khat kartongrilbi Jesu'ya kousi touserouwo toubine yunrilkur.
Jesu'ne Ruishik Napung Chiple-Khniya Khalthutkur
(Mt 10.1-4; Mk 3.13-19)
12 #
Lk 3.21; 5.26; 9.18,28; 11.1. #Pao 1.13. Heitoubi kheen heirouri Jesu'ne lhungdoura shuncharou kawurbi, heirou Ane masa-kralni bi heirou Dunpunung shunchabine yarekkur. 13Heirou tlaini khuwaarkur heirouri Ane ruishik rapya ungkartilbi, yai tlakrei napung chiple-khniya khalthutbine, yaya Paocha thimirap toubine min thulpikur: 14Yarap heiri- Ane ‘Peter’ toubikhi min thulpikur Simon, heirou aiyei naowa Andrew; James heirou John, Philip heirou Bartholomew, 15Matthew heirou Thomas, Alphaeus'yei cha James, heirou Ane ‘Patriot’ toubikhi min thulkur Simon, 16James'yei cha Judah, heirou Thimiyei Chanapawaya yorkurwa Judas Iscariot.
Jesu'ne Shunmatupi Heitoubi Kna Raiyerpi
(Mt 4.23-25)
17 #
Mk 3.7-12. Jesu'ne Aiyei ruishik raple kalhonbi lhungdourei yenkallengbi, heitoubi Ane lhungsoei nimna phaikar khatra Aiyei ruishik raple mayungbi leiyeinung, bi heirou thimi rapne Judea ramrei, Jerusalem'rei heirou Tyrele Sidon rammei phaikara klei thimirap chungne wakartilkur; 18heirou thimi rapne Jesuei kyun tlou rapya ningnanungei heirou yaiyei kna rapya raiyernanungei wakar'umkur. Heitoubi lhangaimak lhawaine marhotbi kna thimi rapkhi bi heirou wabi kna raikyer phakur. 19#Mk 3.10; Mt 9.21; 14.36; Lk 5.17. Thimi namyerne aya thirnanungei heitonlhakur, ngamri Airouwei mantrang kanchaithutbi, heirou yaiyei knaya raiyerkur.
Nungkngai Heirou Lhawai Klah
(Mt 5.1-12)
20Jesu'ne Aiyei ruishik rapbei lhangra thibi heirou Ane kyun, “Nai hangrei kanring thimirap heiri nungairou; ngamri Dunpuei Krungram heiri yaiyei hoirou! 21Asiyei kheenrou msul-yuikhat thimirap heiri likarsui lhangairou; ngamri naiyei msul thoyerrou, heirou yuikhatya khrahyerrou! Asiyei kheenrou chapbi klei thimirap heiri likarsui lhangairou; ngamri nari hillou laonungei kheen phaheirou! 22#1 Pt 4.14; Jn 9.22; 16.2. Thimiyei Chanapawaei ngamrou thimi rapne naya machinbine naya marhotbi heirou yane naya lhangaimak thimi rapme toubi theibaangbi yunlanungri, heirou nari likarsui lhangai hoirou! 23Naidoura heinaksiya hungeinung, heirou nane nungwaiyalo, heitoubi nungkngaine nuylaklo, ngamri nanungei Thangmun ramra heiyei klahman chungne marpeibi khoulei. Kouweiyo toulanungri, bongnung yane Thimkhui rapyakhi heinakrim marhotdurkhou. 24#Lk 16.25; Jas 5.1-5; Mt 6.2. #Lk 10.13-15; 11.38-52; 17.1; 21.23; 22.22. Heiya asiyei kheenrou laldunbi klei thimirap nanungri kounak klahyei shakrung hoikurawo; ngamri nane naichaanrou likarsui heiri leemni phawurla. 25Asiyei chaanrou ukthobi klei thimirap nanungri kounak klahyei shakrung hoikurawo; ngamri nari hillou msul phaheirou. Asiyei kheenrou laobi klei thimirap nari kounakei klah hoikurawo; ngamri nari hillou chapbeirou! 26Thimi rapne naya mathangpiyeinung nanungei kounak klahyei shakrung hoikurawo; heinakrimne yaiyei nutar-patar rapnekhi klallei paocha Thimkhui rapyakhi kanthangpikhou.”
Karhoukril Thimi Rapya Malungshi
(Mt 5.38-48; 7.12)
27 #
Rom 12.17; 1 Co 6.7. “Heiya Keiyei kyunya ningkni thimi rapnungei Keine yunpilei: ‘Naya karhou thimi rapya malungshilak, heitoubi naya machin thimi rapnung lhangaine toupilak, 28naya mancho thimi rapya phor pilak, heirou naya marhotbi klah dayerkur thimi rapnungei shunchapilak. 29Thimi hukounak khatne neiya khatlhangrei maibira phitlanungri, nangne anungei khatlhangrei maibikhi louholpilak; heirou hukounak khatne neiyei phi'upya lunglanungri, nangne anung neiyei linglikhi loulhukpiwurlak. 30Neinungei koukouya bucha thimi rapnung, nangne loumalanpilak, heirou hukounak khatne neiyei putchei louheilanungri, nangne heirapya hanui bumallengmaka. 31#Mt 7.12. Nangne thimi rapya neinungei lhangaiya touyerkni heinakne, nangnekhi thimi rapnung heinakrimne lhangaiya toupilak.”
32 #
Mt 5.44-48. “Nangne neiya malungshi thimi rapyatom malungshilanungri, heirou nangne kouphorya phaeirouwo? Heinaksiri borh thimi rapnekhi yaya malungshi thimi rapya yanekhi malungshipilei! 33Heitoubi nangne neinungei lhangaiya toupikur thimi rapyatom lhangaine toupilanungri, heirou heinungei kouya tungcha leirouwo? Heinaksiri borh thimi rapnekhi toubine leilei. 34Heirou nanungei hanui kroni mallengpichangrou thimi rapnungtom nane malanlanungri, heirou nanungei kouya tungchanung bom leirou? Heinaksiri borh thimi rapnekhi heisi pirilbi, yane heinakbilya hanui mallengtlakrilthulei! 35#Mt 5.9. Heinakya tounungei nimakme! Heiya nane naiyei karhouril thimi rapya malungshilak, nane minung malanpiwurbi hanui kallengne phathunungri ningchamak. Heiyanungri nane naiyei lhangai touwurnei klahman tangne pharou. Heitoubi nari nam'rouwei Choudui Dunpuei chanaorap hoipharou. Ngamri A heiri miyei klahman mumak thimi rapya, heirou lhangaimak thimi rapyakhi kringpi khei. 36Nai Pawaei kringpikhei heinakrimne nanekhi kringpi heiyalo.”
Mideiya Pichar Toupi
(Mt 7.1-5)
37 #
Rom 2.1. “Mideiya pichar toumak, heiyanungri Dunpune neiyakhi pichar toumakrou; heitoubi miya klal theibaangmak, heiyanungri Dunpune neiyakhi klal thimime toubi theibaangmakrou; miya kukpikhei thimi hoiyalo, heitoulanungri Dunpune neiyakhi kukpirou. 38#Mk 4.24; Pao 20.35. Minungei pithutkhei thimi hoiyanungri, Dunpune neinungkhi pirou. Heiya duine, pi'kniyei pikur, heirou neiyei hutmainikhi markumlhak'thotho pikur heirou loudongmarkumbi pikur heinakne Dunpune neinungei heiyakhi duine piheirou. Heirou nangne minungei pikur heinakrimne neinungkhi pithurou.” 39Heirou Jesu'ne yanung anakei yailim tlouya hanuikhi yunpikur: “Mitdeo thimi khatne mitdeo khatya lam ruipi manemakrou; ane heisi toulanungri, yakhurekpa khurra da'tlakrou. 40#Mt 10.24-25; Jn 13.16; 15.20. Marno thimi hukhatnekhi aya marnopi pu heiya duine tangmakrou; heiya huhune marno heiwaya lhangaine luilhakbine heiyei hillouri akhi marnopi punakne hoimanerou. 41#Mt 7.3-5. Nangne neiyei mitlungra mithrum kleiya ningmumakne leibi, koutoubi neiyei teinaowaei mitlungrei rabaya nangne shunmandobi kleiyo? 42Heinakne neiyei mitlungrei mardun kleiya mumakne, koutoubi nangne ‘Keiteinao, neimitlungrei raba heiri kholthutpiyeise’ toubi yunmanerouwo? Lhangai karsa thimirap! Lamkrini neiyei mitrei mithrum kleiya louthutribine, heirou neiteinaowei mitlungrei mithrum klei heiwaya nangne kandangne mumanerou.”
Heengtrung Heirou Aiyei Hei
43 #
Jas 3.11-12. “Lhangai heengtrungri aiyei heirap heiri manthirmakrou, heinakrimne manthir heengtrungri hei lhangai heimakrou. 44Ngamri heengtrung kantang heiri aiyei hei kat'heiyeinung loumu'kya; nane kouniroukhi khyudheiya thru trungrouwei lamakrou, nimanung darkha heiya kouniroukhi nbur'trungrei lamumakrou. 45#Mt 12.34; Mk 7.20. Lhangai thimine aiyei lhangai ukningrei marpeikhou lhangaiya yunthutrou; lhangaimak thimine aiyei ukning lhangaimaknarei klei heiwaya yunthutrou. Ngamri ukningrei klei heiya murne yunthut.”
Cheem Sabaang Napawa Napung-khniyei Ngamrou Yailim
(Mt 7.24-27)
46 #
Mt 7.21. “Koutounei nane Keiya ‘Upawa,’ tou ungbine, heirou Keiyei kyunri nane chanthungmakne leilei? 47#Jas 1.22-25. Huhune Keinung wabi heirou Keiyei kyunya ningbine heiyei hilthungne lhoutou thimi heinungri, kounakei thimiyo toubi Keine shunpirou. 48A heiri cheem sabaangeinung thleira khyukne khur utlhakbine heirou thlungshim doura cheem sabaangkur thiminaklei. Heirou yuitang thukbi yuilhoune cheem heiya nengbinekhi kouniroukhi kanelmakrou, ngamri cheem heiri lhangaine sabaangkur. 49Heiya huhune keiyei kyunya mayekloubi, heiyei hilthungne lhou toumak thimi heiri cheemmun naimakne shitnrui doura cheem sabaangkur thiminaksi; heirou yuitang hungbine cheem heiya yuilhoune nengeinung kounak klahyei shakrung khoine namdeekrou!”
Currently Selected:
LUKE 6: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
